រាជធានីភ្នំពេញ ៖ បុរសជាអ្នកលក់ខោអាវតាមចិញ្ចើមផ្លូវម្នាក់រងការចោទប្រកាន់ពីស្ត្រីម្នាក់ថាបានដោះយកខ្សែកពីកូនប្រុសរបស់គាត់ដែលមានអាយុ៩ខែ គ្រាដែលស្ត្រីម្នាក់នោះពរកូនទៅរកទិញខោអាវ ហើយឱ្យកូនទៅបុរសជាអ្នកលក់ជួយពរ លុះមួយសន្ទុះ ពេលស្ត្រីម្នាក់នោះយកកូនមកពរវិញស្រាប់តែបាត់ខ្សែក ទើបធ្វើឱ្យអ្នកទាំង២ជជែកទាញយកហេតុផលរៀងៗខ្លួនមិនដាច់ស្រេច ក៏នាំគ្នាទៅរកប៉ុស្តិ៍ប៉ូលិសដើម្បីកាត់សេចក្តី ។
ហេតុការណ៍ខាងលើនេះបានកើតឡើងកាលពីវេលាម៉ោង៦និង៤០នាទីយប់ថ្ងៃទី៩ ខែមីនា ឆ្នាំ២០១៩ ស្ថិតតាមផ្លូវបេតុង ភូមិត្រពាំងជ្រៃ សង្កាត់កាកាប២ ខណ្ឌពោធិសែនជ័យ ។
បុរសដែលរងការចោទប្រកាន់ខាងលើឈ្មោះ ប៊ុន ក្រៀម អាយុ៤១ឆ្នាំ មុខរបរលក់ខោអាវតាមផ្លូវ ស្នាក់នៅភូមិព្រៃទា សង្កាត់ចោមចៅ៣ ចំណែកស្ត្រីជាដើមបណ្តឹងឈ្មោះ លឹម គឹមសេង អាយុ៣៨ឆ្នាំ មុខរបរលក់ពូក ខ្នើយ ស្នាក់នៅភូមិតាភេម សង្កាត់កំបូល ខណ្ឌពោធិសែនជ័យ ។ រីឯខ្សែកដែលស្ត្រីខាងលើអះអាងថាបាត់នោះជាខ្សែកប្លាទីនទឹក៧ ទម្ងន់ជិត៤ជី ។
តាមប្រភពពីស្ត្រីជាដើមបណ្តឹងបានអះអាងថា មុនកើតហេតុ ខ្សែករបស់គាត់បានពាក់ឱ្យកូនប្រុសអាយុ៩ខែ ហើយគាត់បានដើរទៅរកទិញខោអាវកីឡាសម្រាប់កូននៅកន្លែងបុរសខាងលើ ដោយរើសបណ្តើរ អ្នកលក់យកអាវមកពាក់លឱ្យកូនប្រុសរបស់គាត់បណ្តើរ តែមិនបានត្រូវចិត្តនោះទេ ហើយគាត់ក៏ឱ្យកូនទៅអ្នកលក់ជួយពរ រួចគាត់បន្តរើសខោអាវទៀត ។ លុះមួយសន្ទុះ ក្រោយយកកូនមកវិញស្រាប់តែបាត់ខ្សែក ទើបឆោឡោ គ្មានអ្នកណាក្រៅពីអ្នកលក់ដែលពរកូនរបស់គាត់នោះទេជាអ្នកដោះយក និងបណ្តោះទៅឱ្យអ្នកផ្សេង ។
តាមប្រភពពីបុរសជាចុងចោទវិញបាននិយាយថា គាត់មិនបានដឹងពិតមែន ហើយក៏គ្មានចេតនាប្រព្រឹត្តបែបនេះដែរ នៅកន្លែងលក់ មានតែអ្នកលក់ និងអ្នកទិញ ហេតុអ្វីបានជាចោទគាត់បែបនេះទៅវិញ ។
ក្រោយពីផ្ទុះរឿងថាបាត់ខ្សែក ភាគីទាំង២ជជែក និងអះអាងរៀងៗខ្លួនមិនដាច់ស្រេច មានតែនាំគ្នាទៅប៉ុស្តិ៍ប៉ូលិសដើម្បីឲ្យសមត្ថកិច្ចជួយកាត់ក្តីរឿងខាងលើនេះ ។
ចែករំលែកព័តមាននេះ