ខេត្តសៀមរាប ៖ រថយន្តមួយគ្រឿងបត់ស្តាំត្រង់ចំណុចស្តុបខ្វះការប្រុងប្រយ័ត្នជ្រុលទៅបុកម៉ូតូមួយគ្រឿងពីក្រោយ បណ្តាលឱ្យស្ត្រីម្នាក់ជាអ្នកបើកបរម៉ូតូស្លាប់ភ្លាមៗនៅកើតហេតុ បង្កឱ្យមានការភ្ញាក់ផ្អើលដល់អ្នកដំណើរតាមផ្លូវនាំគ្នាចោមរោមមើល ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង១និង១៥នាទីរសៀលថ្ងៃទី១០ ខែមីនា ឆ្នាំ២០១៩នេះ ស្ថិតនៅលើដងផ្លូវជាតិលេខ៦ ត្រង់ចំណុចស្តុបមុខផ្សារពួក ក្បែររូបសំណាកយាយកាន់កណ្តៀវ ស្ថិតក្នុងភូមិអូរតាប្រាក់ ឃុំពួក ស្រុកពួក ខេត្តសៀមរាប។
ជនរងគ្រោះដែលស្លាប់ឈ្មោះសាន់ សាមឿយ ភេទស្រី អាយុ៣២ឆ្នាំ រស់នៅភូមិគោកថ្មី ឃុំពួក ស្រុកពួក ខេត្តសៀមរាប ជាអ្នកបើកបរម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ សៀមរាប ១A-៩៤២៧ ។
ចំណែករថយន្តមួយគ្រឿងខាងលើម៉ាកអុីស៊ុយហ្សុ៊យ ពណ៌ស ពាក់ស្លាកលេខ សៀមរាប ៣A -១៧៥៨ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ស្រមោល ។
លោកវរសេនីយ៍ឯក ទេព ពុំសែន អធិការស្រុកពួក បានប្រាប់ឱ្យនៅព្រឹកថ្ងៃទី១១ ខែមីនា ឆ្នាំ២០១៩នេះថា មុនពេលកើតហេតុ គេឃើញរថយន្តមួយគ្រឿងម៉ាកអុីស៊ុយហ្សុ៊យ បើកបរក្នុងទិសដៅពីកើតទៅលិច លុះមកដល់ចំណុចកើតហេតុខាងលើ បានបត់ស្តាំខ្វះការប្រុងប្រយ័ត្ន ជ្រុលទៅបុកពីក្រោយម៉ូតូមួយគ្រឿងម៉ាកហុងដាឌ្រីម ដែលបើកបរក្នុងទិសដៅពីកើតទៅលិច ហើយបត់ស្តាំស្របទិសគ្នាជាមួយនឹងរថយន្ត បណ្តាលឱ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ។ ចំណែកអ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ។
លោកបន្តថា ក្រោយពេលកើតហេតុ កម្លាំងនគរបាលជំនាញរបស់អធិការស្រុកបានចុះមកដល់កន្លែងកើតហេតុ និងធ្វើការវាស់វែង ដើម្បីអូសយករថយន្តនិងម៉ូតូចេញ កុំឱ្យមានការកកស្ទះចរាចរណ៍ផងដែរ។
បច្ចុប្បន្នកម្លាំងជំនាញបានអូសយករថយន្តបង្កនិងម៉ូតូជនរងគ្រោះ យកមករក្សាទុកនៅអធិការនគរបាលស្រុកពួក ដើម្បីរៀបចំកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ។ ចំណែកសពស្ត្រីរងគ្រោះត្រូវបានសមត្ថកិច្ចប្រគល់ទៅឱ្យក្រុមគ្រួសារដើម្បីដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ