ខេត្តកំពង់ឆ្នាំង ៖ ខណៈដែលប្រជាពលរដ្ឋទូទាំងប្រទេសកំពុងប្រារព្ធទិវាសិទ្ធនារីអន្តរជាតិ៨ មីនា នៅស្រុកកំពង់ត្រឡាចឯណោះវិញក៏មានអំពើហិង្សាដោយបុរសជាប្តីបានយកអង្រែបុកគ្រឿងវាយប្រពន្ធពីរអង្រែ បណ្តាលអោយសន្លប់ខណៈប្រពន្ធរអ៊ូរឿងប្តីដុតផ្ទះបាយឆេះខ្ទេច ។
ស្ត្រីរងគ្រោះត្រូវបានអ្នកជិតខាងដឹកយកទៅសង្គ្រោះនៅមណ្ឌលសុខភាពស្រុកកំពង់ត្រឡាច ។ ជនដៃដល់ជាប្តីក៏ត្រូវបានសមត្ថកិច្ចចាប់បញ្ជូនមកកាន់ស្នងការដ្ឋាននគរបាលខេត្តនៅរសៀល ថ្ងៃទី០៦ ខែមីនា ឆ្នាំ២០១៩ បន្ទាប់ពីចាប់ខ្លួនបានមួយថ្ងៃ ។
លោកនន ស៊ីណាត អធិការនគរបាលស្រុកកំពង់ត្រឡាចបានអោយដឹងនៅព្រឹកថ្ងៃទី០៧ ខែមិនា ឆ្នាំ២០១៩នេះថា ស្ត្រីរងគ្រោះមានឈ្មោះ ឌុច ហន ហៅ(ទ្រេន) អាយុ៤២ឆ្នាំ មុខរបរជាកម្មការនីរោងចក្រកាត់ដេរមានកូន២នាក់នៅក្នុងបន្ទុក ។ ចំណែកជនសង្ស័យជាប្តីមានឈ្មោះ សម្បត្តិ សុធី អាយុ៣៧ឆ្នាំ មុខរបរមិនពិតប្រាកដ ។ គ្រួសារខាងលើមានទីលំនៅភូមិគ ឃុំថ្មឥដ្ឋ ស្រុកកំពង់ត្រឡាច ។ លោកបានបញ្ជាក់ថា បុរសជាប្តីចាប់តាំងពីត្រឡប់មកពីធ្វើការនៅប្រទេសថៃវិញមានសតិមិនល្អ ហើយតែងផឹកស្រវឹងជាប្រចាំ និងធ្លាប់វាយប្រពន្ធកូនជាច្រើនសាររហូតដល់ពេលមួយវាយប្រពន្ធបណ្តាលអោយរងរបួសត្រូវសមត្ថកិច្ចនគរបាលចាប់យកមកស្រុកកំពង់ត្រឡាច ដើម្បីកសាងសំណុំរឿង ។
ប៉ុន្តែដោយសារប្រពន្ធមកយំអង្វរសុំទុកឱកាសអោយបុរសជាប្តីកែប្រែ ហើយសុំត្រឹមធ្វើការអប់រំហើយក៏អោយត្រឡប់ទៅផ្ទះវិញ ។ ប៉ុន្តែបុរសជាប្តីមិនកែប្រែចរិកនៅរសៀលថ្ងៃទី០៥ ខែមីនា ឆ្នាំ២០១៩ បុរសជាប្តីរូបនោះខឹងនឹងប្រពន្ធបានដុតផ្ទះបាយឆេះខ្ទេច ។ លុះល្ងាចឡើង ប្រពន្ធត្រឡប់ពីធ្វើការវិញកំពុងអង្គុយហូបបាញ់ឆែវ ហើយរអ៊ូរឿងឆេះអស់ផ្ទះបាយដែលគួរអោយស្តាយ ស្រាប់តែបុរសជាប្តីបានស្ទុះទៅបោចសក់ប្រពន្ធអូសទម្លាក់ពីលើគ្រែ និងទាញយកអង្រែបុកគ្រឿងវាយប្រពន្ធ២អង្រែ បណ្តាលអោយសន្លប់ស្តូកស្តឹង ។ ប្រជាពលរដ្ឋដែលនៅក្បែខាងបានជួយអន្តរាគមន៍ដឹកយកស្ត្រីរងគ្រោះទៅកាន់មណ្ឌលសុខភាពស្រុក និងរួមគ្នាចាប់បុរសជាប្តីប្រគល់អោយសមត្ថកិច្ចនគរបាល ។
លោកសូមបដិសេធន៍ថា ប្តីដុតផ្ទះ គឺមិនមែនទេ គឺដុតផ្ទះបាយ ។ ចំណែកជនដៃដល់ជាប្តីបានចាប់បញ្ជូនទៅកាន់ស្នងការខេត្តរួចហើយដើម្បីចាត់ការតាមផ្លូវច្បាប់ ។ នៅមណ្ឌលសុខភាព ស្រុកកំពង់ត្រឡាច កាលពីរសផលថ្ងៃទី០៦ ខែមីនា លោកជំទាវ តុណារី សមាជិកក្រុមប្រឹក្សាខេត្តកំពង់ឆ្នាំងបានដឹកនាំក្រុមសម្ព័ន្ធយុវជនស្រឡាញ់សន្តិភាពចុះសាកសួរស្ត្រីរងគ្រោះ ដោយបានផ្តល់អំណោយលើកទឹកចិត្តចំនួន១៥ម៉ឺនរៀល និងគ្រឿងឧបភោគបរិភោគមួយចំនួនទៀត ព្រមទាំងបានផ្តាំផ្ញើដល់ស្ត្រីរងគ្រោះខាងលើត្រូវពង្រឹងស្មារតី ដើម្បីមើលថែកូនបន្ត មិនត្រូវគិតខ្លីឡើយ ហើយរឿងប្តីទុកអោយច្បាប់ចាត់ការមិនត្រូវទៅសុំអោយអនុគ្រោះដូចមុនទៀតឡើយ ៕
ចែករំលែកព័តមាននេះ