ខេត្តកណ្ដាល ៖ បុរសជាជាងដែកម្នាក់បានឡើងលើជណ្ដើរដែកយកម៉ូទ័រស្វានបុក១គ្រឿងហុចឲ្យបុរសជាជាងដែកម្នាក់ទៀតដែលកំពុងស្ថិតនៅលើដំបូលសំយ៉ាបផ្ទះមួយកន្លែង ហើយសង្ស័យថា ខ្សែម៉ូទ័រស្វានបុកនោះមានដាច់រលាត់ហើយបានប៉ះជាមួយជណ្ដើរដែកបណ្ដាលឲ្យឆ្លងចរន្តឆក់បុរសនោះបណ្ដាលឲ្យរងរបួសធ្ងន់ និងបានស្លាប់នៅប៉ុន្មានម៉ោងក្រោយពេលបញ្ជូនដល់មន្ទីរពេទ្យព្រះកុសុមៈ ។
ហេតុការណ៍នោះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី០៤ ខែមីនា ឆ្នាំ២០១៩ នៅចំណុចទីតាំងធ្វើសំយាបផ្ទះរបស់ឈ្មោះ ឆាយ ប៉េងលី ស្ថិតនៅក្នុងភូមិបុរីកម្មករ ឃុំបែកចាន ស្រុកអង្គស្នួល ខេត្តកណ្តាល ។
បុរសរងគ្រោះខាងលើនោះឈ្មោះ អំ រស្មី អាយុ៣៧ឆ្នាំ ជនជាតិខ្មែរ មុខរបរជាងផ្សាដែក មានទីលំនៅក្នុងភូមិពងទឹក ឃុំបែកចាន ស្រុកអង្គស្នួល ខេត្តកណ្តាល ។
តាមសាក្សីម្នាក់ឈ្មោះ ឃួន ម៉េងលី ភេទប្រុស អាយុ៣៨ឆ្នាំ មុខរបរជាងផ្សរដែកជាមួយគ្នា មានទីលំនៅក្នុងភូមិព្រៃទន្លាប់ ឃុំបែកចាន ស្រុកអង្គស្នួល បានបំភ្លឺជូនឲ្យនគរបាលដឹងថា នៅមុនពេលកើតហេតុជនរងគ្រោះ និងរូបគាត់បាននៅផ្សាដែកសំយ៉ាបផ្ទះរបស់ឈ្មោះ ឆាយ ប៉េងលី នៅក្នុងភូមិបុរីកម្មករជាមួយគ្នា ដោយនៅខណៈនោះគាត់ស្ថិតនៅលើដំបូល ចំណែកជនរងគ្រោះនៅខាងក្រោម លុះដល់ពេលកើតហេតុគាត់បានឲ្យបុរសរងគ្រោះជួយហុចម៉ូទរ័ស្វានបុកឲ្យ ហើយជនរងគ្រោះបានកាន់ម៉ូទ័រស្វានបុកឡើងតាមណ្តើរដែកដើម្បីយហុចឲ្យគាត់ ។
ប្រភពដដែលបានបន្តថា ភ្លាមៗនោះគ្រាន់តែជើងជាន់លើកាំជណ្ដើរហើយដៃតោងឡើង ស្រាប់តែត្រូវចរន្តអគ្គីសនីឆក់ ហើយជនរងគ្រោះរូបនោះបានស្រែកថា«អូយឆក់» ក្រោយពេលស្រែកបានតែប៉ុណ្ណឹងក៏ធ្លាក់ដីទាំងកម្រោល និងសន្លប់ឈឹងតែម្ដង ។
បន្ទាប់ពីឃើញបែបនេះ គាត់បានចុះពីលើដំបូលសំយ៉ាបផ្ទះនោះជួយធ្វើចលនាបេះដូងជួយ ដែលជាការជួយសង្គ្រោះបឋម ប៉ុន្តែទោះជាខំប្រឹងជួយយ៉ាងណាក៏ជនរងគ្រោះ នៅតែអត់ដឹងខ្លួនដដែល ទើបនាំយកទៅកាន់មន្ទីរពេទ្យបង្អែកស្រុកអង្គស្នួល ។
ពេលនោះក្រុមគ្រូពេទ្យបានពិនិត្យមើលហើយឃើញស្ថានភាពធ្ងន់ធ្ងរពេក ទើបបញ្ជួនទៅសង្គ្រោះនៅមន្ទីរពេទ្យព្រះកុសុមៈវិញ លុះពេលទៅដល់គ្រូពេទ្យបានពិនិត្យមើល និងជួយ សង្គ្រោះអស់រយៈពេលច្រើនម៉ោង ប៉ុន្តែជួយមិនបានឡើយ ។ ក្រោយមកជនរងគ្រោះបានស្លាប់ទើបដឹកយកសពត្រឡប់មកផ្ទះវិញ និងរាយការណ៍ជូននគរបាលផ្នែកពិនិត្យ វិភាគកន្លែងកើតហេតុនៃអធិការដ្ឋាន ស្រុកអង្គស្នួលចុះទៅកាន់កន្លែងកើតហេតុ ។
ខណៈនោះក៏មានការចូលរួមពីនគរបាលប៉ុស្តិ៍រដ្ឋបាលបែកចាន មន្ត្រីក្រុមប្រឹក្សាឃុំ លោកគ្រូពេទ្យ លោកមេភូមិ និងប្រពន្ឋ ព្រមទាំងបងប្អូននៃសព បានធ្វើការពិនិត្យកោសល្យវិច័យលើសពជនរងគ្រោះ ។ លទ្ធផលនៃការពិនិត្យបានរកឃើញមានស្នាមខ្លោចប្រអប់ដៃទាំងពីរ និងប្រអប់ជើងខាងឆ្វេង មានរលាត់ខ្មៅ ចំណែកមេជើងមានស្នាមដាច់សាច់ផងដែរ ដែលបញ្ជាក់ជនរងគ្រោះស្លាប់ដោយសារចរន្តអគ្គិសនីឆក់ប្រាកដមែន ៕
ចែករំលែកព័តមាននេះ