ខេត្តកំពង់ឆ្នាំង ៖ ខណៈសល់តែប៉ុន្មានថ្ងៃទៀតប៉ុណ្ណោះ បុណ្យទន្លេនឹងបានចូលមកដល់ ពេលនេះអាជ្ញាធរខេត្តកំពង់ឆ្នាំង បានខិតខំជំរុញការរៀបចំនូវសមិទ្ឋផលនានា ដើម្បីបុណ្យទន្លេទទួលបានជោគជ័យដ៏ត្រចះត្រចង់ ក្នុងនោះក្រៅពីការធ្វើបដា ធ្វើខ្លោងទ្វារ និងសួនច្បារ ជាដើម ថ្ងៃនេះមានការចាប់ផ្តើមដំឡើងស្តង់សម្រាប់ដាក់តាំងលក់ផលិតផលជាបណ្តើរៗហើយ។
នៅចំណុចសួនច្បារវិមានឯករាជ្យ គេឃើញក្រុមកម្មករកំពុង តម្លើងស្តង់លក់ដូរយ៉ាងច្រើនស្អេកស្កះ ចំណែកមុខសាលាខេត្តកំពង់ឆ្នាំង ក្នុងសួនកុមារ មុខមន្ទីរវប្បធម៌និងវិចិត្រសិល្បៈខេត្តឯនោះវិញក៏មានដំឡើងស្តង់ ប្រភេទជាលក្ខណៈ អន្តរជាតិផងដែរ គឺរាប់រយកន្លែង ។ នៅក្នុងបរិវេណទីលានបាល់ ទាត់មុខសាលាខេត្ត គេឃើញមានការរៀបចំឆាកតន្ត្រីយ៉ាងធំ ហើយមានការតម្លើងស្តង់នៅមុខឆាកនោះផងដែរ។
ដោយឡែកនៅសួនច្បារវិមានឯករាជ្យ គេឃើញមានការដាក់បង់សម្រាប់អង្គុយលេងរាប់រយបង់នៅជុំវិញសួនច្បារ ។ ដោយឡែកកន្លែងនាគបាញ់ទឹកក្នុងសួនច្បារខាងលើនេះ ក៏បានក្លាយទៅជាមានទឹកថ្លាមាននាគបាញ់ទឹកយ៉ាងស្រស់ស្អាតផងដែរ ក្នុងឱកាសបុណ្យទន្លេលើកទី៥នេះ ។
លោក សេង សាលី ប្រធានមន្ទីរវប្បធម៌និងវិចិត្រសិល្បៈ ខេត្តកំពង់ឆ្នាំង បានឲ្យដឹងដែរថា បុណ្យទន្លេលើកទី៥ នឹងចាប់ផ្តើមពីថ្ងៃទី១៥ ដល់ថ្ងៃទី ១៧ ខែមិនា ប៉ុន្តែពិធីបើកនឹងធ្វើនៅថ្ងៃទី១៦ មីនា ក្រោមអធិបតីភាពសម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុន រ៉ានីហ៊ុន សែន ។
នៅថ្ងៃទី១៥ មីនា ដែលជាថ្ងៃចាប់ផ្តើមដំបូង មានការដាក់តាំងពិព័រណ៍ លក់ផលិតផលជាច្រើនប្រភេទ ដែលនាំមកពីកន្លែងផ្សេងៗ ក្នុងនោះផលិតផល របស់កសិករខេត្តកំពង់ឆ្នាំង ក៍ត្រូវបានយកមកដាក់តាំងលក់ដែរ ។ ថ្ងៃដំបូងនោះ ក៍មាន ល្បែង របាំ នានា សម្រាប់ទស្សនា កំសាន្ត ។ មានកីឡាជាច្រើនប្រភេទ ដូចជាកីឡាប្រណាំងកង់ កីឡារត់ប្រណាំង បាល់ទាត់និងបាល់ទះ និងនៅទន្លេផ្សារក្រោម កីឡាប្រណាំងហែលទឹកផងដែរ ។
ជាមួយគ្នានេះផងដែរក៏មានការដាក់ឲ្យប្រណាំងទូកង ទូកមួង ជាច្រើនគូ ដែលមកពីបណ្ដាខេត្តនៅជិតកំពង់ឆ្នាំង ដូចជា ពោធិ៍សាត់ បាត់ដំបង និងកំពង់ធំ ។ នៅពេលយប់ មានការសម្ដែងសិល្បៈ និងសម្តែងយ៉េកេ រឿងពុទ្ធិសែននាងកង្រី មានតារាចម្រៀង ច្រៀងនិងសំដែង ផងដែរ ។ ថ្ងៃបន្ទាប់ក៏មិនខុសពីថ្ងៃទីមួយដែរ គ្រាន់តែពេលព្រឹកគឺមានការបើកជាផ្លូវការនៃពិធីបុណ្យទន្លេ ក្រោមអធិបតីភាពរបស់សម្តេចទាំងទ្វេ ។
ចំណែកថ្ងៃទី ៣ដែលជាថ្ងៃបញ្ចប់ ក៏មានពិធីបិទនិងប្រកាសលទ្ធផលផ្សេងៗផងដែរ។
សូមរំលឹកថា កន្លងមក អាជ្ញាធរខេត្តកំពង់ឆ្នាំង ធ្លាប់បានអំពាវនាវដល់ប្រជាពលរដ្ឋដែលមានទីលំនៅជាប់តាមផ្លូវក្នុងក្រុងកំពង់ឆ្នាំង សូមយកចិត្តទុកដាក់សំអាតផ្ទះសំបែង ដាក់ទង់ជាតិ និងតាំងលំអរភ្លើងជាដើម ។ ជាមួយគ្នានេះ អាជ្ញាធរខេត្តក៍បានអំពាវនាវដល់បងប្អូនដែលនៅតាមបណ្តាខេត្តនានា សូមអញ្ជើញមកចូលរួមទស្សនាកំសាន្តពិធីបុណ្យទន្លេនៅខេត្តកំពង់ឆ្នាំងឱ្យបានច្រើនកុះករ ៕
ចែករំលែកព័តមាននេះ