រាជធានីភ្នំពេញ ៖ ថ្នាក់ដឹកនាំក្រសួង ពាណិជ្ជកម្មនាជំនួប ពិភាក្សាទ្វេភាគីជាមួយគណៈប្រតិភូនៃសាធារណៈរដ្ឋប្រជាមានិតចិន ដឹកនាំដោយ លោក លី ឆេងកាង (Li…
រាជធានីភ្នំពេញ ៖ ថ្នាក់ដឹកនាំក្រសួង ពាណិជ្ជកម្មនាជំនួប ពិភាក្សាទ្វេភាគីជាមួយគណៈប្រតិភូនៃសាធារណៈរដ្ឋប្រជាមានិតចិន ដឹកនាំដោយ លោក លី ឆេងកាង (Li Chenggang) អនុរដ្ឋមន្ត្រីក្រសួងពាណិជ្ជកម្មចិន បានស្នើដល់ភាគីចិនសម្រួលនីតិវីធី ដើម្បីអនុវត្តគោលការណ៍នាំចេញអង្ករទៅប្រទេសចិនឲ្យបាន ៤០០,០០០ តោន តាមការផ្ដល់ជូនរបស់ចិន ។ ដែលជំនូបទ្វេភាគីធ្វើឡើងនាថ្ងៃទី ២ ខែកុម្ភះ មុនពេលមុនពេលចូលរួម នៅក្នុងអន្តរកិច្ចប្រជុំថ្នាក់រដ្ឋមន្ត្រីលើកទី៧ ស្ដីពីកិច្ចព្រមព្រៀងភាពជាដៃគូគ្រប់ជ្រុងជ្រោយតំបន់ (RCEP) ដែលរៀបចំឡើងនៅទីក្រុងសៀមរាប។
នៅក្នុងកិច្ចពិភាក្សាទ្វេភាគីនេះរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ បានលើកការងារមួយចំនួនមកពិភាក្សាជាមួយភាគីចិនរួមមាន ការជំរុញរៀបចំកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន ដែលមានសារៈសំខាន់សម្រាប់ភាគីទាំងពីរ ក្នុងការធ្វើពាណិជ្ជកម្មទៅវិញទៅមក តាមក្របខណ្ឌនៃច្បាប់។ ជាការឆ្លើយតបពាក់ព័ន្ធនឹងការនាំចេញអង្ករ លោក លី ឆេងកាង បានបញ្ជាក់ថា ភាគីចិន និងកម្ពុជានឹងបន្តកិច្ចសហការជាមួយគ្នាឲ្យរឹតតែស៊ីជម្រៅ ដើម្បីសម្រេចបានគោលដៅនាំចេញនេះ ហើយជាមួយនោះដែរ ភាគីទាំងពីរនឹងបន្តប្រឹក្សា ជាមួយគ្នាបន្ថែមទៀតលើឯកសារដែលចាំបាច់ សម្រាប់សម្រួលដល់វិស័យកសិកម្មកម្ពុជា។
យ៉ាងណាមិញប្រទេសចិន គឺជាទីផ្សារធំទី ១ សម្រាប់កម្ពុជានាំចេញអង្ករ ជាក់ស្តែងក្នុងខែមករា កន្លងទៅនេះ កម្ពុជាបាននាំអង្ករទៅកាន់ទីផ្សារប្រទេសចិនមានប្រមាណជាង ១,៧ម៉ឺនតោន ។ នៅដើមឆ្នាំ២០១៩នេះ កម្ពុជានាំចេញអង្ករទៅក្រៅប្រទេសមានជាង៥,៩ម៉ឺនតោន ក្នុងនោះប្រមាណជាង១,៧ម៉ឺនតោននាំចេញទៅទីផ្សារប្រទេសចិន។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។ តាមរបាយការណ៍ដដែលបញ្ជាក់ថា៖« ក្នុងខែមករាឆ្នាំ២០១៩នេះកម្ពុជាបាននាំចេញអង្ករទៅកាន់ទិសដៅ៣៥ប្រទេស ក្នុងនោះប្រទេសចិនឈរលំដាប់ទី១ មានចំនួន ១,៧ម៉ឺនតោន, ប្រទេសបារាំងឈរលំដាប់ទី២ មានប្រមាណជាង៩,៦ពាន់តោន, ប្រទេសម៉ាឡេស៊ីឈរលំដាប់ទី៣ មានចំនួន ជាង៥,១ពាន់តោន, ប្រទេសហ្គាបុងឈរលំដាប់ទី៤មាន៤,៧ពាន់តោន,ប្រទេសប្រ៊ុយណេឈរលំដាប់ទី៥ មានជាង២,៩ពាន់តោន, ប្រទេសអេស្ប៉ាញឈរលំដាប់ទី៦ មានជាង១,៩ពាន់តោន ប្រទេសអាល្លឺម៉ង់ឈរលំដាប់ទី៧មានជាង១,៨ពាន់តោន,ប្រទេសណេដឺឡែនឈរលំដាប់ទី៨មានជាង១,៧ពាន់តោន, ប្រទេសឆែកឈរលំដាប់ទី៩មានជាង១,៦ពាន់តោន និងប្រទេសអូស្ត្រាលីឈរលំដាប់ទី១០ មានជាង១,៤ពាន់តោន »។
បើតាមនាយិការប្រតិបត្តិអង្គការជំនាញខាងកសិកម្មមួយក្នុងស្រុកមើលឃើញថាកម្ពុជានាំចេញអង្ករបានច្រើនទៅប្រទេសចិននៅមួយរយៈចុងក្រោយនេះ គឺដោយសារតែប្រមុខថ្នាក់ដឹកនាំនៃប្រទេសទាំងពីរមានទំនាក់ទំនងយ៉ាងជិតស្និតល្អជាមួយគ្នា ។ អ្នកស្រី តុង ចាន់ធាង នាយិការប្រតិបតិ្តអង្គការសេដាក មានប្រសាសន៍ថា «ប្រទេសចិន មានប្រជាជនច្រើនហើយត្រូវការបរិភោគក៏ច្រើនដែរ ។ ពិសេសស្រូវ តាមខ្ញុំដឹងប្រទេសចិនមិនអាចផលិតសម្រាប់ផ្គត់ផ្គង់ក្នុងស្រុកបាននោះទេ អីចឹងតម្រូវការនាំចូលអង្ករពីប្រទេសជិតនិងពីប្រទេសកម្ពុជានៅថ្ងៃមុខទៀតអាចនឹងមានច្រើនថែមទៀត បន្ទាប់ថ្នាក់ដឹកនាំប្រទេសទាំងពីរបង្ហាញទំនាក់ទំនងល្អទៅវិញទៅមក»។ ឆ្លើយតបនឹងសំនួរដែលចោទសួរថា មួយរយៈចុងក្រោយនេះកម្ពុជានាំចេញអង្ករមានចំនួនច្រើន ចុះបើក្នុងករណីនៅពេលខាងមុខតម្រូវការអង្ករពីប្រទេសចិនមានថមថយ តើអាចនឹងមានការប៉ះពាល់ដល់ការផលិតផលស្រូវអង្ករកម្ពុជាឬទ0x017d7 អ្នកស្រីតុង ចាន់ធាង បានបញ្ជាក់យ៉ាងដូច្នេះថា «ខ្ញុំយល់ថា វាដូចមិនមានការប៉ះពាល់អ្វីទេ ដល់វិស័យកសិកម្មកម្ពុជា។ ព្រោះកន្លងមកការនាំចេញអង្ករកម្ពុជាមិនផ្តោតខ្លាំងតែទៅទីផ្សារចិននោះទេ វាទើបតែមានថ្មីៗនេះ។ ក្រៅពីចិនកម្ពុជាអាចនាំចេញទៅទីផ្សារប្រទេសផ្សេងៗ»។
លោក ឧកញ៉ា សុង សារ៉ន អគ្គនាយកក្រុមហ៊ុន អេមរុ រាយស៍ មានប្រសាសន៍ថា ទីផ្សារប្រទេសចិនឥឡូវមានសារៈសំខាន់ខ្លាំងណាស់ នៅឆ្នាំនេះដោយសារទីផ្សារចិនមានតម្រូវការបញ្ជាទិញច្រើនជាងឆ្នាំមុនៗ ។ យើងមើលទៅមានចំនួន៤០ម៉ឺនតោនដែលចិនត្រូវបញ្ជាទិញ អីចឹងវាជាទីផ្សារសំខាន់មួយសម្រាប់យើង»។
លោកឧកញ៉ា បន្តថា « ទីផ្សារចិនមានសារៈសំខាន់រហូត មិនថានៅពេលបច្ចុប្បន្ន ឬអនាគតទេ ។ គាត់ត្រូវការអង្ករដែលមានគុណភាពខ្ពស់ ហើយតម្លៃសមរម្យ ។ តែនៅពេលខ្លះ តម្លៃអង្ករយើងវាមិនទាន់សមរម្យ ក៏ធ្វើឱ្យភាគីចិនមិនទាន់ហ៊ានទិញអង្ករកម្ពុជាយើងដែរ ។ ដូចនេះវាអាស្រ័យទៅលើតម្លៃអង្ករកម្ពុជាដែរ តែបើតម្លៃអង្ករយើងមានតម្លៃប្រកួតប្រជែងយើងអាចពង្រីកតម្រូវការអង្ករបានច្រើនជាងមុន ព្រោះជាទូទៅចិនជាទីផ្សារសំខាន់សម្រាប់អង្ករក្រអូប អីចឹងបើតម្លៃយើងសមរម្យ ខ្ញុំជឿថាគាត់អាចនឹងបញ្ជាទិញលើសផែនការឆ្នាំ២០១៨»។
ទាក់ទងសំនួរថាបើតម្រូវការអង្ករពីចិនថមថយវាអាចនឹងធ្វើឱ្យប៉ះពាល់វិស័យកសិកម្មនិងការនាំចេញកម្ពុជាទ0x017d7 លោកឧកញ៉ាថា សម្រាប់វិស័យឯកជនមិនទាន់ហ៊ាននិយាយថ្នាក់កម្រិតនេះទេថា វាអាចនឹងប៉ះពាល់ឬមិនប៉ះពាល់បាននោះទេ សំខាន់ទាល់តែមានស្ថាប័នពាក់ព័ន្ធចុះវាយតម្លៃនិងស្រាវជ្រាវត្រឹមត្រូវពីផលប៉ះពាល់។ បើតាមរបាយកាណ៍ក្រសួងកសិកម្ម បញ្ជាក់ថា នៅពេលបច្ចុប្បន្នការនាំចេញអង្ករ មានក្រុមហ៊ុនចំនួន ៥០។ ក្នុងខែមករា ឆ្នាំ២០១៩ នេះ ការនាំចេញអង្ករចេញតាមរយៈច្រកចេញ-ចូលតែមួយ គឺមានបរិមាណសរុបចំនួនជាង ៥,៩ម៉ឺនតោន មានការថយចុះចំនួន ២.៩៩៨តោន ស្មើនឹងប្រមាណ៥% បើប្រៀបធៀបនឹងបរិមាណនាំចេញក្នុងខែមករា ២០១៨ ៕
ចែករំលែកព័តមាននេះ