រាជធានីភ្នំពេញ ៖ នៅក្នុងពេលការអភិវឌ្ឍន៍ដីឡូត៍នៅកម្ពុជា កំពុងទទួលបាននូវការគាំទ្រច្រើនពីសំណាក់ពលរដ្ឋមានប្រាក់ចំណូលមធ្យម និងក្រោមមធ្យម ដែលទិញសម្រាប់ទុកសង់ផ្ទះនៅថ្ងៃអនាគតនោះ ការអភិវឌ្ឍន៍ដីឡូត៍នៅកម្ពុជាមួយចំនួន ត្រូវបានគេមើលឃើញថា មិនទាន់ស្របទៅតាមស្ដង់ដារ១០០ភាគរយនៅឡើយទេ ជាពិសេសក្រុមហ៊ុនអភិវឌ្ឍន៍មួយចំនួន ហាក់មិនបានគិតគូរពីបញ្ហានៅពេលអនាគតនោះឡើយ ដូចជាការតប្រព័ន្ធទឹក ភ្លើង ជាពិសេសប្រព័ន្ធលូទឹកនិងបង្ហូរទឹកស្អុយជាដើម ។
អ្នកទិញដីឡូត៍មួយចំនួន បានបង្ហាញពីការខកចិត្ត ដែលក្រុមហ៊ុនអភិវឌ្ឍន៍ មិនបានដាក់ប្រព័ន្ធលូសម្រាប់បង្ហូរទឹកស្អុយពីគេហដ្ឋានត្រឹមត្រូវនោះទេ ដែលប្រឈមនឹងការលិច និងជ្រាបទឹកកខ្វក់ចូលក្នុងផ្ទះនៅពេលអនាគត បើសិនជាមានភ្លៀងធ្លាក់ខ្លាំង ។ ជាពិសេសការជាវដីឡូត៍នៅក្រៅក្រុងសម្រាប់ការលក់បន្ត គឺជាជម្រើសមិនសូវត្រឹមត្រូវនោះទេ ។
លោក លី សិលា វ័យជាង ៣០ ឆ្នាំ ដែលជាអ្នកជាវដីឡូត៍មួយរូបបាននូវបទពិសោធន៍របស់ខ្លួនថា រូបលោកផ្ទាល់បានជាវដីពុះឡូត៍នៅស្រុកអង្គស្នូល ខេត្តកណ្តាល ទំហំ ៥ x ២៧ ម៉ែត្រក្នុងតម្លៃជាង ៤០០០ ដុល្លារ កាលពីឆ្នាំ ២០០៨ តែរយៈជាង១០ឆ្នាំទើបរូបលោករកបានម្ចាស់ថ្មីដែលព្រមទិញក្នុងតម្លៃតែ ៥ ០០០ ដុល្លារ តែប៉ុណ្ណោះ ។ ខណៈបទពិសោធន៍មួយទៀតនោះ គឺសាច់ញាតិរបស់លោក និងមិត្តភ័ក្ត្របានជាវដីឡូ ជិតព្រលានយន្តហោះភ្នំពេញ ហើយបានសង់ផ្ទះរស់នៅ តែអ្វីដែលជាបញ្ហាធ្ងន់ធ្ងរបំផុតនោះ គឺគ្មានប្រព័ន្ធលូមេ ដែលអាចឲ្យម្ចាស់ផ្ទះតភ្ជាប់លូពីក្នុងផ្ទះ មកលួមេធំ បាន ទីបំផុតត្រូវរងការលិចលង់ ។
លោក លី សិលា មានប្រសាសន៍ថា «គុណសម្បត្តិនៃការជាវដីឡូត៍ គឺតម្លៃធូរថ្លៃសម្រាប់អ្នកជីវភាពមធ្យម ក្នុងការស្តង់ផ្ទះសម្រាប់ការរស់នៅ តែគួរតែជាវក្នុងក្រុងភ្នំពេញ ឬជាយក្រុង ។ សម្រាប់អ្នកជាវដីឡូត៍ទុកលក់បន្តវិញ គឺប្រាកដជាកប់លុយដូចរូបខ្ញុំផ្ទាល់ បើសិនជាគាត់ជាវដីឡួត៍នៅឆ្ងាយនិងក្រៅក្រុងភ្នំពេញ ព្រោះពិតជាពិបាកលក់ចេញណាស់ មិនគួរទិញនៅក្រៅក្រុងនោះ» ។ យ៉ាងណាមិញ លោកទទូលស្គាល់ថាមួយរយៈពេលចុងក្រោយនេះ អ្នកអភិវឌ្ឍន៍ដីឡូត៍មួយចំនួន ក៏បានខ្នះខ្នែងសាងសង់បណ្តាញទឹកភ្លើង និងបណ្តាញលូផងដែរ ។
លោក បានបន្តថា «ខ្ញុំចង់ផ្តាំផ្ញើទៅម្ចាស់ដីពុះឡួត៍ផងដែរថា បើសង់បណ្តាញលូ ក៏ត្រូវគិតគូរដល់ការភ្ជាប់បណ្តាញលូពីក្នុងតំបន់ដីឡូត៍ ភ្ជាប់នឹងបណ្តាញលូមេផង បើមិនអញ្ចឹងធ្វើឲ្យអ្នកក្រីក្រដែលជាវដីឡូត៍ទុកសង់ផ្ទះនឹងជួបបញ្ហានាពេលអនាគត» ។ យ៉ាងណាក៏ដោយ ម្ចាស់អាជីវកម្មដីឡូត៍ជាច្រើនបានបញ្ជាក់ថាខ្លួន សុទ្ធតែ គិតគូរដល់ពេលអនាគត ពីការអភិវឌ្ឍន៍ដីឡូត៍ ។
បើតាមលោក ជេ សុន ប្រធានគ្រប់គ្រងក្រុមហ៊ុនវិមានអចលនទ្រព្យ លក់ដីឡូត៍ នៅម្ដុំភ្នំឧដុង្គបានអោយដឹងថា អាជីវកម្មដីឡូត៍ មិនត្រឹមតែពុះដីឡូត៍ហើយលក់ជូនទៅអតិថិជននោះទេ ពោលអ្នកលក់ដីឡូត៍ទាំងអស់គួរតែគិតអោយច្បាស់ ពីបញ្ហានៅពេលអនាគត ។ លោក ជេ សុន មានប្រសាសន៍បញ្ជាក់ថា «ជាការពិតណាស់ កាលពីមុនការពុះដីឡូត៍ មិនបានគិតគូរដល់ចំណុចហ្នឹងនោះទេ គឺគ្រាន់តែពុះដីជាឡូត៍ហើយតបង្គោលភ្លើងចូលទៅក្នុងដីឡូត៍នោះតែប៉ុណ្ណោះ និងមានចាក់ជាផ្លូវចូលទៅក្នុងដីឡូត៍នីមួយៗ ដោយមិនបានគិតពីការដាក់ប្រព័ន្ធលូសម្រាប់បង្ហូរទឹកនៅពេលពលរដ្ឋចាប់ផ្ដើមសង់ផ្ទះស្នាក់រស់នៅនោះទេ » ។
លោកបន្តថា បច្ចុប្បន្ននេះ ការពុះដីឡូត៍លក់ពីសំណាក់អ្នកអភិវឌ្ឍន៍បានកែប្រែច្រើន ក្នុងនោះពួកគេបានគិតគូរយ៉ាងច្បាស់ពីអនាគតរបស់អតិថិជន ក្រោយពេលទិញដីរួច និងត្រៀមសង់ផ្ទះនៅថ្ងៃអនាគត ។ អ្នកអភិវឌ្ឍន៍ដីឡូត៍ បានរៀបចំប្រព័ន្ធលូ ដោយតពីតំបន់ដីឡូត៍របស់គេ ទៅកាន់ប្រឡាយមេណាមួយរបស់រដ្ឋ ដើម្បីបង្ហូរទឹកចេញពីតំបន់ដីឡូត៍ទៅកាន់ប្រឡាយនោះ នៅពេលដែលពលរដ្ឋទៅសង់ផ្ទះរស់នៅ ហើយនឹងមិនព្រួយបារម្ភពីការលិចទឹកទៀតដែរ ។ លោកបន្ថែមថា ការអភិវឌ្ឍន៍ហេដ្ឋា រចនាសម្ព័ន្ធ សម្រាប់គម្រោងដីឡូត៍ហើយនោះការអភិវឌ្ឍន៍ដោយភាពស្របច្បាប់គឺជាកត្តាសំខាន់មួយទៀត ក្នុងការធ្វើអាជីវកម្មដីឡូត៍ ជាក់ស្ដែង ត្រូវផ្ដល់ប្លង់ត្រឹមត្រូវជូនអ្នកទិញ និងមិនត្រូវកឹបកេងចំណេញ ខ្លាំងពេកទៅលើអតិថិជន ។
បើតាមលោក ម៉ាន់ ចន្ទឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានអោយដឹងថា ការអភិវឌ្ឍន៍ដីឡូត៍ ពិតជាបានផ្ដល់សារប្រយោជន៍ជាច្រើនដល់សង្គម និងសេដ្ឋកិច្ចជាតិ ក្នុងនោះវាបានផ្ដល់អោយពលរដ្ឋដែលមានប្រាក់ចំណូលទាប និងមធ្យម ដែលមិនមានលទ្ធភាពផ្ដល់ទិញផ្ទះស្នាក់នៅ និងមិនមានលទ្ធភាពទិញដីបង់ផ្ដាច់ ពីព្រោះអាជីវកម្មដីឡូត៍ជាច្រើននៅក្នុងប្រទេសកម្ពុជាបានផ្ដល់នូវការបង់រំលស់ចំពោះអតិថិជន ជាដំណាក់កាលនិងជាប្រចាំខែ ។ លោកបន្តថា អត្ថប្រយោជន៍ផ្សេងនោះទៀតនោះ រដ្ឋក៏នឹងទទួលបានចំណូលបន្ថែមពីការបង់ពន្ធផ្ទេរកម្មសិទ្ធពីមួយទៅមួយ ពីការទិញដីឡូត៍របស់ពលរដ្ឋ ។មួយទៀតនោះ ការពុះដីឡូត៍ក៏នឹងធ្វើអោយតម្លៃដីធ្លី បានកើនឡើងជាបន្តបន្ទាប់ដែរ ជាក់ស្ដែង ដីធ្លីនៅតំបន់មួយចំនួន នៅមានកម្រិតទាបមួយនៅឡើយ នៅពេលដែលសកម្មភាពពុះដីឡូត៍មិនទាន់ទៅដល់ តែនៅពេលសកម្មភាពនោះបានទៅដល់តំបន់ណាមួយហើយ វាបានធ្វើអោយតម្លៃដីធ្លីបានកើនដល់ខ្ពស់ពីការស្មាន ។
លោកបន្ថែមថា បច្ចុប្បន្ន សកម្មភាពពុះដីឡូត៍បានកើនឡើងមិនត្រឹមតែនៅជាយរាជធានីភ្នំពេញ ប៉ុណ្ណោះទេ តែវាបានរាលដាលទៅដល់តំបន់មួយចំនួនទៀត នៅតាមបណ្ដាខេត្តនានាផងដែរ ដូចជាខេត្តព្រះសីហនុ ខេត្តកំពត ខេត្តត្បូងឃ្មុំនិងបណ្ដាដែលមានសក្ដានុពលអភិវឌ្ឍន៍ជាច្រើនទៀត ។ ប៉ុន្តែការពុះដីឡូត៍នាពេលបច្ចុប្បន្ននេះ ត្រូវបានគេមើលឃើញថាមានភាពខុសប្លែកពីមុន ដោយសារទំហំត្រឹមតែ៥ម៉ែត្រ x ២០ម៉ែត្រ ខណៈពីមុនវាមានទំហំធំៗជាងនេះ ៕
ចែករំលែកព័តមាននេះ