ខេត្តកំពង់ចាម ៖ ប្រដឹសឫស្សីកោះប៉ែន ដែលត្រូវបានបង្កើតឡើងដោយដៃ មានប្រវែងជាង៨០០ម៉ែត្រ
តភ្ជាប់ពីត្រើយក្រុងកំពង់ចាម ទៅកាន់ឆ្នេរខ្សាច់កោះប៉ែន និងជាតំបន់ទេសចរណ៍មួយតាមបែបធម្មជាតិក្នុងចំណោមតំបន់ទេសចរណ៍ជាច្រើនកន្លែង សម្រាប់ប្រយោជន៍ទាក់ទាញភ្ញៀវជាតិ-អន្តរជាតិមកលេងកម្សាន្តរាល់ថ្ងៃនេះ ។ ប៉ុន្តែសព្វថ្ងៃនេះ ប្រដឹសកោះប៉ែនកំពុងធ្វើឱ្យពលរដ្ឋមានក្តីកង្វល់ ដោយសារតែទឹកទន្លេមេគង្គបានហក់ឡើងខ្លាំងខុសប្រក្រតី នោះក៏ដោយសារការបើកទំនប់វារីអគ្គិសនីនៅផ្នែកខាងលើ ។
ពលរដ្ឋម្នាក់បានប្រាប់ឱ្យដឹងនៅព្រឹកថ្ងៃទី០៥ មីនា នេះដែរថា ប្រដឹសកោះប៉ែនត្រូវបានគេធ្វើឡើងនៅ
ក្នុងរដូវទឹកទន្លេស្រក ដែលកាលពីមុនមានលក្ខណៈធំទូលាយសម្រាប់ឲ្យមនុស្សដើរ ជិះកង់ ម៉ូតូ និងរថ
យន្តធុនតូច អាចបើកឆ្លងកាត់ទៅវិញទៅមកបាន ក្នុងគ្រាដែលមិនទាន់មានស្ពានបេតុងកោះប៉ែននេះ ។ ហើយប្រដឹសប្ញស្សីរាល់ថ្ងៃនេះ ធ្វើឡើងដោយគ្រាន់តែមនុស្សដើរមកលេងនៅឆ្នេរខ្សាច់កោះប៉ែនប៉ុណ្ណោះ ។ លោកបន្តថា ក្នុងរយៈពេល៣ថ្ងៃនេះទឹកទន្លេបានហក់ឡើងខ្លាំង ដោយនៅត្រង់ផ្នែកកណ្តាលប្រដឹសត្រូវបាននាំគ្នាជួសជុល ដោយបានយកបាវខ្សាច់ដាក់សង្កត់តាមជើងប្រដឹសឲ្យធ្ងន់ ការពារកុំឲ្យសណ្តករហើបឡើងដែលងាយនឹងរបូតហើយ អណ្តែតតាមខ្សែទឹកហូរទៅក្រោម ។
រហូតមកដល់ព្រឹកថ្ងែទី០៥មីនា រូបលោកមនុស្ស២នាក់ទៀត បានបន្តដើររឹតចងខ្សែលួសតាមបង្គោលណា ដែលមើលទៅរាងរលុងឫធូរនោះនឹងត្រូវរើបុកឲ្យណែនចូលក្នុងខ្សាច់ តែមើលទៅនៅថ្ងៃទីបីស្ថានភាពទឹកបានឡើងតិចៗអាចទុបទល់បានមិនមានបញ្ហារចោទឡើងនោះទេ។ ក្នុងករណីបើទឹកទន្លេបន្តហក់ឡើងត្រឹមកន្លះម៉ែត្របន្តទៀត ប្រដឹសត្រង់ផ្នែកកណ្តាលនឹងត្រូវដាច់របូតហូរតាមទឹក ដូចកាលលើកទី២ហើយ។
ទោះបីជាយ៉ាងណា លោកប៊ុន ដារ៉ា ជាម្ចាស់រមណីយដ្ឋានឆ្នេរខ្សាច់កោះប៉ែន នឹងខិតខំរកគ្រប់មធ្យោបាយដើម្បីឲ្យភ្ញៀវជាតិនិងអន្តរជាតិមក លេងកំសាន្តនៅឆ្នេរខ្សាច់កោះប៉ែន ។ ដោយឡែក លោកអ៊ុំ វិបុល ប្រធានមន្ទីរធនធានទឹក និងឧតុនិយមខេត្តវិញបានប្រាប់ដែរថា ទឹកទន្លេមេគង្គក្នុងរដូវប្រាំងដែលបានឡើងបន្តបន្ទាប់នោះ ដោយសារតែនៅផ្នែកខាងលើនៃទន្លេមេគង្គត្រូវបានគេបើកទំបន់វារីអគ្គីសនីទើបណ្តាលឲ្យនៅផ្នែកខាងក្រោមបានឡើងយ៉ាងដូច្នេះ តែមិនមានអ្វីដែលត្រូវរងផលប៉ះពាល់នោះទេ ទឹកទន្លេមេគង្គចាប់ពីថ្ងៃទី០១-០៤មីនា ២០១៩ ឡើង០,៤៤ម៉ែត្រ នៅព្រឹកថ្ងៃទី៥មីនា ទឹកស្រក០,០២ម៉ែត្រ ហើយបន្តស្រកបណ្តើរៗទៀត៕
ចែករំលែកព័តមាននេះ