រាជធានីភ្នំពេញ ៖ ក្នុងរយៈពេលចុងក្រោយគេឃើញអាជីវកម្មអនឡាញមិនត្រឹមតែពេញនិយមក្នុងចំណោមតារាសិល្បៈ និងតារាហ្វេសប៊ុកប៉ុណ្ណោះទេ សូម្បីតែអ្នកប្រកបអាជីពកីឡា ដែលជាកីឡាករ-កីឡាការិនីល្បីក៏ត្រូវគេកត់សម្គាល់ថាទទួលជោគជ័យក្នុងមុខជំនួញនេះមិនអន់ដែរ ។ តើកីឡាករ-កីឡាការិនីណាខ្លះ ដែលបានក្លាយខ្លួនជាអ្នកសកម្មក្នុងមុខជំនួញអនឡាញ? ស៊ន…
រាជធានីភ្នំពេញ ៖ ក្នុងរយៈពេលចុងក្រោយគេឃើញអាជីវកម្មអនឡាញមិនត្រឹមតែពេញនិយមក្នុងចំណោមតារាសិល្បៈ និងតារាហ្វេសប៊ុកប៉ុណ្ណោះទេ សូម្បីតែអ្នកប្រកបអាជីពកីឡា ដែលជាកីឡាករ-កីឡាការិនីល្បីក៏ត្រូវគេកត់សម្គាល់ថាទទួលជោគជ័យក្នុងមុខជំនួញនេះមិនអន់ដែរ ។ តើកីឡាករ-កីឡាការិនីណាខ្លះ ដែលបានក្លាយខ្លួនជាអ្នកសកម្មក្នុងមុខជំនួញអនឡាញ?
ស៊ន សៀវមុី ៖ កញ្ញាសម្រេចចិត្តនាំចូលផលិតផលថែរក្សាសម្រស់រួមមានផលិតផលលាបមុខ ថែរក្សាមុខ និងថ្នាំសម្រកទម្ងន់ជាដើមប្រមាណជា១ខែមកហើយ ដោយក្នុងមួយខែចាប់តាំងពីនាងបើកលក់នេះ នាងរកចំណូលបានមិនក្រោម៤ទៅ៥ពាន់ដុល្លារនោះទេ ក្នុងពេលដែលនាងផ្សាយលក់កន្លងមក ក៏មិនទាន់គ្រប់មុខទំនិញ និងគ្រាន់តែជាការប្រកាសលក់សាកល្បងនៅឡើយ ។ កញ្ញាថា ខ្លួនលក់ដាច់ខ្លាំងណាស់ ដោយក្នុងមួយថ្ងៃផលិតផលដែលនាងប្រកាសលក់ស្ទើរមិនសល់សម្រាប់បំពេញតម្រូវការឡើយ ។ ជាក់ស្ដែងផលិតផលសម្រកទម្ងន់ និងថែរក្សាស្បែកស្ទើរគ្រប់មុខដែលនាងយកមកផ្សាយ គឺនាងលក់អស់គ្មានសល់ ខណៈថ្ងៃខ្លះមិនមានទំនិញដើម្បីដាក់ផ្សាយលក់ផង ។ គ្រប់មុខទំនិញទាំងអស់នាងថា មិនបានឡើងទៅទិញដោយខ្លួនឯងនៅក្នុងប្រទេសថៃនោះទេ ប៉ុន្តែនាងមានទំនាក់ក្នុងការកុម្ម៉ង់ទិញ ដោយនាងគ្រាន់តែកុម្ម៉ង់ថាយករបស់នេះរបស់នោះ ហើយតម្រូវឱ្យវេចខ្ចប់ដាក់ស្លាកយីហោបែបនេះបែបនោះ គឺគ្រប់គ្រាន់ ។
ក្នុងរយៈពេលមួយខែ តាំងពីបើកដំណើរការនាងថា បានឡើងទៅមើលទំនិញតែម្ដងពីរដងនៅក្នុងប្រទេសថៃប៉ុណ្ណោះ ដោយការត្រួតពិនិត្យក៏ទៅតែមួយភ្លែតៗ ព្រោះមុខទំនិញដែលនាងកុម្ម៉ង់ទិញ គឺអាចមើលតាមរូបថតឆ្លងឆ្លើយគ្នាបាន មិនបាច់ទៅមើលផ្ទាល់ក៏បាន។ នាងថា មុខរបរអនឡាញដ្បិតថា មិនត្រូវនឹងបទពិសោធន៍ក្នុងនាមដែលនាងប្រឡូកតែការងារកីឡា ប៉ុន្តែមិនមានផលវិបាកសម្រាប់រូបនាងនោះទេ ដោយសារតែនាងក៏ចេះរបៀបផ្សាយលក់ និងជាមនុស្សចូលចិត្តតែងខ្លួន និងសម្រករាង ដែលមិនពិបាកឱ្យនាងឃោសនាដើម្បីឱ្យអតិថិជនជឿជាក់ ។ មុខរបរអនឡាញដែលនាងបើកលក់នេះ នាងគ្មានគម្រោងជួលផ្ទះបើកជាហាងនោះទេ ដោយសារតែនាងយល់ថា ខ្លួនមិនទាន់ទំនេរគ្រប់គ្រាន់ និងថាត្រឹមលក់តាមអនឡាញ ក៏រកចំណូលបានសមប្រកបហើយ ។ នាងថាហេតុផលដែលនាងសម្រេចចិត្តប្រកាសលក់ផលិតផលលើអនឡាញនេះ ក៏ព្រោះតែពេលកន្លងមកនាងប្រើថ្នាំសម្រកទម្ងន់ខ្លួនឯង និងប្រើផលិតផលថែរក្សាសម្រស់ខ្លួនឯង ហើយឃើញថាល្អទើបសម្រេចចិត្តកុម្ម៉ង់យកមកលក់តែម្ដងទាន់ពេលកេរ្តិ៍ឈ្មោះរបស់នាងនៅមានការគាំទ្រ។
ហែម ថុនវិទិនី ៖ កីឡាការិនីហែលទឹក រូបនេះប្រកាសថានាងរកចំណូលចាយស្រួលពីការប្រកាសលក់ផលិតផលអនឡាញបែបនេះដូចគ្នាផងដែរ ដោយនាងគឺជាអ្នកលក់ផលិតផលថែរក្សាសម្រស់ និងផលិតផលហែលទឹកមួយចំនួនផង ។ នាងត្រូវគេឃើញសកម្មក្នុងការផ្សាយលក់ និងដឹកជញ្ជូនផលិតផលដោយផ្ទាល់ទៅកាន់អតិថិជន នៅពេលម៉ូតូឌុប និង អ្នកដឹកជញ្ជូនអីវ៉ាន់ឱ្យម៉ូយរវល់ដកឃ្លាមិនរួច។ ទោះបីយ៉ាងណាកញ្ញានៅតែមិនបោះបង់ការហ្វឹកហាត់ និងការងារត្រៀមប្រកួតនោះទេ ដោយនាងប្រាប់ថា ការប្រកាសលក់ផលិតផលផ្សេងៗគឺទាល់តែទំនេរពីកីឡា ដោយសារតែនាងក៏មិនចង់ឱ្យធ្លាក់សមត្ថភាពក្នុងការហ្វឹកហ្វឺន។
សេន ប៊ុនថេន ៖ កីឡាកររូបនេះ មិនសូវដើរតួជាអ្នកLive លក់ផលិតផលសម្លៀកបំពាក់កីឡាប៉ុន្មានទេ ដោយគេឃើញជំនួសមុខដោយភរិយារបស់លោកច្រើនជាង ។ យ៉ាងណាមិញគេឃើញលោកធ្វើសកម្មភាពជួយជំរុញយ៉ាងផុលផុសតាមរយៈការបង្ហោះលក់ ការបង្ហាញមុខឱ្យមានការចាប់អារម្មណ៍ពីសំណាក់អ្នកស្គាល់ ដើម្បីឱ្យភរិយារបស់លោកលក់កាន់តែដាច់ ហើយបើនិយាយពីការកៀងគរកូនសិស្សនិងកីឡាករឱ្យទិញផលិតផលអនឡាញរបស់លោកវិញគឺខ្លាំងជាងភរិយាដាច់ឆ្ងាយ ទើបគេចាត់ទុកថាមុខរបរអនឡាញរបស់ភរិយាលោកបើគ្មានប្រជាប្រិយរបស់លោកជំរុញពីក្រោយ គឺពិតជាមិនអាចទៅរួច ។ លោកត្រូវគេដឹងថា ជាអ្នកដឹកជញ្ជូនទំនិញឱ្យភ្ញៀវដល់ទីតាំងផងដែរ ខណៈដែលលោកប្រាប់ថា ភាពអៀនខ្មាសមិនមែនជារឿងសំខាន់នោះទេនៅពេលលោកទទួលបានចំណូលខ្លាំងបែបនេះ។
បឺត ខាំ និងឡុង សុភី ៖ លោកទាំងពីរក៏ត្រូវគេចាត់ទុកថាជាអ្នកលក់អនឡាញដែលជោគជ័យផងដែរ ដោយគ្រាន់តែលោកមិនលក់ឡេ ម្សៅ និងផលិតផលរាយរងនោះទេ គឺលោក Live លក់ដីឡូត៍តូចធំនៅម្ដុំវត្តទួលសុភីដែលជាគម្រោងកើបលុយធំតែម្ដង ។ លោកត្រូវគេឃើញរៀបរាប់ពីគម្រោងលក់ដី ដោយរាល់ពេលLive ម្ដងៗអ្នកទាំងពីរតែងតែប្រកាសថា លក់ដាច់ខ្លាំងណាស់ និងថាអរគុណបងប្អូនអ្នកលេងហ្វេសប៊ុកដែលតែងមកទិញគម្រោងដីឡូត៍របស់លោកក្រោយពេលLive ជាដើម។ កីឡាករទាំងពីរត្រូវគេអះអាងថាស្ទើរតែភ្លេចខ្លួនជាកីឡាករដែលធ្លាប់សាងកេរ្តិ៍ឈ្មោះបោះសំឡេងបន្ទាប់ពីកាក់កបខ្លាំងក្នុងមុខរបរលក់ដីតាមអនឡាញ ហើយជូនភ្ញៀវទៅដល់ទីកន្លែង។
ហ៊ុន សត្យា ៖ លោកត្រូវគេស្គាល់ជាកីឡាករនិងជាគ្រូបង្វឹកផ្នែកតេក្វាន់ដូដោយម្ដងម្កាលក៏បង្ហាញខ្លួនសម្ដែងភាពយន្តផងនោះ ក៏ត្រូវគេឃើញសកម្មក្នុងការលក់ជ្រក់ជើងមាន់ ដោយលោកប្រកាសថា គឺលក់ដាច់ខ្លាំងណាស់។លោកថា មុខរបរលក់ជើងមាន់លើអនឡាញ ដ្បិតថារវល់ និងហត់រឿងយកផលិតផលឱ្យគេ ប៉ុន្តែសម្រាប់ប្រាក់ចំណូលគឺពេញទំហឹង។ កីឡាករ-កីឡាការិនីទាំងនេះបានអះអាងស្រដៀងគ្នាថា មានតែមុខរបរលក់អនឡាញប៉ុណ្ណោះទើបអាចឱ្យពួកគេមិនរវល់មិនបាក់កម្លាំង ហើយមានពេលសកម្មនៅក្នុងអាជីពប្រដាល់ឬកីឡាតាមការគ្រោងទុក។ ពួកគាត់និយាយថា បើគ្មានមុខរបរអនឡាញ ពួកយើងអត់មានលុយសម្រាប់ទ្រទ្រង់អាជីពកីឡាទេ ព្រោះកីឡារាល់ថ្ងៃល្អតែមើលតែសម្រាប់លុយកាក់គឺចិញ្ចឹមខ្លួនមិនរស់ ។ ពួកគាត់បញ្ជាក់ថា មិនឈប់មុខរបរអនឡាញនោះទេ ប៉ុន្តែក៏មិនផ្ដាច់ខ្លួនពីអាជីពកីឡាដូចគ្នា ដោយបានទាំងចាត់ទុកថា មុខរបរទាំងពីរត្រូវដើរទន្ទឹមគ្នា ទើបអាចឱ្យពួកគាត់រស់នៅបានស្រួល៕
ចែករំលែកព័តមាននេះ