រាជធានីភ្នំពេញ ៖ រយៈពេល ២ ឆ្នាំក្រោយនេះ ការសាក់រូបកំពុងទទួលបានប្រជាប្រិយភាពយ៉ាងខ្លាំង និងការបង្ហាញរូបសាក់ផ្សេងៗកាន់តែបើកចំហរ ពីសំណាក់ប្រជាពលរដ្ឋខ្មែរប្រុស-ស្រី រាប់ចាប់តាំងពីអ្នកសិល្បៈ រហូតសាមញ្ញជន និងបុគ្គលិកបម្រើការងារតាមស្ថាប័នឯកជនមួយចំនួនផង ។ ជាមួយនឹងការពេញនិយមក្នុងការសាក់រូបភាព ឬក៏ការសាក់ជាអក្សរឡាតាំង ឬខេមរភាសានោះ ការបើកហាងបម្រើសេវាកម្មសាក់រូប ត្រូវបានគេប៉ាន់ប្រមាណថាមានចំនួនជាង ៥០ ហាងនៅរាជធានីភ្នំពេញកំពុងបើកដំណើរការជូនអតិថិជនរបស់ខ្លួននៅរាជធានីភ្នំពេញ ។
លោក ឆីកឃី (Chickie) ដែលមានអាជីពជាអ្នកសាក់រូបជាងតាំងពីឆ្នាំ ២០០៩ និងកំពុងបម្រើការងារនៅហាងសាក់រូប RSD ដំបូងបើកក្នុងឆ្នាំ ២០០៦ ជាហាងស្ទីកឃ័រឌីហ្សាញ រហូត ២០០៩ ក៏បន្ថែមទៅជាហាងសាក់រូបហើយបានទទួលការគាំទ្រពីអតិថិជនតិចតួចមែនទែន ។ ដែលកាលនោះ ពេលបើកដំបូង អតិថិជនមានមិនច្រើននោះទេ គឺអាចនិយាយបានថាក្នុងមួយខែ មានភ្ញៀវតែ ២ ឬ ៣ នាក់ប៉ុណ្ណោះ ដែលពួកគាត់ជាភ្ញៀវមកទទួលសេវាចាក់សាក់ តាមរយៈមិត្តភ័ក្ត្រ ឬ ភ្ញៀវដែលឆ្លងកាត់ហាងហើយដើរចូលមកក្នុងហាងតែម្តង ពេលឃើញហាងតែប៉ុណ្ណោះ ។ ជាងចាក់សាក់រូបនេះបន្តទៀតថា «ចំពោះការកើនឡើងរបស់ភ្ញៀវក្នុងមួយខែៗ បើយើងប្រៀបធៀបគ្នានឹងការបើកដំបូងៗនិងពេលបច្ចុប្បន្នគឺខុសគ្នាច្រើនមែនទែន ។ ពីមុនមួយខែយើងធ្លាប់ទទួលបានភ្ញៀវតែ ២ នាក់ទៅ ៣ នាក់ ។ តែឥឡូវ ផ្ទុយទៅវិញក្នុងមួយថ្ងៃគឺយើងអាចទទួលបានភ្ញៀវពី ៧ ទៅ ១០ នាក់ក្នុងមួយហាងក្នុងចំណោមហាងទាំង ៤ ទីតាំង លោក ឆីកឃី បន្តថាចំពោះរូបលោកផ្ទាល់ដែលជាជាងចាក់សាក់មួយរូប លោកមើលឃើញថាសង្គមខ្មែរបច្ចុប្បន្នមានការបើកទូលាយ និងមិនប្រកាន់ច្រើននោះទេពាក់ព័ន្ធនឹងសិល្បៈនៃការសាក់រូប ជាពិសេសកំណើនភ្ញៀវជាសុភាពនារី គឺមានចំនួនកើនឡើងគួរឲ្យកត់សម្គាល់ផងដែរ ។
ចំពោះហាងសាក់ ក្នុងរយៈពេល ២ ឆ្នាំចុងក្រោយសន្ទុះនៃការបើកមានច្រើនដោយសារបងប្អូនខ្មែរយើងគាត់ពេញនិយម ហើយបងប្អូនយើងមួយចំនួនស្រលាញ់ការសាក់ក៏វិវត្តន៍ខ្លួនទៅជាជាងសាក់ ហើយចាប់វាជាអាជីព ។ ជាក់ស្តែងកាលពី ២ ឆ្នាំមុនមានប្រហែលតែ ១០ហាងទេ តែឥឡូវទាំងហាងធំ និងតូច គឺកើនឡើងប្រមាណជាង ៥០ ហាងក្នុងរយៈពេល ២ ឆ្នាំនេះ ។ លោកឆីកឃី (Chickie) បន្ថែមថា «ដោយសារការពេញនិយមការចាក់សាក់សព្វថ្ងៃនេះ វាអាចជារបរមួយ ទោះមិនល្អណាស់ណា តែជារបរសុច្ចរិតមួយ ជាកម្លាំងញើសឈាមរបស់យើង ព្រោះត្រូវប្រើទេពកោសល្យនិងបញ្ញា ចំណូលក៏ទទូលសមរម្យល្អ» ។
យ៉ាងណាមិញ ដោយសារចំនួនកើនឡើងនៃហាងសាក់ វាប៉ះតិចតួច ដំបូងបងប្អូនប្រាកដជាគិតថាការសាក់រូបវាមិនមានអីថ្លៃ ឬចាំបាច់ចូលហាងល្អ អញ្ចឹងគាត់ឃើញហាងល្មមៗគាត់នឹងចូល អញ្ចឹងក្នុងសង្គមមួយដែលជាទីផ្សារប្រកួតប្រជែង តែមិនប៉ះពាល់អីទេ។ សម្រាប់លោក ឆីកឃី (Chickie) គឺចំណូលរបស់ខ្លួនលោកផ្ទាល់ ក្នុងមួយខែ គឺទទួលបានជាង ១០០០ ដុល្លារអាមេរិក ។
សម្រាប់ ស៊ឹម កុសល វ័យ ២៤ ឆ្នាំនិងជាម្ចាស់ហាងសាក់មួយកន្លែងនៅម្តុំផ្សាដើមថ្កូវ បានឲ្យដឹងថាលោកទើបតែបើកហាងសាក់តូចមួយនៅផ្ទះរបស់លោកបានប្រហែល មួយឆ្នាំតែប៉ុណ្ណោះ តែទទួលបានភ្ញៀវច្រើនគួរសមដែលអាចឲ្យលោកទទួលបានចំណូលជាមធ្យម ៥០០ ដុល្លារអាមេរិកផងដែរ ក្នុងមួយខែ។
ជាងសាក់រូប ស៊ឹម កុសល បន្ថែមថា «ទីផ្សារសាក់រូបគឺកំពុងតែពេញនិយមខ្លាំង ហើយខ្ញុំមើលឃើញថា អាជីពជាជាងសាក់គឺល្អប្រសើរមួយដែរ ដើម្បីរកចំណូលផ្គត់ផ្គង់ជីវភាព » ។ ជាងសាក់រូបដែលកំពុងបើកអាជីវកម្មហាងសាក់រូបបានអះអាងថាតម្លៃសាក់រូបគឺមានតម្លៃទៅតាមទំហំ និងប្រភេទនៃរូបសាក់ ដែលហាងខ្លះមានតម្លៃសាក់ចាប់ពី ២០ ដុល្លារអាមេរិក ទៅដល់រាប់ពាន់ដុល្លារផងដែរ ដែលការសាក់រូបគឺមានប្រភេទជាការសាក់ទឹកថ្នាំធម្មតា ឬក៏ទឹកថ្នាំពណ៌ជាដើម ។
ការសាក់រូបកាន់តែបើកចំហរនិងពេញនិយម ដោយសារមូលហេតុអ្វី ? លោកឆីកឃី (Chickie) ដែលបានរៀនសូត្រនិងអនុវត្តរយៈពេល ២ ឆ្នាំ ការសាក់រូបនៅហាង RSD ចុងឆ្នាំ ២០០៩ ជាមួយគ្រូជនជាតិសិង្ហបុរី បាននិយាយថាផ្នត់គំនិតចាស់ៗនិងក្មេងៗសម័យបច្ចុប្បន្នគឺខុសគ្នាពីសម័យមុន ។ ជាពិសេសអតិថិជនជាស្ត្រីមកទទួលសេវាចាក់សាក់ក៏មានចំនួនកើនឡើងខ្លាំងផងដែរ ។
លោកឆីកឃី និយាយថា «ដោយសារតែពួកគាត់ដែលជាភ្ញៀវស្រីៗគាត់ភាគច្រើនស្រលាញ់ការសាក់ ជាមនុស្សស្រីគាត់ចូលចិត្តតុបតែងខ្លួនឲ្យមើលទៅគួរឲ្យស្រលាញ់ ដូច្នេះគាត់យល់ថាការសាក់គឺជាសិល្បៈមួយ និងជាការបង្ហាញស្រស់ស្អាតនិងសិចស៊ីរបស់គាត់ គាត់ចាក់សាក់ដើម្បីឲ្យគេមើលមក ឃើញថាគាត់ខ្យូត គួរឲ្យស្រលាញ់ ។ ចំពោះប្រុសៗក៏ដូចគ្នា ឲ្យគាត់មើលទៅរឹងមាំ មានស្ទីលប្លែក ហើយខ្លះចេញបង្កើត unique ស្ទាយមួយ ខ្លះសាក់ហើយ ក៏មិនចង់ឲ្យអ្នកផ្សេងឃើញដែរ គឺឃើញសម្រាប់មនុស្សពិសេសរបស់គាត់និងរូបគាត់» ។
ជាងសាក់រូបដែលមានបទពិសោធន៍ជាង ១០ ឆ្នាំរូបនេះបន្តថា «ចំពោះភ្ញៀវនារីៗដែលគាត់ពេញនិយមសាក់ គឺភាគច្រើន កដៃ កជើង ស្មា កញ្ចឹងក និងកន្លែងពិសេសសម្រាប់អ្នកពិសេសរបស់គាត់ ជាការសាក់ជារូប ឬក៏ជាយ័ន្តផងដែរ» ។ លោកបន្តថា សម្រាប់ខ្ញុំផ្ទាល់ ខ្ញុំគិតថាគាត់ហ៊ានបើកចំហរចំពោះការសាក់ គាត់ឃើញថាការគិតនិងផ្នត់គំនិតឥឡូវ មិនដូចជំនាន់ប៉ាម៉ាក់ខ្ញុំ ឬជំនាន់ចាស់ពីដើម។ ចាស់ៗពីដើមគាត់គិតថាការសាក់ វាមិនល្អអញ្ចេះ មិនល្អអញ្ចុះ ប៉ុន្តែបច្ចុប្បន្ន គឺភាគច្រើនគាត់មានម្ចាស់ការខ្លួនឯង ។ ហើយបងប្អូនយើងសម័យឥឡូវ យល់ថាការ សាក់វាមិនមែនបង្ហាញពីអត្តចរិកទេ តែជាសិល្បៈលម្អរខ្លួន ក៏ដូចជាបងប្អូនស្រី គឺពួកគាត់ស្រលាញ់ណាស់សាក់ ។ ពីមុនគាត់ប្រាប់ថាខ្លាចគេម៉ៃថាមិនល្អ តែបច្ចុប្បន្នអ្នកសាក់ គឺគាត់ហ៊ានទទួលស្គាល់ថាជាសិល្បៈ មិនមែនការសាក់បង្ហាញថាគាត់ជាមនុស្សអាក្រក់ ឬក៏ក្រុមសង្គមងងឹតអីនោះទេ ។
ស៊ឹម កុសល ជាងចាក់សាក់រូបនេះទទួលស្គាល់ថា «ពីដើមគេយល់ថាអ្នកចាក់សាក់ជាមនុស្សមិនល្អ ហើយពេលដើរចេញទៅណាមកណា មហាជនមើលមកអ្នកមានសាក់លើដងខ្លួន ឬដៃជើង ជាមនុស្សមិនល្អជាដើម សូម្បីតែឳពុក-ម្តាយរបស់ខ្ញុំផ្ទាល់ ក៏បានណែនាំខ្ញុំថាកុំឲ្យចាកសាក់អី ពេលខ្ញុំចាក់សាក់លើខ្លួនខ្ញុំគាត់ក៏មិនពេញចិត្តដែរ ។ តែថ្មីៗនេះក្រោយពេល អ្នកមានគុណគាត់ឃើញខ្ញុំអាចរកចំណូលបានសម្រាប់ផ្គត់ផ្គង់ខ្លួនឯង គាត់ក៏ជម្រុញលើកទឹកចិត្តឲ្យខ្ញុំប្រកបអាជីពនេះដែរ » ។ សម្រាប់បច្ចុប្បន្ននេះ សាក់ដែលទទួលបានការពេញនិយម សម្រាប់គឺមានច្រើនជាសាក់យ័ន្តខ្មែរ ជាយ័ន្ត៥ជុំ និងយ័ន្ត៨ទិសជាដើមនៅកញ្ចឹង.ក ស្មាប៉ែកខាងក្រោយ ចង្កេះ និងស្មារខាងមុខជាដើម ។
សម្រាប់សុភាពនារីមួយរូបដែលចូលចិត្ត ការសាក់រូបលើដឹងខ្លួន យល់ស្របថានាពេលបច្ចុប្បន្ន ការសាក់រូបគឺពេញនិយមខ្លាំងពីសំណាក់ នារីនិងបុរសៗដូចគ្នា ។ ជាពិសេសនាងស្រលាញ់ចូលចិត្តតាំងពីក្មេង ដល់ពេលចម្រើនវ័យ ម្តាយមិនប្រកាន់នឹងរឿងចាក់សាក់ គាត់ក៏មានការចាក់សាក់ជាច្រើនកន្លែងនៅលើដងខ្លួនផងដែរ ។ សុភាពនារីដែលមានវ័យជាង ២០ ឆ្នាំ តែសុំមិនបញ្ចេញឈ្មោះលើកឡើងថា « ខ្ញុំចូលចិត្តការសាក់ជារូបតូចៗ ជាអក្សរតូចៗ មិនចូលចិត្តសាក់រូបធំៗនោះទេ » ។ តារាសម្តែងជួរមុខនៅកម្ពុជា ដែលមានវត្តមានថតភាពយន្តហូលីវូដ «មុនដំបូងខ្មែរក្រហមសម្លាប់ឳពុកខ្ញុំ» អ្នកនាងស្វែង សុជាតា ក៏មានចាក់សាក់លើខ្នងរបស់អ្នកនាងជាច្រើនកន្លែងផងដែរ ហើយវាមានអត្ថន័យច្រើនណាស់សម្រាប់អ្នកនាង ព្រោះសាក់ដែលអ្នកនាងចាក់ជាលក្ខណៈមន្តអាគមន៍ឲ្យជៀសផុតពីសត្រូវទាំងពួង «ហើយក៏នាំមកនូវហុងស៊ុយល្អៗសម្រាប់ជីវិតការងារ ទើបការងារចូលមកយ៉ាងច្រើនសម្រាប់ការងារសម្តែងទាំងក្នុងនិងក្រៅប្រទេស» ។
អ្នកនាង ស្វែង សុជាតា បញ្ជាក់ថា៖ «វាអាចអញ្ចឹងដែរ រឿងសាក់នេះវាពាក់ព័ន្ធ ជាមួយនឹងហុងស៊ុយដែរ ព្រោះថាមនុស្សយើងកើតមកម្នាក់ៗគឺមានថ្ងៃខែ ឆ្នាំកំណើតនិងពេលវេលាកំណើតខុសៗគ្នា ។ សម្រាប់ស្នាមសាក់ មន្តអាគមន៍ ដូចបង គឺយើងមិនអាចចេះតែសាក់ៗបានទេ ។ យើងសាក់មានហុងស៊ុយ ដោយសារយើងមានឆ្នាំកំណើតយើង គឺសាក់ទៅលើប្រភេទបាលី មន្តអាគមន៍ នៅលើខ្លួន ដើម្បីកុំឲ្យ ឧទាហរណ៍កាលណាបើកើតឆ្នាំច ទៅសាក់ឆ្នាំវក ឬឆ្នាំអីផ្សេង គឺនាំឡាក់ឆុងហើយ ។ គ្រូដែលសាក់ត្រូវតែចេះច្បាស់លាស់អំពីរឿងនឹង ទើបយើងសុខសប្បាយ មានការងារច្រើន ទោះមិនក្លាយជាអ្នកមានធំ ក៏គ្រោះធំក្លាយជាគ្រោះតូចដែរ» ។
តារាសម្តែងស្រីរួបនេះបន្តថា «សម័យបច្ចុប្បន្នបងប្អូនខ្មែរជាច្រើនកាន់តែបើកចំហរទទួលយកស្នាមសាក់ ជាលក្ខណៈសិល្បះលម្អរលើដងខ្លួន ដៃជើងផងដែរ ។ ដូចសាក់របស់ខ្ញុំផ្ទាល់ គឺមានយូរឆ្នាំមកហើយ តែមិនហ៊ានបញ្ចេញ ទើបតែក្រោយពីខ្ញុំបានសម្តែងភាពយន្តឲ្យកំពូលតារាហូលីវូដ និងជាអ្នកដឹកនាំរឿង «មុនដំបូងខ្មែរក្រហមសម្លាប់ឳពុកខ្ញុំ» គឺអ្នកនាង អែនជីលីណា ជូលី (Angelina Jolie) បានឃើញសាក់របស់ខ្ញុំ ហើយគាត់សាក់តាម ហើយក៏មានបងប្អូនអ្នកសិល្បះផ្សេងៗទៀតផ្អើលនាំគ្នាសាក់រូបភាពផ្សេងៗដើម្បីលម្អររាងកាយរហូតមក » ៕
ចែករំលែកព័តមាននេះ