រាជធានីភ្នំពេញ ៖ រថយន្តកុងតឺន័រមួយគ្រឿង សង្ស័យអ្នកបើកបរងងុយដេកបានបើកធ្លាក់ចេញពីផ្លូវចូលប្រឡាយអត់មានទឹក បណ្តាលឲ្យក្រឡាប់កៀបជាប់អ្នកបើកបរម្នាក់ និងអ្នករួមដំណើរម្នាក់រងរបួសធ្ងន់។
ហេតុការណ៍គ្រោះថ្នាក់ចរាចរណ៍បង្កឡើងដោយខ្លួនឯងនេះបានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី៨ ខែមីនាឆ្នាំ២០១៩ នៅតាមបណ្ដោយផ្លូវមហាវិថីឈ្នះឈ្នះ (ផ្លូវទំនប់កប់ស្រូវ) ដែលស្ថិតក្នុងភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ ។
រថយន្តកុងតឺន័រខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣B-៤៨៧៩ បើកបរដោយបុរសម្នាក់មិនស្គាល់អត្តសញ្ញាណ បានរងរបួសធ្ងន់ និងស្ត្រីម្នាក់ជាអ្នករួមដំណើរមិនស្គាល់អត្តសញ្ញាណ បានរងរបួសធ្ងន់សន្លប់ស្តូកស្តឹង ។
តាមប្រភពព័ត៌មានពីសមត្ថកិច្ចបានអោយដឹងថា រថយន្ដកុងតឺន័រខាងលើជិះគ្នា២នាក់ ធ្វើដំណើរក្នុងទិសដៅពីត្បូងទៅជើង ក្នុងល្បឿនយ៉ាងលឿន លុះមកដល់ចំណុចកើតហេតុខាងលើ សង្ស័យអ្នកបើកបរងងុយដេក បានបើករេចង្កូតទៅផ្នែកខាងស្ដាំ ធ្វើឲ្យធ្លាក់ចេញពីផ្លូវចូលប្រឡាយអត់ទឹក បណ្តាលឲ្យរថយន្តកុងតឺន័រខាងលើក្រឡាប់ផ្ងារជើងឡើងលើកៀបជាប់អ្នកបើកបរ និងស្ត្រីជាអ្នករួមដំណើរម្នាក់ក្នុងកាប៊ីនរងរបួសធ្ងន់ទាំង២នាក់តែម្តង ។
ប្រភពដដែលបានបន្តថា ក្នុងហេតុការណ៍ខាងលើនោះ ស្ត្រីម្នាក់ជាអ្នករួមដំណើរបានសន្លប់ស្ដូកស្ដឹង ចំណែកឯបុរសជាអ្នកបើកបរបានលូនចេញស្រែកហៅអោយគេជួយ បង្កការភ្ញាក់ផ្អើលដល់ប្រជាពលរដ្ឋហៅរថយន្តសង្គ្រោះមកដឹកយកទៅមន្ទីរពេទ្យភ្លាមៗផងដែរ ។
សមត្ថកិច្ចបានបញ្ជាក់ទៀតថា គេឃើញមានឯកសារសម្គាល់នៅក្នុងរថយន្ដកុងតឺន័រខាងលើជារបស់ក្រុមហ៊ុនផែស្ងួត ហុក ឡាយ ហួរ។
ក្រោយពេលកើតហេតុ ដោយសាររថយន្តខាងលើមិនមានប៉ះពាល់ដល់សម្បត្តិសាធារណៈ និងមិនបង្កគ្រោះថ្នាក់ដល់អ្នកដទៃ ទើបសមត្ថកិច្ចនគរបាលប៉ុស្តិ៍បានទាក់ទងទៅខាងតំណាងក្រុមហ៊ុនផែស្ងួតខាងលើ ដើម្បីមកស្ទូចយករថយន្តកុងតឺន័រទៅជួសជុលដោយខ្លួនឯងភ្លាមៗផងដែរ ៕
ចែករំលែកព័តមាននេះ