រាជធានីភ្នំពេញ ៖ កីឡាករប្រដាល់គុនខ្មែរលំដាប់ជួរមុខ កែវ រំចង់ ដែលធ្លាប់តែបង្ហាញអារម្មណ៍នៅក្នុងទំព័រហ្វេសប៊ុករបស់ខ្លួននាពេលកន្លងមកថា ចង់ក្លាយខ្លួនជាមន្ត្រីនគរបាលជាតិនោះ ពេលនេះបានសម្រេចដូចបំណងហើយធ្វើឱ្យលោកមានការរំភើបចិត្តយ៉ាងខ្លាំង ហើយក៏មិននឹកស្មានដល់ទាល់តែសោះថា ក្ដីស្រមៃរបស់ខ្លួនក្លាយជាការពិតបែបនេះសោះ។
អ្នកប្រដាល់ដែលមានដើមកំណើតនៅលើទឹកដីខេត្តបាត់ដំបងរូបនេះ បានប្រាប់ឱ្យដឹងទៀតថា លោកស្រឡាញ់ចូលចិត្តកីឡាប្រដាល់ក្បាច់គុនបុរាណខ្មែរនេះ តាំងពីនៅអាយុ៥ឆ្នាំម្ល៉េះព្រោះឪពុកលោកក៏ជាអតីតអ្នកប្រដាល់ជើងខ្លាំងមួយរូបប្រចាំខេត្តបាត់ដំបង ហើយធ្លាប់ឆ្លងដែនចូលទៅប្រកួតនៅប្រទេសថៃទៀតផង។ទោះបីយ៉ាងណា ក្នុងចំណោមបងប្អូន៣នាក់មានតែរូបលោកម្នាក់ប៉ុណ្ណោះដែលជាកូនប្រុសពៅក្នុងគ្រួសារជាអ្នកស្នងតំណែងពីឪពុក ដោយសម្រេចចិត្តបោះបង់ចោលការសិក្សានៅត្រឹមថ្នាក់ទី៩មកចាប់យកអាជីពជាអ្នកប្រដាល់តែម្ដង ។
កែវ រំចង់ បានចូលប្រឡូកនៅលើសង្វៀនប្រដាល់ក្នុងឆ្នាំ២០០៧ ហើយក៏ជាឆ្នាំដែលគេដណ្ដើមបានពានរង្វាន់ជើងឯកទូទាំងប្រទេសជាលើកដំបូងក្នុងប្រភេទទម្ងន់៥៧គីឡូក្រាម ដែលកាលណោះគេជាសិស្សនៅក្នុងក្លិបដំបងគ្រញូងខេត្តបាត់ដំបង ។ ចាប់តាំងពីពេលនោះមក កេរ្តិ៍ឈ្មោះកែវ រំចង់ បានចាប់ផ្ដើមល្បីខ្ទរខ្ទារទូទាំងប្រទេស ហើយខ្សែក្រវាត់ដែលគេដណ្ដើមបានរហូតមកដល់ពេលនេះមានចំនួន៥គ្រឿង
ឯណោះ ។ ប៉ុន្តែគួរឱ្យស្ដាយគេបានធ្វើឱ្យរបូតបាត់អស់១ដោយសារតែប្រកួតចាញ់កីឡាករ វង្ស ណយ កាលពីឆ្នាំ២០១៦ ។ កីឡាករដែលមានវ័យ៣០ឆ្នាំរូបនេះ បានរៀបការប្រពន្ធនៅក្នុងឆ្នាំ២០១២ ដែលមកដល់ពេលនេះគេមានកូនស្រីពីរនាក់ ។ ទោះបីជាគេមានអាយុច្រើនបន្តិចមែន តែកែវ រំចង់ បានប្រាប់ថា គេមិនទាន់ចង់ឈប់ពីអាជីពប្រដាល់ដែលបានជួយឱ្យគេមានឈ្មោះ ល្បីនោះទេព្រោះកម្លាំងនៅមាននៅឡើយ។ដោយសារស្រឡាញ់កីឡាប្រដាល់ខ្លាំង កែវ រំចង់ប្រាប់ថា ឱ្យតែឮភ្លេងប្រដាល់ម្ដងៗដៃជើងរបស់គេនៅមិនស្ងៀមឡើយ គឺទប់អារម្មណ៍មិនបានចង់តែប្រកួត ។
កែវ រំចង់ មិនត្រឹមតែជាអ្នកប្រដាល់ល្បីឈ្មោះម្នាក់ប៉ុណ្ណោះទេ ថែមទាំងជាតួសម្ដែងភាពយន្តនិងថតពាណិជ្ជកម្មឱ្យក្រុមហ៊ុននៅក្នុងស្រុកទៀតផង ។ មួយរយៈមកនេះគេរវល់ជាប់ថតភាពយន្តនៅខេត្តកោះកុង រឿង«ឈាមអ្នកប្រយុទ្ធ» ប៉ុន្តែរូបគេមិនមែនជាតួឯកនោះទេ ខាងក្រុមហ៊ុនតម្រូវឱ្យធ្វើជាតួកាចវិញ។
ទោះបីយ៉ាងណាកែវ រំចង់ នៅតែមិនបោះបង់ចោលក្ដីស្រមៃរបស់ខ្លួនដែលចង់ក្លាយខ្លួនជាមន្ត្រីនគរបាលជាតិ ទើបពេលនេះគេបានក្លាយជាមន្ត្រីនគរបាលមួយរូបថ្នាក់អនុសេនីយ៍ទោនៅក្រសួងមហាផ្ទៃ ក្នុងអង្គភាពកីឡា ។ បន្ទាប់ពីសម្រេចក្ដីបំណងរបស់ខ្លួន កែវ រំចង់បានប្រាប់ថា គេពិតជាសប្បាយចិត្តរកអ្វីប្រៀបផ្ទឹមពុំបានឡើយ ។ សូម្បីតែប្រពន្ធ និងឪពុកម្ដាយរបស់គេក៏ចូលរួមអបអរនូវអ្វីដែលកែវ រំចង់ ទទួលបានក្នុងថ្ងៃនេះដែរ៕
ចែករំលែកព័តមាននេះ