ខេត្តកំពង់ឆ្នាំង ៖ រដ្ឋលេខាធិការក្រសួងសាធារណការ និងជាប្រធានក្រុមការងារអន្តរក្រសួង ឯកឧត្តមខាន់ ម៉ាណេ មានប្រសាសន៍ថា គោលបំណងនៃកិច្ចប្រជុំថ្ងៃនេះ គឺដើម្បីធ្វើការសិក្សាពិគ្រោះយោបល់ជាមួយបងប្អូនប្រជាពលរដ្ឋ និងអាជ្ញាធរលើគម្រោងកសាងផ្លូវលេខ៥០សេ…
ខេត្តកំពង់ឆ្នាំង ៖ រដ្ឋលេខាធិការក្រសួងសាធារណការ និងជាប្រធានក្រុមការងារអន្តរក្រសួង ឯកឧត្តមខាន់ ម៉ាណេ មានប្រសាសន៍ថា គោលបំណងនៃកិច្ចប្រជុំថ្ងៃនេះ គឺដើម្បីធ្វើការសិក្សាពិគ្រោះយោបល់ជាមួយបងប្អូនប្រជាពលរដ្ឋ និងអាជ្ញាធរលើគម្រោងកសាងផ្លូវលេខ៥០សេ ប្រវែងជាង៥៧គីឡូម៉ែត្រតភ្ជាប់ពីស្រុកកំពង់លែង ខេត្តកំពង់ឆ្នាំង ទៅកាន់ក្រុងស្ទឹងសែន ខេត្តកំពង់ធំ ដើម្បីរាយការណ៍ជូនសម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាពិនិត្យសម្រេច ។
មានប្រសាសន៍បែបនេះនៅក្នុងវេទិកាពិគ្រោះយោបល់រយៈពេលពេញមួយថ្ងៃកាលពីថ្ងៃទី០៤ ខែមីនា ឆ្នាំ២០១៩ ជាមួយប្រជាពលរដ្ឋឃុំច្រណូក ស្រុកកំពង់លែង ខេត្តកំពង់ឆ្នាំង និងប្រជាជននៅក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។ ឯកឧត្តមខាន់ ម៉ាណេ បានបញ្ជាក់ថា នៅក្នុងគម្រោងកសាងផ្លូវលេខ៥០សេ នេះតាមការសិក្សារបស់អន្តរក្រសួង គឺត្រូវធ្វើស្ពានធំ១មានប្រវែងជាង៤គីឡូម៉ែត្រឆ្លងទន្លេ និងស្ពានធំៗចំនួន៥ទៀតដែលមានប្រវែងពី៥០ម៉ែត្រទៅ១០០ម៉ែត្រនឹងត្រូវធ្វើលូប្រអប់ចំនួន១៥៩កន្លែង នៅតាមកំណាត់ផ្លូវប្រវែងជាង៥៧គីឡូម៉ែត្រដែលតភ្ជាប់រវាងខេត្តទាំងពីរ ។ តាមការសិក្សាគម្រោងកសាងស្ពានជាង៤គីឡូម៉ែត្រនេះត្រូវចំណាយប្រាក់ថវិកាជាង២០០លានដុល្លារ ចំណែកគម្រោងកសាងផ្លូវ៥០សេវិញ ត្រូវចំណាយថវិកាប្រមាណជាង៥០លានដុល្លារថែមទៀត ។
មូលហេតុគម្រោងមានចំនួនទឹកប្រាក់ដ៏ច្រើននេះហើយទើបប្រមុខរាជរដ្ឋាភិបាលបានចាត់តាំងបង្កើតមានឲ្យអន្តរក្រសួងពាក់ព័ន្ធចំនួន៦ក្រសួង គឺក្រសួងសាធារណការ ក្រសួងធន ធានទឹក ក្រសួងដែនដី ក្រសួងបរិស្ថាន ក្រសួងសេដ្ឋកិច្ចហិរញ្ញវត្ថុ និងក្រសួងកសិកម្ម ដើម្បីរួមគ្នាចុះសិក្សាពិគ្រោះយោបល់ជាមួយប្រជាពលរដ្ឋអំពីផលប៉ះពាល់ជាក់ស្តែង ដើម្បីបូកសរុបរាយការណ៍ជូនប្រមុខរាជរដ្ឋាភិបាលពិនិត្យ និងសម្រេច ហើយសម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជានឹងអាចប្រកាសជាផ្លូវការថា តើគម្រោងកសាងផ្លូវ៥៧គីឡូម៉ែត្រ និងស្ពានប្រវែងជាង៤គីឡូម៉ែត្រនេះត្រូវកសាង ឬក៏ត្រូវលុបចោលក្នុងពេល ដែលសម្តេចនឹងអញ្ជើញចូលរួមក្នុងពិធីសម្ភោធបើកបុណ្យទន្លេ នៅពាក់កណ្តាលខែមីនា នៅក្នុងខេត្តកំពង់ឆ្នាំងខាងមុខនេះ ។
នៅក្នុងវេទិកានេះលោក សំ ចាន់ថន អភិបាលស្រុកកំពង់លែងបានរាយការណ៍អោយដឹងថាស្រុកកំពង់លែងនៅកៀកទីរួមខេត្តកំពង់ឆ្នាំងដែលមានចម្ងាយតែជាង៤គីឡូម៉ែត្រតែប៉ុណ្ណោះ ប៉ុន្តែហាក់ដូចជា នៅឆ្ងាយសែនឆ្ងាយការធ្វើដំណើរទីរួមខេត្តកំពង់ឆ្នាំងមកកាន់ស្រុកកំពង់លែង តាមផ្លូវទូកកាណូតត្រូវឆ្លងទន្លេ៣ ជួបផលលំបាកក្នុងការចម្លងម៉ូតូ រថយន្ត និងដឹកជញ្ជូនទំនិញ ឬគ្រឿងសំណង់ផ្សេងៗបម្រើសេចក្តីត្រូវការរបស់ប្រជាពលរដ្ឋ ។
ដូច្នេះប្រសិនបើប្រមុខរាជរដ្ឋាភិបាលសម្រេចកសាងស្ពានឆ្លងកាត់ទន្លេទាំង៣ និងកសាងផ្លូវលេខ៥០សេខាងលើនេះមែនប្រជាពលរដ្ឋនៃខេត្តទាំងពីរ គឺកំពង់ឆ្នាំង និងកំពង់ធំ ពិតជាសប្បាយរីករាយណាស់ដែលអាចធ្វើអោយសេដ្ឋកិច្ចប្រជាពលរដ្ឋមានការរីកចម្រើនមានជីវភាពធូរធាមិនខានឡើយ ។
ដោយឡែកនៅក្នុងវេទិកានេះតំណាងប្រជាពលរដ្ឋជាង២០នាក់ក្នុងចំណោមប្រជាពលរដ្ឋចូលរួមជាង៣០០នាក់នៅក្នុងឃុំទាំង៧នៃស្រុកកំពង់លែងបានលើកឡើងថា ប្រជាពលរដ្ឋទាំងអស់ពិតជាសប្បាយរីករាយណាស់ ប្រសិនបើរាជរដ្ឋាភិបាលសម្រេចគម្រោងកសាងផ្លូវលេខ ៥០សេ និងស្ពាងប្រវែងជាង៤គីឡូម៉ែត្រខាងលើនេះមែន។ ព្រោះថា ស្ពាន និងផ្លូវនេះមានសារៈសំខាន់ខ្លាំងណាស់ចំពោះសេដ្ឋកិច្ចប្រជាពលរដ្ឋ សេដ្ឋកិច្ចជាតិ ពិសេស គីវិស័យទេសចរណ៍ ព្រោះស្រុកកំពង់លែងមានភ្នំ មានប្រាសាទ មានទន្លេ មានកោះនានា ដែលអាចទាក់ទាញភ្ញៀវទេសចរណ៍ឱ្យមកលេងកម្សាន្តបានយ៉ាងសប្បាយរីករាយ ។ ក្នុងឱកាសនោះលោកស៊ុន សុវណ្ណារិទ្ធ អភិបាលរង ខេត្តកំពង់ឆ្នាំង ក៏បានលើកឡើងដែរថាគម្រោងកសាងស្ពានជាង៤គីឡូម៉ែត្រឆ្លងកាត់ទន្លេនៅក្នុងខេត្តកំពង់ឆ្នាំង និងគម្រោងកសាងផ្លូវ៥០សេ តភ្ជាប់ពីស្រុកកំពង់លែងខេត្តកំពង់ឆ្នាំងទៅកាន់ខេត្តកំពង់ធំ គឺជាសេចក្តីត្រូវការដ៏ចាំបាច់របស់ប្រជាពលរដ្ឋគ្រប់ខេត្តទូទាំងប្រទេស ព្រោះថា ស្ពានថ្មី និងផ្លូវថ្មីនេះ អាចធ្វើឲ្យចរន្តសេដ្ឋកិច្ចជាតិមានការរីកចម្រើននៅលើគ្រប់វិស័យទាំងវិស័យដឹកជញ្ជូន វិស័យកសិកម្ម ពាណិជ្ជកម្ម និងវិស័យទេសចរណ៍ផងដែរ ដែលប្រជាពលរដ្ឋនៅគ្រប់ខេត្តក្រុងអាចធ្វើដំណើរឆ្លងកាត់បានយ៉ាងឆាប់រហ័ស ចំណេញទាំងថវិកា និងចំណេញទាំងពេលវលា ៕
ចែករំលែកព័តមាននេះ