រាជធានីភ្នំពេញ ៖ ក្រសួងទេសចរណ៍បានតម្រូវឲ្យអាជីវករកាណូតទេសចរណ៍ទាំងអស់ត្រូវអនុវត្តស្តង់ដាអប្បបរមាកាណូតទេសចរណ៍កម្ពុជា ដើម្បីពង្រឹងសុវត្ថិភាព និងគុណភាពសេវាកម្មទេសចរណ៍តាមផ្លូវទឹកនៅក្នុងព្រះរាជាណាចក្រកម្ពុជា ។ យោងតាមសេចក្តីជូនដំណឹងលេខ០៦៩ សជណ.អគឧ ចុះថ្ងៃទី១៣ ខែកុម្ភៈ ឆ្នាំ២០១៩កន្លងមកបានឲ្យដឹងថា ការដាក់ឲ្យអនុវត្តនេះគឺស្របតាមអនុសាសន៍ណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា ក្នុងពិធីបុណ្យសមុទ្រលើកទី៧ នៅខេត្តកោះកុងកាលពីកន្លងមកនេះ ។
សេចក្តីជូនដំណឹងដដែលបានបន្តថា អាជីវករកាណូតទេសចរណ៍ អាចដាក់ពាក្យ ស្នើសុំទទួលស្គាល់ស្តង់ដាគុណភាពអប្បបរមា ដោយឥតគិតថ្លៃចាប់ពីថ្ងៃទី១ ខែមីនា ឆ្នាំ២០១៩ តទៅ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានមានប្រសាសន៍ស្វាគមន៍ចំពោះក្រសួងទេសចរណ៍ ដែលតម្រូវឲ្យម្ចាស់អាជីវករកាណូតទេសចរណ៍ទាំងអស់រៀបចំឲ្យមានស្តង់ដាដើម្បីសុវត្ថិភាព ជូនដល់ភ្ញៀវទេសចរ ។ លោកស្រីបន្តថា ការណែនាំនេះពិតជាល្អ សម្រាប់ប្រទេសកម្ពុជានាពេលអនាគត ព្រោះកន្លងមកនេះ មានកាណូតមួយចំនួនបានរៀបចំបានស្តង់ដា និងមួយចំនួនទៀតមិនមានស្តង់ដាដែលធ្វើឲ្យភ្ញៀវជិះធ្វើដំណើរកម្សាន្តមានអារម្មណ៍គ្មានសុវត្ថិភាព ។ លោកស្រីមានប្រសាសន៍ថា ៖« ពេលខ្លះទាំងពោងសុវត្ថិភាព និងចំណីអាហារទៀតសោតក៏គ្មាន អនាម័យដែលបង្កឲ្យភ្ញៀវដែលធ្វើដំណើររួចហើយខ្លាចរអារ ក្នុងការជិះម្តងទៀត ឬមិនហ៊ានប្រាប់មិត្តភក្តិ ឬបងប្អូនរបស់គេធ្វើដំណើរម្តងទៀត ហើយការីទេសចរណ៍ទាំងអស់ក៏មានហ៊ានណែនាំភ្ញៀវឲ្យធ្វើដំណើរតាមកាណូតផងដែរ »។ លោកស្រី ឆាយ ស៊ីវលីន បានបញ្ជាក់ទៀតថា ៖« ប្រទេសកម្ពុជាមានសក្តានុពលខ្ពស់លើវិស័យទេសចរណ៍ទាំងផ្លូវគោក និងផ្លូវទឹក ដោយខាងផ្លូវទឹក យើងមានបឹង ទន្លេ និងសមុទ្រ ក្នុងការទាក់ភ្ញៀវទេសចរឲ្យមកលេងកម្សាន្ត តែអ្វីដែលយើងបានផ្គត់ផ្គង់មិនបានតាមស្តង់ដា និងអនាម័យ បើក្រសួងទេសចរណ៍តម្រូវម្ចាស់កាណូតទេសចរណ៍រៀបចំឲ្យមានស្តង់ដាពិតជាល្អ ព្រោះខាងការីទេសចរណ៍ប្រាថ្នាចង់បានជាយូរណាស់មកហើយ »។
លោកស្រីបន្ថែមថា ៖« បើកក្រឡេកមើលប្រទេសជិតខាងយើង គេបានរៀបចំបានស្តងដាល្អណាស់។ ចំណែកយើងវិញមានសម្បត្តិធម្មជាតិលើសគេទៅទៀត តែមិនបានរៀបចំឲ្យបានល្អ ឬស្តង់ដាសម្រាប់ភ្ញៀវ ព្រោះការរៀបចំនេះពិតជាមានសារសំខាន់ណាស់សម្រាប់ភ្ញៀវស្នាក់នៅឲ្យបានយូរ និងចំណាយលុយឲ្យបានច្រើនដើម្បីបង្កើនចំណូលដល់ពលរដ្ឋទទួលបានអត្ថប្រយោជន៍ខ្ពស់ »។ លោកស្រីបន្ដថា ៖« បើយើងរៀបចំគ្មានសុវត្ថិភាព និងស្តង់ដាចំពោះកាណូត និងរថយន្តដឹកភ្ញៀវទេសចរនោះទេ ពួកគេនឹងមិនស្នាក់នៅយូរ ហើយអាចបង្វែរទៅលេងកម្សាន្តនៅប្រទេសផ្សេង ហើយគេក៏មិនមកលេងជាលើកទី២ទៀតដែរ ។ អីចឹងទេ យើងទាំងអស់គ្នាត្រូវតែគិតគូរពីសុវត្ថិភាព និងស្តង់ដាឲ្យបានច្រើន »៕
ចែករំលែកព័តមាននេះ