ខេត្តកំពង់ឆ្នាំង ៖ ប្រជាពលរដ្ឋរស់នៅតាមផ្លូវលេខ១ ក្នុងសង្កាត់ខ្សាម ក្រុងកំពង់ឆ្នាំងដែលធ្លាប់តែរងទុក្ខលំបាកដោយសារតែដីក្រហមហុយយ៉ាងខ្លាំងអស់រយៈកាលជាច្រើនឆ្នាំកន្លងទៅនេះពេលនេះពួកគាត់បានសប្បាយរីករាយហើយបន្ទាប់ពីទទួលបានផ្លូវកៅស៊ូមួយខ្យែ ឆ្លើយតបទៅនឹងគោលបំណងរបស់ពួកគាត់ដែលចង់បានជាយូរណាស់មកហើយ ។
សូមបញ្ជាក់ថា ផ្លូវមួយខ្យែនេះ គឺជាផ្លូវមួយក្នុងចំណោមផ្លូវជាច្រើនខ្សែទៀតដែលអាជ្ញាធររៀបចំកសាង ដើម្បីរៀបចំបុណ្យទន្លេក្នុងពេលយ៉ាងខ្លីខាងមុខនេះ ។ ប្រជាពលរដ្ឋរស់តាមដងផ្លូវលេខ១ខាងលើបានសម្ដែងទឹកចិត្តរីករាយដោយសារតែទើបនឹងបាន ផ្លូវថ្មីមួយខ្សែនេះបានលើកឡើងថា កន្លងទៅអស់រយៈពេលជាច្រើនឆ្នាំមកហើយជាពិសេសក្នុងពេលថ្មីៗដែលអាជ្ញាកំពុងតែអភិវឌ្ឍន៍ពង្រីកផ្លូវខាងលើរយៈពេលជាង២ឆ្នាំកន្លងទៅនេះ គឺជួបការលំបាកកាន់តែខ្លាំងដោយសារតែដីកាន់តែហ៊ុយចូលផ្ទះសម្បែងដំណាំដាំដុះ ឡើងក្រហមដូចលាបពណ៌ ។
ម្យ៉ាងវិញទៀតរបស់របរលក់ដូរត្រូវគ្របជាប្រចាំ ហើយជាពិសេសទៅទៀត គឺបញ្ហាសុខភាព ម្នាក់ៗត្រូវពាក់ម៉ាស់គ្រប់គ្នា ដើម្បីការពារពីធូលីដី ។ ពួកគាត់មានជំងឺឈឺថ្កាត់ដោយសារតែរលាកផ្លូវដង្ហើម ។ បើទោះបីមានការព្យាបាលយ៉ាងណាក្តីក៏គ្រាន់តែបានមួយទប់ទល់ប៉ុណ្ណោះ មិនជាឡើយ ។ ប៉ុន្តែក្រោយពីបានផ្លូវកៅស៊ូនេះបានព្យាលបាលជាស្រឡះតែម្តង។ជាមួយគ្នានេះពួកគាត់សូមថ្លែងអំណរគុណដល់រាជរដ្ឋាភិបាលអាជ្ញាធរខេត្ត ដែលបានកសាងផ្លូវមួយខ្សែខាងលើនេះឆ្លើយតបតាមសំណូមពររបស់ប្រជាពលរដ្ឋ។
យ៉ាងនេះក្តីប្រជាពលរដ្ឋបានសំដែងការព្រួយបារម្ភថែមទៀត បន្ទាប់ពីបានផ្លូវយ៉ាងល្អនេះហើយបែរជាមានរថយន្ត ម៉ូតូ បានបើកល្បឿនលឿនៗពិសេសរថយន្តដឹកត្រីដែលកត្តានេះព្រួយបារម្ភពីសុវត្ថិភាពកូនចៅក្រែងជួបគ្រោះថ្នាក់ចរាចរណ៍ដោយសារអ្នកបើកបរល្បឿនលឿនបែបនេះពួកគាត់សំណូមពរដល់សមត្ថកិច្ចជួយធ្វើយ៉ាងណា អោយអ្នកបើកបរទាំងនោះគោរពច្បាប់ចរាចរណ៍ផង ដើម្បីសុវត្ថិភាព ។
គួររំលឹកដែរថា អាជ្ញាធរខេត្តកំពង់ឆ្នាំងបានកសាងផ្លូវជាច្រើនកន្លែងសម្រាប់រៀបចំពិធីបុណ្យទន្លេលើកទី៥ ដែលខេត្តកំពង់ឆ្នាំងធ្វើជាម្ចាស់ផ្ទះក្នុងនោះផ្លូវលេខ១ខាងលើនេះជាប្រភេទចាក់កៅស៊ូ DBST មានប្រវែងជាង២គីឡូម៉ែត្រចាប់ពីផ្លូវជាតិលេខ៥ ចំណុចគល់ស្ពាន់ខ្សាមរហូតដល់មាត់ទន្លេជាកន្លែងអភិវឌ្ឍន៍ថ្មី ។ ក្រៅពីនោះនៅមានផ្លូវលេខ១៥ចាប់ពីចំណុចផ្លូវជាតិលេខ៥ កាត់ឡើងភ្នំសន្ទូចក៏ជាប្រភេទផ្លូវកៅស៊ូ DBST ដែរ ។
ដោយឡែកផ្លូវក្នុងក្រុងមានផ្លូវក្បែរសាលារៀនគំរូក្រុងផ្លូវត្រពាំងបីផ្លូវទៅផ្សារក្រោមជាដើមក៏បានចាក់អ៊ុតកៅស៊ូជាប្រភេទផ្លូវ AC រួចអស់ហើយដែរ ៕
ចែករំលែកព័តមាននេះ