រាជធានីភ្នំពេញ ៖ មនុស្សជំនិតរបស់លោក កឹម សុខា អតីតប្រធានគណបក្សសង្គ្រោះជាតិបានស្នើឲ្យឈប់ប្រកាន់និន្នាការនយោបាយលាបពណ៌ មូលបង្កាច់ ជេរប្រមាថ ឬប្រកាន់បក្សនេះបក្សនោះ ។…
រាជធានីភ្នំពេញ ៖ មនុស្សជំនិតរបស់លោក កឹម សុខា អតីតប្រធានគណបក្សសង្គ្រោះជាតិបានស្នើឲ្យឈប់ប្រកាន់និន្នាការនយោបាយលាបពណ៌ មូលបង្កាច់ ជេរប្រមាថ ឬប្រកាន់បក្សនេះបក្សនោះ ។ លោកយ៉ែម បុញ្ញាឬទ្ធិ អតីតអ្នកនាំពាក្យគណបក្សសង្គ្រោះជាតិបានលើកឡើងបណ្តាញសង្គមយ៉ាងដូច្នេះថា «យើងបានកំណត់គោលដៅច្បាស់លាស់ក្នុងសកម្មភាពនយោបាយ តាមមាគ៌ាអហិង្សាផ្សះផ្សាជាតិ គឺដើម្បីផលប្រយោជន៍ប្រជាពលរដ្ឋ និងប្រទេសជាតិទាំងលទ្ធិប្រជាធិបតេយ្យសេរីពហុបក្សទាំងការគោរពសិទ្ធិមនុស្សដែលនាំមកនូវសុខសន្តិភាព និងការអភិវឌ្ឍជាតិមាតុភូមិប្រកបដោយចីរភាព» ។
លោកបន្តថា ការផ្សះផ្សាជាតិ គឺជាមធ្យោបាយតែមួយគត់ ដើម្បីបញ្ឈប់បញ្ចប់នូវការបែកបាក់ជាតិការរើសអើង ការជេរប្រមាថ លាបពណ៌ មួលបង្កាច់ ញុះញង់រវាងខ្មែរ និងខ្មែរ ក្នុងសង្គម ដោយចាប់ផ្ដើមពីខ្លួនយើងផ្ទាល់គ្រប់រូបដែលជាកោសិកានៃសង្គមជាតិខ្មែរយើង ។ ពេលនោះប្រជាពលរដ្ឋខ្មែរគ្រប់រូបគ្រប់និន្នាការ អាចរួមរស់ដោយមានស្នាមញញឹមដ៏មានន័យពីទឹកចិត្តស្មោះសរ ដូចរូបនៅប្រាសាទព្រហ្មបាយ័ននៅក្នុងមាតុភូមិកម្ពុជា យើងឡើងវិញដូចសម័យមហានគរ ។
លោកបានគូសបញ្ជាក់ថា« អ្នករងគ្រោះឈឺចាប់ថ្ងៃនេះនឹងមិនធ្វើឱ្យមានអ្នករងគ្រោះឈឺចាប់នៅថ្ងៃស្អែក!» ដោយយើងឈប់ប្រកាន់និន្នាការគ្នាស្លាប់រស់ លាបពណ៌ មួលបង្កាច់ ជេរប្រមាថ ចងកំហឹងរវាងខ្មែរនឹងខ្មែរ ចាក់ដោតឆ្កឹះឆ្កៀល ហើយងាកមកកសាងទំនុកទុកចិត្ត គោរពផ្ដល់តម្លៃគ្នាទៅវិញទៅមករួមគ្នាការពារ កសាងអភិវឌ្ឍ៍សង្គមជាតិខែ្មរយើងវិញ» ។ លោកបានបន្ថែមថា យើងនាំគ្នាព្យាយាមបន្តរៀបចំសង្គមយើងឱ្យខាងតែបាននូវសង្គមជឿនលឿនថ្លៃថ្នូរមួយសម្រាប់យើងគ្រួសារយើង និងសង្គមជាតិយើង ។ លោកក៏បានលើកឡើងថា ការសាបព្រោះនូវការលាបពណ៌ ជេរប្រមាថ មួលបង្កាច់ ញុះញង់ បំបែកបំបាក់សង្គម បំពុលសង្គមខ្មែរ យកទៅចាក់ចូលទៅក្នុងសង្គមយើងនាពេលនេះនាំឱ្យមានការរើសអើងសង្គមបែកបាក់គ្មានទីបញ្ចប់ ។
លោកបានគូសបញ្ជាក់បន្ថែមថា «យើងត្រូវហ៊ានថាទេ ហើយជាមួយនឹងសច្ចភាពយើងនាំគ្នាកាត់បន្ថយទង្វើនោះបន្តិចម្ដងៗ ដោយអំណត់អត់ធ្មត់ តស៊ូ បន្តព្យាយាមផ្សះផ្សាចិត្តផ្សះផ្សាជាតិយើងដែលបាន និងកំពុងតែជួបប្រទះបញ្ហានេះ» ។ ចំណែកលោក មុត ចន្ថា អតីតអ្នកជំនិត និងជានាយកខុទ្ទកាល័យលោក កឹម សុខា បានលើកឡើងថា យ៉ាងដូច្នេះថា លោកកឹម សុខា នៅតែប្រកាន់គោលការណ៍ខ្មែរតែមួយ ផ្សះផ្សារ-បង្រួបបង្រួមជាតិ អហិង្សា មិនចាត់ទុកខ្មែរណាជាសត្រូវ ហើយ និងមិនគុំគួនមិនសងសឹកខ្មែរ ។
លោកបញ្ជាក់ថា «ថ្មីៗនេះ ឯកឧត្តម កឹម សុខា បានបញ្ជាក់ជំហរគាំទ្រ និងស្វាគមន៍អ្វីក៏ដោយឱ្យតែមានដំណោះស្រាយគឺ ទី១-ដើម្បីផលប្រយោជន៍ប្រទេសជាតិ ទី២-ដើម្បីលទ្ធិប្រជាធិបតេយ្យ ទី៣-ដើម្បីសិទ្ធិមនុស្ស ។ ក្នុងន័យនេះអ្នកនយោបាយពុំគួរប្រកាន់យកចរិត«ដុតឲ្យខ្លោច រោលឲ្យឆៅ » ទេ ។ ខ្មែររស់ក្នុងសង្គមខ្មែរតែមួយដូច្នេះខ្មែរអាចនិយាយជាមួយខ្មែរ ដើម្បីផលប្រយោជន៍រួមរបស់សង្គមខ្មែរទាំងមូល» ។
សូមជម្រាបបញ្ជាក់ថា ការលើកឡើងរបស់មនុស្សជំនិតរបស់លោកកឹម សុខានេះ បន្ទាប់ពីក្រុមលោកសម រង្ស៊ីដែលនៅក្រៅប្រទេសបានកំពុងវាយប្រហារ ក្រុមកឹម សុខា កំពុងចាញ់បោកសម្តេចតេជោហ៊ុនសែន ។ បើតាមប្រពន្ធក្រៅផ្លូវការបានឲ្យដឹងក្រុមលោកកឹម សុខា អាចនឹងត្រូវបានសុំសិទ្ធិនយោបាយច្រើន ជាងលោកក្រុមលោកសម រង្ស៊ី ៕
ចែករំលែកព័តមាននេះ