ខេត្តស្វាយរៀង ៖ ហេតុការណ៍ដ៏រន្ធត់ដែលបានកើតឡើងនេះ គឺបង្ហាញយ៉ាងច្បាស់ថាជាការប្រឈមមួយសម្រាប់ប្រជាពលរដ្ឋ ដែលមានផ្ទះឬតូបលក់ដូរតែងនាំគ្នាសង់នៅជាប់ចំណីផ្លូវ ងាយស្រួលប្រកបមុខរបរ ។ ប៉ុន្តែវាផុយស្រួយណាស់ បើផ្លូវនោះមានការធ្វើចរាចរណ៍មមារញឹក ព្រោះអាចមានគ្រោះថ្នាក់ជាយថាហេតុ…
ខេត្តស្វាយរៀង ៖ ហេតុការណ៍ដ៏រន្ធត់ដែលបានកើតឡើងនេះ គឺបង្ហាញយ៉ាងច្បាស់ថាជាការប្រឈម
មួយសម្រាប់ប្រជាពលរដ្ឋ ដែលមានផ្ទះឬតូបលក់ដូរតែងនាំគ្នាសង់នៅជាប់ចំណីផ្លូវ ងាយស្រួលប្រកបមុខរបរ ។ ប៉ុន្តែវាផុយស្រួយណាស់ បើផ្លូវនោះមានការធ្វើចរាចរណ៍មមារញឹក ព្រោះអាចមានគ្រោះថ្នាក់ជាយថាហេតុ ពិសេសនៅពេលយប់ ប្រសិនបើរថយន្តមានបញ្ហាដូចជាបែកកង់ អ្នកបើកបរងងុយដេក ឬមានបាតុភាពផ្សេងៗទៀត ដូចជាគ្រោះថ្នាក់ខាងលើនេះជាដើម ពិតជាគួរឱ្យសោកស្តាយខ្លាំងណាស់ ។
ជាក់ស្តែង យ៉ាងហោចណាស់ មនុស្ស៣នាក់ជាម្តាយនិងកូនបានស្លាប់បាត់បង់ជីវិតតែមួយប៉ព្រិចភ្នែក និងប្តីរងរបួសធ្ងន់ ដោយសាររថយន្តធុនយក្សមួយគ្រឿងបុកចូលផ្ទះ រួចក្រឡាប់សង្កត់ផ្ទះនៅជាប់ចិញ្ចើមផ្លូវជាតិ ដែលរកតែបំណែកក៏សឹងគ្មាន ។ ហេតុការណ៍នេះ កើតឡើងកាលពីវេលាម៉ោង២ និង៤នាទីរំលងអធ្រាត្រ ឈានចូលថ្ងៃទី១០ មីនា ស្ថិតនៅតាមផ្លូវជាតិលេខ១ ក្នុងភូមិត្របែកប្រហោង ឃុំតាសួស
ស្រុកស្វាយជ្រំ ចំណែកអ្នកបើកបររថយន្តបានរត់គេចខ្លួនបាត់ ។
បើតាមសមត្ថកិច្ចឲ្យដឹងថា ក្រោយកើតហេតុសមត្ថកិច្ចបានធ្វើអន្តរាគមន៍ដោយទាញយកសពស្ត្រីជាម្តាយនិងកូន២នាក់ចេញពីគំនរផ្ទះបែកបាក់ ក្រោមរថយន្ត និងនាំយកបុរសជាប្តីដែលរបួសធ្ងន់ទៅកាន់មន្ទីរពេទ្យបង្អែកខេត្ត ដើម្បីសង្គ្រោះភ្លាមៗ ។ ចំណែករថយន្ត ត្រូវបានស្ទូចយកទៅការិយាល័យនគរបាលចរាចរណ៍ផ្លូវគោកខេត្តដើម្បីដោះស្រាយទៅតាមផ្លូវច្បាប់ ។
បើតាមអ្នកឃើញហេតុការណ៍បានប្រាប់សមត្ថកិច្ចថា ជនរងគ្រោះជាប្តីឈ្មោះ នាង ពូតា អាយុ៤៧ឆ្នាំ មានមុខរបរជាជាងជួសជុលម៉ូតូ ។ មុនពេលកើតហេតុ មានរថយន្តយីឌុបភ្លៅ៥មួយគ្រឿង បើកបរពីខាងលិចទៅខាងកើត លុះទៅដល់ចំណុចខាងលើ សង្ស័យអ្នកបើកបរងងុយដេកក៏រេចង្កូតធ្លាក់ផ្លូវបុកចូលផ្ទះជនរងគ្រោះដែលកំពុងលង់លក់ក្នុងដំណេកលាន់ស្នូរដូចគ្រាប់បែក ។ ហេតុការណ៍នេះ បណ្តាលឲ្យផ្អើលដល់អ្នកភូមិនាំគា្នរត់ទៅមើល ឃើញប្តីរងរបួសធ្ងន់ ឯប្រពន្ធ និងកូន២នាក់ស្លាប់ក្រោមគំនរផ្ទះគួរឲ្យរន្ធត់ ។
សពជនរងគ្រោះម្តាយ-កូនទាំង៣នាក់ ត្រូវបានសាច់ញាតិចាត់ចែងធ្វើបុណ្យទៅតាមប្រពៃណី រីឯប្តីកំពុងសង្គ្រោះនៅមន្ទីរពេទ្យខេត្ត ។ ចំណែករថយន្តត្រូវបានសមត្ថកិច្ចអូសយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្ត ។
សូមបញ្ជាក់ថា ស្ត្រីដែលស្លាប់ក្នុងករណីគ្រោះថ្នាក់ចរាចរណ៍នេះ ទើបតែឆ្លងទន្លេបានមួយខែប៉ុណ្ណោះ ដែលនេះពិតជាសោកសង្រេងខ្លាំងណាស់ សម្រាប់គ្រួសារមួយនេះ ។ លោក ពិន អាន អធិការនគរបាលស្រុកស្វាយជ្រំឲ្យដឹងថា នៅម៉ោង៣ទៀបភ្លឺនោះ លោកទទួលបានព័ត៌មានថា មានករណីគ្រោះថ្នាក់ រថយន្តបុកចូលផ្ទះពលរដ្ឋឈ្មោះ នាង ពូតា អាយុ៤៧ឆ្នាំ នៅភូមិត្របែកប្រហោង ឃុំតាសួស ស្រុកស្វាយជ្រំ ។ ភ្លាមៗ កម្លាំងនគរបាលស្រុក សហការជាមួយកម្លាំងជំនាញខេត្ត បានចុះទៅដល់ទាញយកសាកសពទាំង៣នាក់ម្តាយ-កូន ព្រមទាំងបញ្ជូនបុរសជាប្តីទៅកាន់មន្ទីរពេទ្យបង្អែកខេត្ត ។
ចែករំលែកព័តមាននេះ