ថ្វីបើបព្វជិត និងគ្រហស្ថមានកិច្ចប្រតិបត្តិផ្សេងគ្នាក៏ដោយ ប៉ុន្តែសុទ្ធតែជាអ្នកប្រព្រឹត្តទៅដើម្បីជីវិតថ្លៃថ្នូរ និងរស់នៅដោយកិត្តិយសដូចគ្នា ។
សេចក្តីថ្លៃថ្នូររបស់គ្រហស្ថជាអ្នកប្រកបការងារត្រឹមត្រូវ ចិញ្ចឹមជីវិតដោយសម្មាអាជីវោ បណ្តុះចិត្តក្នុងការបរិច្ចាគទាន អប់រំកាយវាចាចិត្តឱ្យប្រព្រឹត្តតែក្នុងអំពើសុចរិត បុគ្គលនោះឈ្មោះថា រស់នៅដោយកិត្តិយស ។
ចំណែកអ្នកបួសវិញបានដល់ការប្រតិបត្តិតាមកិច្ចធម៌វិន័យត្រឹមត្រូវ រក្សាសីលឱ្យបរិសុទ្ធ គោរពឱ្យហ្មត់ចត់ សង្រួមឥន្ទ្រិយឱ្យមាំ ចៀសឱ្យឆ្ងាយពីអនេសនៈ២១និងបាបធម៌៥ យកវិន័យជាធំក្នុងការប្រតិបត្តិ ធ្វើចិត្តឱ្យផូរផង់ប្រាសចាកអំពើជាអកុសល កាន់ត្រៃសិក្ខាឱ្យខ្ជាប់ខ្ជួន ជីវិតរបស់អ្នកបួសនោះឈ្មោះថារស់នៅដោយបញ្ញា ។
សេចក្តីនេះស្របទៅនឹងព្រះបរមសាស្តាទ្រង់ត្រាស់ថា ការរស់នៅដោយប្រាជ្ញា ព្រមដោយព្យាយាមជាធំនឹងនាំជីវិតទៅរកសេចក្តីថ្លៃថ្នូរ បរិបូណ៌ដោយសិរីសួស្តី ។
ចែករំលែកព័តមាននេះ