តាមប្រភពពីMetroបានឱ្យដឹងថា បុរសម្នាក់អាយុ៣៥ឆ្នាំ ស្លាប់នៅក្នុងមន្ទីរពេទ្យ ក្រោយពីជួយកូនស្រីអាយុ១៣ខែចេញពីផ្ទះ ខណៈមានអណ្តាតភ្លើងយ៉ាងសន្ធោរសន្ធៅ កាលពី៩ថ្ងៃមុន ។ លោក Neil Thompson បានរត់ទៅយកកូនស្រីពីលើគ្រែក្នុងផ្ទះដែលកំពុងឆាបឆេះភ្លើង នៅ Lossiemouth ប្រទេសស្កុតឡែន កាលពីថ្ងៃទី២១ មករា ។
បុរសជាអ្នកធ្វើជំនួញរូបនេះ បានរងរបួសធ្ងន់ធ្ងរណាស់ ហើយត្រូវគេបញ្ជូនទៅកាន់មន្ទីរពេទ្យ Glasgow Royal សង្គ្រោះបន្ទាន់ ។ តែជាអកុសល គាត់មិនបានរស់ផុត៩ថ្ងៃនោះទេ ។ ប្រពន្ធរបស់គេឈ្មោះ Natalie អាយុ៣១ឆ្នាំ នៅពេលកើតហេតុក៏បានលោតចុះពីជាន់លើតាមបង្អួច ហើយក៏រងរបួសដែរ។ ទាំងម្តាយនិងកូនសុទ្ធតែរងរបួស តែត្រូវបានគ្រូពេទ្យជួយសង្គ្រោះបានរួចផុតពីគ្រោះថ្នាក់ ។
ប្រពន្ធអ្នកស្លាប់ នាង Natalie បានប្រាប់ទាំងក្តុកក្តួលថា Neil និងកូនស្រី គឺជាពិភពលោកនាង ។ នាងបានបង្ហោះរូបថត ពេលនាងជញ្ជក់មាត់ជាមួយនឹង Neil នៅលើបណ្តាញសង្គម ដើម្បីនឹករលឹកដល់ព្រលឹងរបស់មនុស្សជាទីស្រឡាញ់របស់នាង ។ ខាងប៉ូលិសថា មិនទាន់បានដឹងពីមូលហេតុដែលឆេះនេះទេ ។
ចែករំលែកព័តមាននេះ