ខេត្តប៉ៃលិន ៖ សេចក្តីរាយការណ៍ឱ្យដឹងថា ក្មេងប្រុសអាយុ៧ឆ្នាំម្នាក់បានស្លាប់ បន្ទាប់ពីក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្ត ដោយសារត្រូវរថយន្តបុក កាលពីវេលាម៉ោង១១ និង១០នាទីព្រឹក ថ្ងៃទី០៩ មីនា នេះ ស្ថិតនៅចំណុចផ្លូវលំ ក្នុងភូមិកូនដំរី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
អ្វីគួរឱ្យសង្វេគនោះ ខណៈឪពុកម្តាយទើបតែផ្ញើនៅយាយ រួចនាំគ្នាចេញទៅធ្វើការនៅប្រទេសថៃតែបន្តិចប៉ុណ្ណោះ។
សេចក្តីរាយការណ៍បន្តថា បុរសម្នាក់ជាបើកបររថយន្ត ត្រូវឃាត់ខ្លួនមានឈ្មោះ សេត សើ អាយុ៤៧ឆ្នាំ រស់នៅភូមិតាំងយូ ឃុំអូរដា ស្រុកកំរៀង ខេត្តបាត់ដំបង បើករថយន្តម៉ាកកាមរីគូទហើម ពណ៌ខ្មៅ ពាក់ស្លាកលេខ ភ្នំពេញ 2B-11 88 ។ រីឯក្មេងរងគ្រោះឈ្មោះ ពាវ លាប ភេទប្រុស អាយុ៧ឆ្នាំ ស្លាប់ពេលបញ្ជូនទៅមន្ទីរពេទ្យបង្អែកខេត្ត រស់នៅភូមិកូនដំរី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
លោកបន្តថា មុនពេលកើតហេតុ គេឃើញរថយន្តខាងលើ ក្នុងពេលដែលរថយន្តមានទិសដៅពីត្បូងទៅជើង ស្របពេលនោះ ក៏មានរថយន្តផ្សេងៗទៀតបើកលើដងផ្លូវនោះដែរ ហើយដោយសារតែផ្លូវលំហុយខ្លាំង មើលឃើញមិនច្បាស់ផង ក៏ស្រាប់តែក្មេងតូចនេះ បានដើរឡើងទៅលើផ្លូវចំពេលរថយន្តបើកមក ក៏បុក បណ្តាលឱ្យរងរបួសធ្ងន់ធ្ងរ ។
ភ្លាមៗនោះ ម្ចាស់រថយន្ត និងសាច់ញាតិក្មេងតូច បានប្រញាប់ដឹកទៅសង្គ្រោះនៅមន្ទីរពេទ្យបង្អែកខេត្ត តែដោយសារសភាពរបួសធ្ងន់ធ្ងរពេក គ្រូពេទ្យមិនអាចជួយសង្គ្រោះបាន ក៏បានបាត់បង់ជីវិតតែម្តង ។
ចំណែកឯម្តាយក្មេងរងគ្រោះ កំពុងធ្វើដំណើរទៅប្រទេសថៃ មិនទាន់បានដល់កន្លែងធ្វើការស្រួលបួលផង លុះពេលឮដំណឹងថា កូនរបស់ខ្លួនត្រូវរថយន្តបុកស្លាប់ ពួកគេត្រឡប់មកធ្វើបុណ្យសពកូនវិញ ។ បច្ចុប្បន្ននគរបាលកំពុងសួរនាំម្ចាស់រថយន្ត ដើម្បីចាត់ការតាមច្បាប់ ។
ចែករំលែកព័តមាននេះ