រាជធានីភ្នំពេញ ៖ បុរសម្នាក់ជួបគ្រោះថ្នាក់ចរាចរណ៍បណ្តាលឱ្យបោកក្បាលរងរបួសធ្ងន់រហូតដល់បែកខួរ និងលៀនគ្រាប់ភ្នែកមួយចំហៀង ខណៈជនរងគ្រោះជិះម៉ូតូបុកជាមួយរថយន្តមិនចាំម៉ាក ហើយត្រូវបានលោកគ្រូពេទ្យប្រាប់ថា អស់សង្ឃឹមទៅហើយ ប៉ុន្តែសាច់ញាតិមិនអស់ចិត្តបានអោយរថយន្តពេទ្យជួយដឹកយកទៅសង្គ្រោះនៅមន្ទីពេទ្យកាល់ម៉ែត្រ ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីម៉ោង១១និង៣០នាទីយប់ថ្ងៃទី៩
មីនា ២០១៩ នៅលើផ្លូវជាតិលេខ៤ភូមិ ត្រពាំងទួល សង្កាត់កំបូលខណ្ឌពោធិ៍សែនជ័យ។
បុរសរងគ្រោះខាងលើឈ្មោះ ស៊ុង គឹមស្រៀង អាយុ៣៩ ឆ្នាំ ស្នាក់នៅភូមិទែន ឃុំដើមឮស ស្រុកកណ្តាលស្ទឹង ខេត្តកណ្តាល ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០០៥ ពាក់ស្លាកលេខ
កណ្តាល ១C-៥៣៧២ ។
តាមប្រភពព័ត៌មានពីកន្លែងកើតហេតុបានឱ្យដឹងថា ក្នុងករណីគ្រោះថ្នាក់ចរាចរណ៍ខាងលើមិនមានសាក្សីបញ្ជាក់ថា ជនរងគ្រោះខាងលើជិះម៉ូតូទៅបុកជាមួយរថយន្តម៉ាកអ្វីឡើយ គ្រាន់តែឃើញជនរងគ្រោះរងរបួសយ៉ាងធ្ងន់ធ្ងរដេកនៅលើផ្លូវ ហើយត្រូវបានអ្នកដំណើរឆ្លងកាត់ប្រទះឃើញក៏រាយការណ៍ប្រាប់សមត្ថកិច្ចមូលដ្ឋានអោយចុះទៅពិនិត្យកន្លែងកើតហេតុ។
ប្រភពដដែលបានបន្តថា ពេលសមត្ថកិច្ចចុះទៅដល់កន្លែងកើតហេតុ ឃើញតែម៉ូតូជនរងគ្រោះខ្ទាតទៅចិញ្ចើមផ្លូវ ចំណែកជនរងគ្រោះបោកក្បាលរងរបួសធ្ងន់រហូតដល់បែកខួរ និងលៀនគ្រាប់ភ្នែកខាងឆ្វេងចេញមកក្រៅ ហើយត្រូវបានលោកគ្រូពេទ្យដែលចេញពីរថយន្តទៅសង្គ្រោះបានប្រាប់ថា អស់សង្ឃឹមទៅហើយ មិនអាចសង្គ្រោះបានទេ ប៉ុន្តែដោយសារសាច់ញាតិមិនអស់ចិត្តក៏ជំរុញអោយរថយន្តពេទ្យជួយដឹកយកទៅសង្គ្រោះនៅមន្ទីពេទ្យកាល់ម៉ែត្រ ហើយអ្នកបើករថយន្តសង្គ្រោះក៏បើកដឹកជនរងគ្រោះតាមសំណូមពររបស់ក្រុមគ្រួសារសាច់ញាតិតែម្តង ៕
ចែករំលែកព័តមាននេះ