រាជធានីភ្នំពេញ ៖ ផលិតករបានសម្តែងការសាទរនៅពេលបានសម្រេចបំណង ក្នុងការទាមទារសុំការលើក លែងពន្ធពីរាជរដ្ឋាភិបាលលើភាពយន្តដែលផលិតនៅក្នុងស្រុក ។ ប្រមុខរាជរដ្ឋាភិបាលកម្ពុជា សម្តេចអគ្គ មហាសេនាបតីតេជោ ហ៊ុន សែន បានប្រកាសមិនយកពន្ធលើភាពយន្តខ្មែររយៈពេល៥ឆ្នាំ ក្នុងឱកាសដែលសម្តេចជួបសំណេះសំណាលជាមួយសិល្បករ ក្នុងទិវាវប្បធម៌ជាតិកាលពីពេលថ្មីៗកន្លងមក ។
បន្ទាប់ពីការប្រកាសរបស់សម្តេចតេជោ ផលិតករខ្មែរបានសម្តែងការសាទរ បន្ទាប់ពីផលិតករបានដាក់សំណើអស់ពេលប៉ុន្មានឆ្នាំចុងក្រោយនេះ ។ ចាងហ្វាងផលិតកម្មដើមត្នោតលោកឆាយ បូរ៉ា បានអះអាងថា «យើងទាមទារលើរឿងពន្ធដារចំពោះវិស័យភាពយន្តនេះ៣ឆ្នាំហើយ ។ ពេលនេះ យើងមានដំណឹងល្អដោយប្រមុខរាជរដ្ឋាភិបាលបានទទួលយកសំណើរបស់យើងជាផលិតករភាពយន្តដោយលើកលែងពន្ធរហូតដល់ឆ្នាំ២០២៣ ។
យើងសង្ឃឹមថា ការលើកលែងពន្ធនេះ គឺមានន័យថា ការលើកលែងពន្ធគ្រប់ប្រភេទលើវិស័យភាពយន្តលើកលែងតែពន្ធអាករបន្ថែម ។ វាជាការលើកទឹកចិត្តចំពោះផលិតករភាពយន្តឲ្យខិតខំប្រឹងប្រែង ដើម្បីផលិតភាពយន្តឲ្យមានគុណភាពប្រកួតប្រជែងជាមួយភាពយន្តបរទេសដែលហូរចូលយ៉ាងគំហុកក្នុងប្រទេសកម្ពុជា»។
ចំណែកចាងហ្វាងផលិតកម្មមហាហង្សលោកអុិន សុភិន ថ្លែងថា «ការប្រកាសលើកលែងពន្ធពីរដ្ឋាភិបាលនាពេលនេះគឺជាអត្ថប្រយោជន៍មួយយ៉ាងធំសម្រាប់ផលិតករ។ ករណីនេះបានលើកទឹកចិត្តដល់ផលិតករក្នុងស្រុកកាន់តែមានទឹកចិត្ត ដើម្បីផលិតភាពឲ្យបានកាន់តែច្រើន ជាមួយនឹងការប្រកួតប្រជែងកាន់តែធំជាមួយភាពយន្តនៅក្នុង និងក្រៅស្រុក ។ ការសម្រេចរបស់រដ្ឋាភិបាលនាពេលនេះបញ្ជាក់ឲ្យកាន់តែច្បាស់ពីការគិតគូរ និងយកចិត្តទុកលើវិស័យសិល្បៈខ្មែរ ។ ការយកចិត្តទុកដាក់នេះគឺជាការលើកទឹកចិត្តមួយយ៉ាងធំធេងសម្រាប់ផលិតករខ្មែរកាន់តែមានភាពជឿជាក់ ជាមួយនឹងការខិតខំលើកស្ទួយវិស័យភាពយន្តខ្មែរឲ្យកាន់តែរីកចម្រើន »។
ដោយឡែកសមាគមភាពយន្តកម្ពុជាបានបង្ហោះសារថា «សូមថ្លែងអំណរគុណដល់រាជរដ្ឋាភិបាលកម្ពុជាក្នុងការអនុគ្រោះលើកលែងពន្ធដារផ្នែកភាពយន្ត ក្នុងរយៈពេល៥ឆ្នាំ ក្នុងកម្មវិធីទិវាវប្បធម៌ជាតិ៣មីនា លើកទី២១ ឆ្នាំ២០១៩ និងពិធីបិទមហោស្រពសិល្បៈយុវជនទូទាំងប្រទេសលើកទី៥ ។ ក្តីសង្ឃឹមភាពយន្តខ្មែរយើងកំពុងដើរទៅមុខហើយ »។
ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈលោកប៉ុក បូរក្ស ធ្លាប់បានអះអាងថា ដើម្បីជាការលើកទឹកចិត្ត និង ជំរុញផលិតករឲ្យផលិតខ្សែភាពយន្តបន្ថែមនោះ ក្រសួងវប្បធម៌បានធ្វើកិច្ចការជាច្រើន ពាក់ព័ន្ធនឹងផ្នែកមួយនេះ ។ ក្រសួងបាន ធ្វើការជាមួយក្រសួងស្ថាប័នជាច្រើនដើម្បីសម្រួលដល់ ផលិតករសម្រាប់ផ្តល់ជាទីកន្លែងថត និង បានលើកសំណើទៅកាន់ស្ថាប័នពន្ធដារដើម្បីសុំលើកលែងការយកពន្ធពីផលិតករខ្មែរដែលបញ្ហានេះរង់ចាំការឆ្លើយតបពីក្រសួងសេដ្ឋកិច្ច និងហិរញ្ញវត្ថុ ។
ដោយឡែក សម្រាប់ចំណុចដែលត្រូវធ្វើនៅឆ្នាំ២០១៩ នេះ គឺនឹងពិនិត្យមើលការបែងចែក ភាគលាភ
រវាងផលិតករ និងរោងភាពយន្ត ជា ពិសេសលក្ខខណ្ឌមួយចំនួនទៀតដែលគិតថា នឹង អាចផ្តល់នូវអត្ថ ប្រយោជន៍បន្ថែមដល់ផលិតករភាពយន្ត ៕
ចែករំលែកព័តមាននេះ