ខេត្តកណ្តាល ៖ គួរអោយខ្លោចចិត្តណាស់កុមារីវ័យ០៩ឆ្នាំម្នាក់បានរអិលធ្លាក់ចូលម៉ាស៊ីនកិនដី បណ្តាលឱ្យដាច់ដៃស្តាំម្ខាងត្រឹមក្លៀក ខណៈដែលកំពុងធ្វើការបញ្ចូលដីទៅក្នុងម៉ាស៊ីនជាមួយឪពុកម្តាយ ដែលហេតុការណ៍ដ៏រន្ធត់នេះបានកើតឡើង កាលពីវេលាម៉ោង០៩និង៣០នាទីព្រឹកថ្ងៃទី០៩ ខែមីនា ឆ្នាំ២០១៩ នៅក្នុងសិប្បកម្មឡឥដ្ឋមួយ ស្ថិតក្នុងភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ខេត្តកណ្តាល ដែលមានម្ចាស់ឈ្មោះ លាង ស្រ៊ុន ។
ចំណែកឯកុមារីរងគ្រោះឈ្មោះ ឆេង ស្រីភក្ត្រ័ អាយុ៩ឆ្នាំ ស្នាក់នៅ និងបម្រើការងារក្នុងសិប្បកម្មខាងលើជាមួយឪពុកឈ្មោះ ឆេង ប៊ុនហំ អាយុ៣៧ឆ្នាំ និងម្តាយឈ្មោះ ឃឹម ចាន់ណា អាយុ៣៣ឆ្នាំ ហើយគ្រួសារនេះបានស្នាក់នៅ និងធ្វើការក្នុងសិប្បកម្មនេះរយៈពេល៦ឆ្នាំមកហើយ ។
សាសាក្សីបានអោយដឹងថា នៅមុនពេលកើតហេតុឪពុកម្តាយជាអ្នកដាក់ដីចូលក្នុងម៉ាស៊ីន ចំណែកឯកូនស្រីរងគ្រោះជាអ្នកកាត់ឥដ្ឋចេញពីម៉ាស៊ីន និងលើករៀបឥដ្ឋដាក់លើរទេះ ហើយនៅពេលដែលកំពុងធ្វើការស្រាប់តែកុមារីរងគ្រោះបានជ្រុលដៃចូលទៅក្នុងម៉ាស៊ីន បណ្តាលឱ្យដាច់ដៃស្តាំម្ខាងត្រឹមក្លៀក ហើយឪពុកម្តាយក៏បញ្ជូនទៅសង្គ្រោះនៅមន្ទីរពេទ្យបង្អែកស្រុក តែដោយសាររបួសធ្ងន់ធ្ងរពេកក៏បញ្ជូនបន្តទៅរាជធានីភ្នំពេញ ។
លោកលាង ស៊ុន ដែលជាមេការឡឥដ្ឋខាងលើបានទទួលស្គាល់ថា គ្រួសារកុមារីរងគ្រោះពិតជាបានធ្វើការនៅក្នុងសិប្បកម្មរបស់លោកជាង៦ឆ្នាំមកហើយមែន ហើយលោកក៏តែងតែបានដាស់តឿនឱ្យមានការប្រុងប្រយ័ត្ន និងប្រាប់កុំឱ្យក្មេងអាយុក្រោម១៨ឆ្នាំធ្វើការដែរ ប៉ុន្តែឪពុកម្តាយក្មេងស្រីរងគ្រោះចេះតែឆ្លើយថា មិនអីៗក៏ចេះតែឱ្យធ្វើទៅ ហើយក្រោយពេលកើតហេតុលោកបានឧបត្ថម្ភប្រាក់ចំនួន៥០០ដុល្លារ និងធានាចេញថ្លៃព្យាបាលរហូតជាសះស្បើយ ។
ចំណែកឯលោកធុល នាង ប្រធានមន្ទីរការងារខេត្តកណ្តាលបានប្រាប់តាមទូរស័ព្ទ ករណីនេះលោកបានទទួលព័ត៌មានហើយ ហើយក៏បានបញ្ជូនមន្ត្រីឱ្យចុះទៅធ្វើការពិនិត្យស្រាវជ្រាវហើយដែរ ដែលកំពុងរង់ចាំរបាយការណ៍ពីមន្ត្រី ដើម្បីរកឱ្យឃើញថា តើកុមារីដែលរងគ្រោះនោះបម្រើការងារធ្ងន់ធ្ងរ ឬគ្រាន់តែស្នាក់នៅជាមួយឪពុកម្តាយក្នុងសប្បកម្មខាងលើទើបយើងអាចអនុវត្តវិធានការច្បាប់បាន ។
គួរបញ្ជាក់ដែរថា យើងតាមច្បាប់ការងារ គឺមិនអនុញ្ញាតឱ្យកុមារអាយុក្រោម១៨ឆ្នាំបម្រើការងារនៅតាមបណ្តារោងចក្រ សហគ្រាស ឬសិប្បកម្មនានាដាច់ខាត ពិសេសនៅតាមសិប្បកម្មឡឥដ្ឋតែម្តង ប៉ុន្តែជារើយៗ នៅតែមានកុមាររងគ្រោះដាច់ដៃ ជើង ក្លាយជាក្មេងពិការ ដោយសារគ្រោះថ្នាក់ក្នុងពេលបំពេញការងារក្នុងសប្បកម្មឡឥដ្ឋ ៕
ចែករំលែកព័តមាននេះ