រាជធានីភ្នំពេញ៖ស្នាដៃភាពយន្តថ្មីរបស់លោកហ៊ុយ យ៉ាឡេង កំពុងដាក់បញ្ចាំងគឺរឿង«ទារុណកម្មខ្មោច »។ លោកយ៉ាឡេង មានគម្រោងច្រើនសម្រាប់ជ្រោងស្នាដៃនេះទាំងនៅក្នុងប្រទេស ទាំងនៅក្រៅប្រទេស ។
ថ្លែងប្រាប់អ្នកយកព័ត៌មានកោះសន្តិភាពកាលពីថ្ងៃ៨ មីនា ២០១៩លោកហ៊ុយ យ៉ាឡេងឲ្យដឹងថា លោកត្រៀមដាក់ខ្សែភាពយន្តរឿង«ទារុណកម្មខ្មោច»ឆ្ពោះទៅកាន់ទីផ្សារធំនៅហុងកុង ។ បន្ទាប់មកយកទៅចូលរួមកម្មវិធីមហោស្រពភាពយន្តនៅប្រទេសម៉ាឡេស៊ី។ លើសពីនេះលោកគ្រោងសាកល្បងយកចូលទីផ្សារភូមា ។
ចំណែកនៅវៀតណាម ថៃ ឡាវ និងព្រុយណេ គឺត្រៀមបកប្រែហើយយកទៅបញ្ចាំងព្រមគ្នា ។
លោកហ៊ុយ យ៉ាឡេង និយាយថា«ភាពយន្តខ្មែរអាចរីកចម្រើនដូចគ្នាទាល់តែចេញពីការគាំទ្ររបស់បងប្អូនទស្សនិកជន ។ ចំពោះទីផ្សារនៅក្រៅប្រទេសខ្ញុំមានតែពឹងលើអ្នកស្គាល់ជួយផ្សព្វផ្សាយទើបមានសង្ឃឹមថាកុនយើងអាចទាក់ទាញប្រសិនបើទទួលព័ត៌មានមុន»។ ភាពយន្តរឿង«ទារុណកម្មខ្មោច»នៅពេលចាក់បញ្ចាំងមានទស្សនិកជនចូលទស្សនាច្រើន។ ទស្សនិកជនបានលើកសរសើរផ្ទៃរឿងមានភាពទាក់ទាញក្រោមស្នាដៃដឹកនាំរបស់លោកហ៊ុយ យ៉ាឡេងដោយលោកសម្រិតសម្រាំងសម្រាប់រឿង«ទារុណកម្មខ្មោច»នេះ ។
នៅលើបណ្តាញសង្គមហ្វេសបុ៊ករបស់លោកហ៊ុយ យ៉ាឡេង កាលពីពេល ថ្មីៗកន្លងមកបានសរសេររៀបរាប់ថា« ការតស៊ូ៣ចំណុចរបស់ខ្ញុំដើម្បីផលិតរឿង«ទារុណកម្មខ្មោច» ៖ ១-ការសម្រកគីឡូ១ខែ១៨គីឡូ គឺជាការសម្រេចចិត្តយ៉ាងផុយស្រួយ មនុស្សជុំវិញខ្លួនតែងសួរខ្ញុំថាធ្វើកើតអត់ ?ខ្ញុំខ្លួនឯងពិតជាភ័យខ្លាច ធ្វើមិនទាន់ពេល តែពី១ថ្ងៃទៅ១ថ្ងៃខ្ញុំមិនដកថយឡើយ ក្នុងចិត្តមានតែអក្សរតស៊ូ ខំប្រឹង លះបង់ពេញនៅក្នុងខ្លួន ។ ទីបំផុតខ្ញុំធ្វើបាន ស្រកបាន១៨គីឡូក្នុងមួយខែទោះបីខ្ញុំថតចប់ ខ្ញុំត្រូវចូលពេទ្យក៏ដោយ ។ ២-ការរៀបចំថតឈុតដោតម្ជុលចូលសាច់ពិតជាលំបាក រៀបចំតាំងពីល្ងាចដល់ភ្លឺទើបថតចប់ ខ្ញុំរារែកច្រើនដងចំពោះការដោតម្ជុលចូលសាច់ ខ្ញុំចង់បដិសេធច្រើនដង តែខ្ញុំបានសច្ចាហើយថាធ្វើវាឲ្យបាន ។ ម៉ោង៥ជិតភ្លឺខ្ញុំសម្រេចចិត្តធ្វើវាបាន ។ ៣-ការចងព្យួរដាំក្បាលជ្រមុជទឹកពិតជាលំបាក ចងលើកទី១បេះដូងខ្ញុំលោតញាប់ ខ្ញុំថប់ដង្ហើម រកកល់ចង់សន្លប់ ខ្ញុំផ្អាកស្រាយខ្សែចេញ ។ ខ្ញុំលួចភ័យម្នាក់ឯង ខ្ញុំចង់សម្រេចចិត្តបោះបង់ ម្តងៗ តែខ្ញុំមិនអាចក្បត់សន្យាឡើយ ទីបំផុតម៉ោង៥ភ្លឺខ្ញុំសម្រេចចិត្តធ្វើវាបាន ខ្ញុំរំភើបលួចស្រក់ទឹកភ្នែកម្នាក់ឯង ដូចខ្ញុំបានរួចពីស្លាប់ ។
ភាពយន្តនេះខ្ញុំតស៊ូ ខ្ញុំលះបង់ ដើម្បីបម្រើជូនបងប្អូនទស្សនាដើម្បីនាំភាពយន្តជាតិយើង ឆ្ពោះទៅឆាកអន្តរជាតិ ។ ក្តីសង្ឃឹមខ្ញុំថ្ងៃណាមួយ ឆាប់ៗនេះ ភាពយន្តខ្មែរនឹងស្មើមុខស្មើមាត់លើឆាកអន្តរជាតិ ។ ទារុណកម្មខ្មោច ខ្សែភាពយន្តដែលខ្ញុំលះបង់ខ្ពស់»។ លោកហ៊ុយ យ៉ាឡេង ស្នើឲ្យទស្សនិកជនបន្តជួយគាំទ្រភាពយន្តរបស់លោកដ្បិតអ្នកចូលទស្សនានៅមិនទាន់ដល់កម្រិតចង់បាន ព្រោះចំពេលមានរឿង ផ្សេងៗបុកបញ្ចាំងដំណាលគ្នា ។ លោកហ៊ុយ យ៉ាឡេង ជាផលិតករធ្លាប់សាងស្នាដៃរឿង«ខ្មោចដើមចេកជ្វា»និងរឿង«ធ្មប់» ពេលនេះបានសាងរឿងថ្មីមួយទៀត«ទារុណកម្មខ្មោច»៕
ចែករំលែកព័តមាននេះ