រាជធានីភ្នំពេញ ៖ យ៉ាងហោចណាស់មនុស្ស៣នាក់បានស្លាប់ ចំណែក២នាក់ទៀតបានរងរបួសធ្ងន់ធ្ងរត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ នៅក្នុងឧប្បត្តិហេតុគ្រោះថ្នាក់ចរាចរដ៏រន្ធត់មួយដែលបង្កឡើងរវាងរថយន្តធុនធំដឹកដែក១គ្រឿងបុកជាមួយរថយន្តម៉ាកកាមរីឆ្លាម១គ្រឿងទៀតធ្លាក់ចូលក្នុងប្រឡាយទឹកស្អុយខាងលិចកន្លែងលក់សាច់ក្រកកំបូល តាមបណ្តោយផ្លូវជាតិលេខ៤ ស្ថិតនៅក្នុងភូមិគល់ សង្កាត់កន្ទោក ខណ្ឌពោធិ៍សែនជ័យ កាលពីវេលាម៉ោង៤និង៣០នាទីទៀបភ្លឺថ្ងៃទី៦ ខែមីនា ឆ្នាំ២០១៩ ។
ជនរងគ្រោះដែលស្លាប់ទាំង៣នាក់ និងអ្នករងរបួសធ្ងន់២នាក់ទៀតមិនទាន់ត្រូវបានស្គាល់អត្តសញ្ញាណនៅឡើយទេ ចំណែករថយន្តដឹកដែក ពណ៌ខៀវ ពាក់ស្លាកលេខ ព្រះសីហនុ ៤A-១៤៤៤ បើកបរដោយបុរសម្នាក់បានស្លាប់ និងប្រពន្ធជាអ្នករួមដំណើរបានរងរបួសធ្ងន់។ រីឯរថយន្តម៉ាកកាមរីឆ្លាម ពណ៌ប្រផេះ ពាក់ស្លាកលេខ ភ្នំពេញ ២H-២២៣៩ ជិះគ្នា៣នាក់ ក្នុងនោះស្លាប់២ និងរងរបួសធ្ងន់១នាក់។
តាមប្រភពព័ត៌មានពីសមត្ថកិច្ចបានឱ្យដឹងថា មុនពេលកើតហេតុ គេឃើញយុវជន៣នាក់ជិះក្នុងរថយន្តកាមរីឆ្លាមមួយគ្រឿងបើកបរក្នុងទិសដៅពីលិចទៅកើតក្នុងល្បឿនយ៉ាងលឿន ចំណែកឯរថយន្តកុងតឺន័រមានដឹកដែកជិះគ្នា២នាក់ប្តីប្រពន្ធធ្វើដំណើរក្នុងទិសដៅពីកើតទៅលិចបើកក្នុងល្បឿនលឿនដូចគ្នា ។
ប្រភពដដែលបានបន្តថា លុះមកដល់ចំណុចកើតហេតុ ដោយសារផ្លូវរាងកោងបន្តិច តែថយន្តកាមរីឆ្លាមមិនទាន់មកដល់ផ្លូវកោងស្រួលបួលផង បានបើករេចង្កូតមកផ្នែកខាងឆ្វេង ត្រូវបានរថយន្តកុងតឺន័រជាន់ហ្វ្រាំងអត់ទាន់បានបុករថយន្តកាមរីឆ្លាមពេញទំហឹងផ្នែកខាងស្តាំ បណ្តាលឲ្យរថយន្តម៉ាកកាមរីឆ្លាមខ្ទាតចូលប្រឡាយទឹក ចំណែកឯរថយន្តកុងតឺន័របានរេចង្កូតចូលប្រឡាយទឹកជាមួយគ្នាផងដែរ និងបានបុកដើមអំពិលទឹកបណ្តាលអោយដួលរលំផងដែរ ធ្វើឲ្យយុវជន២នាក់ដែលជិះក្នុងរថយន្តម៉ាកកាមរីឆ្លាមបាន និងយុវជនម្នាក់ទៀតបានរងរបួសធ្ងន់ ចំណែកអ្នកបើកបររថយន្តកុងតឺន័របានស្លាប់ រីឯស្ត្រីជាប្រពន្ធបានរងរបួសធ្ងន់ ។ បន្ទាប់ពីកើតហេតុ អ្នករងរបួសធ្ងន់ចំនួន២នាក់ត្រូវបានរថយន្តសង្គ្រោះរបស់ឯកជនបែកចានបានដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុ ចរាចរខណ្ឌពោធិ៍សែនជ័យបានប្រគល់ឱ្យខាងជំនាញចរាចររាជធានីភ្នំពេញធ្វើការវាស់វែង និងស្ទូចយករថយន្តទាំង២ខាងលើយកទៅរក្សាទុក ដើម្បីរង់ចាំការដោះស្រាយនៅពេលក្រោយ ៕
ចែករំលែកព័តមាននេះ