រាជធានីភ្នំពេញ ៖ បុរសម្នាក់សង្ស័យជាជនជាតិវៀតណាមជិះម៉ូតូវ៉េវមួយគ្រឿងត្រូវរថយន្តដឹកទឹកកកបុកអូសជាង៣០ម៉ែត្រ បណ្តាលឱ្យអ្នកបើកបរម៉ូតូបានស្លាប់ ចំណែកម៉ូតូបានបាក់ជា២ខ្ទេច ដែលហេតុការណ៍នេះបានកើតឡើងកាលពីវេលាម៉ោង១០និង៤០នាទីយប់ថ្ងៃទី៩ ខែ មីនា ឆ្នាំ ២០១៩ នៅចំណុចគ្លីនិកដុកទ័រហ្វាមីលីពិនិត្យជំងឺទូទៅ ស្ថិតនៅតាមផ្លូវ៣៦៩ ក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ។
ជនរងគ្រោះដែលស្លាប់មិនត្រូវបានស្គាល់អត្តសញ្ញាណ (តែគេសង្ស័យថាជាជនជាតិវៀតណាម) ជាអ្នកបើកបរម៉ូតូមួយគ្រឿងម៉ាកវ៉េវ ពណ៌ខ្មៅលាយក្រហម ពាក់ស្លាកលេខ 67 G1-082.29 (ស្លាកលេខវៀតណាម) ។
ចំណែករថយន្តដឹកទឹកកក ពណ៌ខៀវ ពាក់ស្លាកលេខ ព្រៃវែង ២A-០៧៦១ បើកបរដោយឈ្មោះ វ័ន រឿន ភេទប្រុស អាយុ៤០ឆ្នាំ ស្នាក់នៅក្រុងតាខ្មៅ ខេត្តកណ្តាល ត្រូូវសមត្ថកិច្ចចាប់ឃាត់ខ្លួន ។
ប្រភពព័ត៌មានពីសមត្ថកិច្ចនគរបាលព្រែកថ្មីបានអោយដឹងថា មុនពេលកើតហេតុ កម្លាំងនគរបាលល្បាតក្នុងមូលដ្ឋានបានមកដល់ចំណុចកើតហេតុខាងលើឃើញរថយន្តបង្កជារថយន្តដឹកទឹកកក បើកបរតាមផ្លូវ៣៦៩ ក្នុងទិសដៅពីជើងទៅត្បូង រេចង្កូតទៅខាងឆ្វេងដៃជ្រុលទៅបុកបុរសម្នាក់កំពុងបើកបរម៉ូតូម៉ាកវ៉េវ ក្នុងទិសដៅបញ្ច្រាសគ្នាយ៉ាងពេញទំហឹង បណ្ដាលអោយអ្នកបើកបរម៉ូតូស្លាប់ភ្លាមនៅកន្លែងកើតហេតុ ចំណែកម៉ូតូកៀបជាប់នឹងរថយន្តនៅខាងមុខ ។ ចំណែកបុរសជាអ្នកបើករថយន្តត្រូវបានសមត្ថកិច្ចនាំយកទៅរស្នាក់ប៉ុស្តិ៍ជាបណ្ដោះអាសន្ន ចៀសវៀងក្រុមគ្រួសារជនរងគ្រោះ ជាពិសេសប្រជាពលរដ្ឋទ្រាំមិនបានបង្កជាហិង្សាវាយតប់ ។
សមត្ថកិច្ចបន្តថា តាមប្រភពពីអ្នកបើកបររថយន្តបង្កបានឱ្យដឹងថា មុនពេលកើតហេតុ គាត់បើកបររថយន្តពីក្រុងតាខ្មៅគោលបំណងទៅដេប៉ូនៅម្ដុំតសង្កាត់ព្រែកប្រា ខណ្ឌច្បារអំពៅ ដើម្បីយកទឹកកកអនាម័យ និងទឹកកកដើមយកទៅលក់បន្ត តែមុននឹងបើករថយន្ត គាត់បានផឹកស្រាបៀរអស់៣ទៅ៤កំប៉ុងដែរ ប៉ុន្តែមិនស្រវឹងនោះទេ អាចបើកបររថយន្តបាន លុះមកដល់ចំណុចកើតហេតុស្រាប់តែមានបុរសម្នាក់បើកបរម៉ូតូក្នុងទិសដៅបញ្ច្រាសជាមួយនឹងរថយន្តរបស់គាត់ ។
ប្រភពដដែលបានបន្តថា ពេលកំពុងបើកបរម៉ូតូសុខៗមិនដឹងជាមូលហេតុអ្វី បានជាបត់ម៉ូតូត្រឡប់ក្រោយទើបគាត់ជាន់ហ្វ្រាំងបន្ថយល្បឿនមិនទាន់ក៏ជ្រុលទៅបុកម៉ូតូនោះអូសជាង៣០ម៉ែត្រ បណ្ដាលអោយអ្នកបើកបរម៉ូតូស្លាប់នៅនឹងកន្លែងកើតហេតុ រីឯម៉ូតូបានបាក់ជា២ ចំណែករថយន្តដឹកទឹកករងការខូចខាតផ្នែកខាងមុខ ។
ក្រោយកើតហេតុ សមត្ថកិច្ចបានប្រគល់អោយការិយាល័យនគរបាលចរាចរណ៍ស្នងការរាជធានីភ្នំពេញនាំយកបុរសជាអ្នកបើករថយន្តបង្ក ព្រមទាំងរថយន្តបង្ក និងម៉ូតូជនរងគ្រោះយកទៅរក្សាទុកជាបណ្ដោះ
អាសន្ន ចំណែកសពជនរងគ្រោះត្រូវបានសមត្ថកិច្ចដឹកយកទៅតម្កល់នៅវត្តទឹកថ្លា រង់ចាំស្វែងរកក្រុមគ្រួសារសាច់ញាតិជាក្រោយទៀត ៕
ចែករំលែកព័តមាននេះ