រាជធានីភ្នំពេញ ៖ គណៈប្រតិភូអាជ្ញាធរជាតិការងារនៃសាធារណរដ្ឋកេនយ៉ា ដែលដឹកនាំដោយលោក Jillo Abdul Bahari Ali អនុរដ្ឋមន្ត្រីក្រសួងការងារ និងការគាំពារសង្គមនៃសាធារណៈកេនយ៉ា…
រាជធានីភ្នំពេញ ៖ គណៈប្រតិភូអាជ្ញាធរជាតិការងារនៃសាធារណរដ្ឋកេនយ៉ា ដែលដឹកនាំដោយលោក Jillo Abdul Bahari Ali អនុរដ្ឋមន្ត្រីក្រសួងការងារ និងការគាំពារសង្គមនៃសាធារណៈកេនយ៉ា បានធ្វើការស្វែងយល់ពីវិស័យការងារ និងដកពិសោធន៍ការងារពីប្រទេសកម្ពុជា ។
ក្នុងការចូលជួបសម្តែងការគួរសមជាមួយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីរសៀលថ្ងៃទី០៥ មីនា ឆ្នាំ២០១៩ នៅទីស្តីការក្រសួងការងារ ។ លោកអនុរដ្ឋមន្ត្រីក្រសួងការងារ និងការគាំពារសង្គមនៃសាធារណៈកេនយ៉ាបញ្ជាក់ថា ស្ថានភាពកម្ពុជា និងកេនយ៉ាមានលក្ខណៈប្រហាក់ប្រហែលគ្នា បើប្រៀបធៀបលើបញ្ហាប្រឈម កំណើនសេដ្ឋកិច្ច និង GDP សម្រាប់មនុស្សម្នាក់ក្នុងមួយឆ្នាំ ដូច្នេះវាទាមទារឱ្យយើងមានការសិក្សាស្វែងយល់ពីគ្នា ។
ចំណែកលោកអ៊ិត សំហេង រដ្ឋមន្ត្រីបានលើកឡើងថា ការជ្រើសរើសកម្ពុជាជាគោលដៅក្នុងការទស្សនកិច្ចស្វែងយល់ពីវិស័យការងាររបស់គណៈប្រតិភូជាពិសេសពាក់ព័ន្ធនឹងទីភ្នាក់ងារជាតិមុខរបរ និងការងារ (NEA) ជាជម្រើសដ៏ល្អ ព្រោះ NEA ជាយន្តការដ៏ជោគជ័យ និងសម្រេចបានសមិទ្ធផលជាច្រើន ។ លោករដ្ឋមន្ត្រីក៏បានលើកពីវឌ្ឍនភាពជាច្រើននៃក្រសួងការងារ និងបញ្ជាក់ថាកម្ពុជាជាប្រទេសតែមួយគត់ដែលហ៊ានផ្សាភ្ជាប់កិច្ចព្រមព្រៀងពាណិជ្ជកម្មទៅនឹងលក្ខខណ្ឌការងារផ្តល់សច្ចាប័នលើអនុសញ្ញាស្នូលទាំង៨របស់អង្គការ ILO អនុវត្តគម្រោងរោងចក្រកាន់តែប្រសើរនៅកម្ពុជា ដើម្បីត្រួតពិនិត្យលក្ខខណ្ឌការងារការបន្តដំឡើងប្រាក់ឈ្នួលអប្បបរមា និងការពង្រីករបបសន្តិសុខសង្គមនៅទូទាំងប្រទេស ។ តាមរយៈជំនួបនេះលោករដ្ឋមន្ត្រីជឿជាក់ថា កិច្ចសហប្រតិបត្តិការរវាងវិស័យការងារនៃប្រទេសទាំងពីរនឹងត្រូវបានពង្រឹងបន្ថែម ហើយនឹងមានការផ្លាស់ប្តូរបទពិសោធន៍ និងទស្សនៈល្អៗជាច្រើន ។ លោករដ្ឋមន្ត្រីសង្ឃឹមថា នៅលើកក្រោយនឹងមានទស្សនៈកិច្ចពីប្រតិភូកេនយ៉ា បន្ថែមទៀតមកកាន់កម្ពុជាបន្ថែមទៀត ។
សូមជម្រាបថា គណៈប្រតិភូកេនយ៉ាធ្វើដំណើរទស្សនកិច្ចសិក្សារយៈពេល៥ថ្ងៃចាប់ពីថ្ងៃទី០៥-០៩ ខែមីនានេះ គណៈប្រតិភូនៃក្រសួងការងារកេនយ៉ានឹងអញ្ជើញសិក្សាស្វែងយល់ និងដកស្រង់បទពិសោធន៍នៅទីភ្នាក់ងារជាតិមុខរបរ និងការងារ (NEA) អំពីដំណើរការផ្តល់សេវាការងារដល់អ្នកស្វែងរកការងារ ការប្រមូល និងផ្សព្វផ្សាយព័ត៌មានទីផ្សារការងារ ការបង្កើត និងអនុវត្តគោលនយោបាយកម្មវិធីការងារ និងយុទ្ធសាស្ត្រអភិវឌ្ឍន៍វិស័យការងាររបស់កម្ពុជា ស្របពេលដែលប្រទេសកេនយ៉ាទើបបង្កើតនូវអាជ្ញាធរជាតិការងារ កាលពីឆ្នាំ២០១៦កន្លងទៅថ្មីៗនេះ ។
គួរបញ្ជាក់ថា សាធារណរដ្ឋកេនយ៉ាជាប្រទេសមួយដែលស្ថិតនៅទ្វីបអាហ្វ្រិកប៉ែកខាងកើតដែលមានផ្ទៃដីសរុប៥៨០,៣៦៧ គីឡូម៉ែត្រការ៉េ និងមានប្រជាជនសរុប ៤៩.៧ លាននាក់ (គិតត្រឹមឆ្នាំ២០១៧) ។ កំណើនសេដ្ឋកិច្ចជាមធ្យមក្នុងរង្វង់៧% ជាមួយ GDP សម្រាប់មនុស្សម្នាក់១,៥០៧.៨១ ដុល្លារសហរដ្ឋអាមេរិក ។ កាលពីឆ្នាំ២០១៦ ប្រទេសនេះទើបបានបង្កើតអាជ្ញាធរជាតិការងារ ហើយពុំទាន់មានដំណើរការពេញលេញនៅឡើយ និងកំពុងសិក្សាស្វែងយល់បន្ថែមពីបណ្តាលប្រទេសនានាដែលក្នុងនោះមានកម្ពុជាយើងផងដែរ ៕
ចែករំលែកព័តមាននេះ