ខេត្តកណ្ដាល ៖ សពនារីម្នាក់ដែលត្រូវបានប្រជាពលរដ្ឋប្រទះឃើញនៅក្នុងប្រឡាយព្រំដីក្នុងព្រៃមួយកន្លែង ហើយសង្ស័យជាករណីឃាតកម្មនោះ មកព្រឹកថ្ងៃទី០៩ មីនា សមត្ថកិច្ចនៅកំពុងស្រាវជ្រាវនិងស៊ើបអង្កេតយ៉ាងចិត្តដាក់បំផុត ដើម្បីរកមូលហេតុពិត ហើយបន្តតាមចាប់ជនដៃដល់ផងដែរ ដែលការប្រទះ ឃើញនិងបង្កការភ្ញាក់ផ្អើលខ្លាំង នៅរសៀលថ្ងៃទី៨ មីនា ស្ថិតនៅភូមិក្រោលគោ ឃុំសំបួរមាស ស្រុកមុខកំពូល ខេត្តកណ្តាល ។
ប្រភពមន្ត្រីនគរបាលស្រុកមុខកំពូលបានឲ្យដឹងថា សពនារីរងគ្រោះខាងលើ ត្រូវបានស្គាល់មានឈ្មោះ នៅ ស្រីលាប អាយុ១៨ឆ្នាំ មានទីលំនៅភូមិព្រែកឬស ឃុំសំបួរមាស ស្រុកមុខកំពូល ។ ប្រភពដដែលបន្តថា មុនពេលកើតហេតុនោះ មានប្រជាពលរដ្ឋឈ្មោះ ពឿន ភេទប្រុស អាយុ៣៥ឆ្នាំ ជាកសិករ រស់នៅភូមិក្រោលគោ ឃុំសំបួរមាស គាត់ជិះម៉ូតូមករាយមង នៅចំណុចបឹងក្របីស្លាប់ ។ ខណៈជិះមកដល់មាត់បឹងមិនឃើញទូកនៅមាត់បឹង ក៏ជិះម៉ូតូត្រឡប់មកវិញ ស្រាប់តែឃើញកាតាបខ្មៅមួយនៅក្បែរផ្លូវ ក៏ឈប់ចុះមកមើល ស្រាប់តែឃើញសពនាង ក្នុងប្រឡាយព្រំដីក្នុងព្រៃ ។
ភ្លាមនោះ ក៏បង្កការភ្ញាក់ផ្អើលដល់ប្រជាពលរដ្ឋជិតខាង និងនគរបាលជំនាញ ចុះកន្លែងកើតហេតុធ្វើការកោសល្យវិច្ច័យ។
ចែករំលែកព័តមាននេះ