រាជធានីភ្នំពេញ ៖ មន្ត្រីក្រសួងសាធារណការ និងដឹកជញ្ជូនបានអះអាងថាយ៉ាងហោចណាស់មានស្ពានអាកាសចំនួន៧ នឹងត្រូវសាងសង់នៅលើផ្លូវល្បឿនលឿនភ្នំពេញ-ក្រុងព្រះសីហនុ (Express way) បន្ថែមពីលើស្ពានតូច-ធំមួយចំនួនទៀត។ ក្នុងនោះផងដែរផ្លូវល្បឿនលឿនលើកដំបូងនៅស្រុកខ្មែរនេះគ្រោងនឹងបើកការដ្ឋាននាថ្ងៃទី ២២ ខែមីនា ក្រោមអធិបតីភាពសម្តេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ។
លោកវ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជួន មានប្រសាសន៍ឲ្យដឹងតាមទូរស័ព្ទនារសៀលថ្ងៃទី៤ ខែមីនា ឆ្នាំ២០១៩ នេះថា ការសាងសង់ផ្លូវប្រវែងប្រមាណជាង ១៩០គីឡូម៉ែត្រនេះ នឹងចំណាយរយៈពេល៤៨ខែ ដែលជាប្រភេទផ្លូវបង់លុយលើកដំបូងនៃផ្លូវល្បឿនលឿននៅកម្ពុជា ។ លោកបន្តទៀតថា តាមគំរោងផ្លូវនេះនឹងមានស្ពានតូចចំនួន៥ និងស្ពានប្រវែងមធ្យមទៅធំ ចំនួន៨០កន្លែង ពិសេសមានស្ពានអាកាសចំនួន៧ (សាគួរចំនួន១)ដែលនឹងធ្វើពីលើផ្លូវល្បឿនលឿនភ្នំពេញ-ក្រុងព្រះសីហនុ។ លោកបន្តថា «ផ្លូវល្បឿនលឿន» នេះ នឹងមានការសាងសង់របងបិទជិត ដោយមិនអនុញ្ញាត្តិឲ្យមានរម៉ក ម៉ូតូ ឬសត្វពាហណៈឆ្លងកាត់បាននោះទេ»។
ចំនុចចាប់ផ្តើមសម្រាប់ផ្លូវល្បឿនលឿនភ្នំពេញ-ក្រុងព្រះសីហនុ នឹងចេញពីតំបន់ទំនប់កប់ស្រូវ និងរត់ស្របតាមផ្លូវជាតិលេខ៤ផ្នែកខាងស្តាំដៃ រហូតជិតដល់ទីរួមខេត្តកំពង់ស្ពឺ និងត្រូវឆ្លងកាត់តំបន់នេះតាមរយៈស្ពានអាកាស ងាកទៅខាងឆ្វេងដៃវិញរហូតដល់ស្រុកព្រៃនប់ ខេត្តព្រះសីហនុ ទើបងាកមកកាន់ស្តាំដៃវិញ រហូតដល់មាត់សមុទ្រ។ ផ្លូវល្បឿនលឿនភ្នំពេញ-ក្រុងព្រះសីហនុ នេះ នឹងត្រូវបានសាងសង់ដោយក្រុមហ៊ុនChina Road and Bridge Corporation (CRBC) ដែលគ្រោងចំណាយថវិកាចំនួន ១៩០០លានដុល្លារអាមេរិក។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងអបអរសាទរ ដែលគំរោងនេះលេចជារូបរាងពិតប្រាកដ និងត្រៀមសាងសង់ដែលជាសមិទ្ឋិផលថ្មីមួយទៀតរបស់កម្ពុជា ដើម្បីដោះស្រាយបញ្ហាប្រឈមក្នុងសេដ្ឋកិច្ចកម្ពុជា ព្រោះបញ្ហាប្រឈមក្នុងសេដ្ឋកិច្ចរបស់យើងនៅមានដដែលៗ គឺបញ្ហាហេដ្ឋារចនាសម្ព័ន្ឋ ធនធានមនុស្ស និងថ្លៃទឹក ភ្លើងនៅមានតម្លៃថ្លៃធៀបជាមួយបណ្តាប្រទេសក្នុងតំបន់។ លោកបន្តថា «ចាប់ពីពេលនេះតទៅ រដ្ឋាភិបាលត្រូវបង្កើនការចំណាយកាន់តែច្រើនក្នុងការកសាងហេដ្ឋារចនាសម្ព័ន្ឋ ដើម្បីពន្លឿនកំណើនសេដ្ឋកិច្ចរបស់យើង» ។
យោងតាមហ្វេសប៊ុកផេកផ្លូវការរបស់ក្រសួងសាធារណការ និងដឹកជញ្ជួនចុះថ្ងៃទី ០៤ ខែមីនា បានបង្ហាញថា ផ្លូវនេះតភ្ជាប់ពីរាជធានីភ្នំពេញទៅខេត្តព្រះសីហនុ ដែលមានប្រវែងសរុប ១៩០.៣៦៥គ.ម សាងសង់ជាបួនគន្លង ដោយ២គន្លងទៅ ២គន្លងមក ជាប្រភេទផ្លូវក្រាលបេតុងកៅស៊ូ (AC) កំរាស់ ១០ ស.ម និងថ្មលាយកៅស៊ូ (ATB) ១២ ស.ម ពង្រីកទទឺងផ្លូវដល់ ២៤.៥ ម៉ែត្រ ខណ្ឌដោយសួនច្បារនៅកណ្ដាលទ្រូងផ្លូវ និងមានរបាំងអមសងខាងផ្លូវការពារសត្វ រឺមនុស្សឆ្លងកាត់ មានកន្លែងឈប់សម្រាកដែលមានលក្ខណៈងាយស្រួល មិនបង្កអោយមានការកកស្ទះចរាចរណ៍ ៕
ចែករំលែកព័តមាននេះ