រាជធានីភ្នំពេញ ៖ នៅប៉ុន្មានឆ្នាំចុងក្រោយនេះគេសង្កេតឃើញថា វិនិយោគិនបរទេស ជាពិសេសគឺមកពីប្រទេសចិន និងហុងកុង សម្រុកបោះទុននៅប្រទេសកម្ពុជាមានចំនួនកើនឡើងជាបន្តបន្ទាប់ រាប់ចាប់ពីវិស័យកាត់ដេរ រហូតអចលនទ្រព្យនិងសំណង់លំនៅឋាន ។ តើការកើនឡើងនូវចំនួនវិនិយោគិនបរទេសមករកស៊ីនៅកម្ពុជាមានកត្តាជំរុញសំខាន់ៗអ្វីខ្លះ ?
បើតាមអ្នកវិនិយោគិនមកពីហុងកុង ក៏ដូចជាអ្នកជំនាញក្នុងវិស័យអចលនទ្រព្យកម្ពុជា ឲ្យដឹងថាប្រទេសកម្ពុជាមានកត្តាសំខាន់ៗចំនួន៣ ដែលជំរុញឱ្យអ្នកវិនិយោគិនបរទេស សម្រេចចិត្តបោះទុនវិនិយោគលើការសាងសង់បុរីលំនៅឋាន ក៏ដូចជាការវិនិយោគលើវិស័យអចលទ្រព្យនៅកម្ពុជា។ លោក Nixon Lee នាយកប្រតិបត្តិនៃក្រុមហ៊ុន PENTA GLOBAL ដែលកំពុងតែវិនិយោគលើគម្រោងបុរី មួយកន្លែងនៅប្រទេសកម្ពុជាមានប្រសាសន៍ឲ្យដឹងថា «ហេតុផលដែលយើងចូលមកវិនិយោគនៅកម្ពុជាមានកត្តាសំខាន់ចំនួន៣៖ ១- យើងមើលឃើញថា មិនមានហានិភ័យទៅលើអត្រាប្តូរប្រាក់ដុល្លារហុងកុង វាផ្សារភ្ជាប់ជាមួយប្រាក់ដុល្លារអាមេរិក ដោយសារនៅកម្ពុជាមានការប្រើប្រាស់ដុល្លារអាមេរិកទូលំទូលាយ។ ដូចនេះយើងមិនមានហានិភ័យទៅលើអត្រាប្តូរប្រាក់ទេ។ ២- នៅ២ទសវត្សរ៍ចុងក្រោយនេះកម្ពុជាមានស្ថិរភាពនយោបាយនិងសេដ្ឋកិច្ចល្អប្រសើរ ហើយយើងមានការរំពឹងនិងមានការប៉ាន់ប្រមាណទុកថា សេដ្ឋកិច្ចកម្ពុជាបន្តមានកំណើនតទៅមុខទៀត។ ដូចនេះសម្រាប់យើងក្នុងនាមជាអ្នកវិនិយោគមានអារម្មណ៍ស្ងប់ចិត្តនៅពេលឃើញសេដ្ឋកិច្ចកម្ពុជាបន្តមានស្ថិរភាព និង៣- យើងមើលឃើញយុវវ័យ នៅក្នុងប្រទេសកម្ពុជាមានចំនួនច្រើន។ មានន័យថានៅពេលខាងមុខ យុវវ័យនៅកម្ពុជានឹងមានតម្រូវការផ្ទះបែបទាន់សម័យមានច្រើន ហើយវាឆ្លើយតបទៅគោលដៅរបស់ក្រុមហ៊ុនដែលបានកំណត់ទុក»។
បើតាមលោក Nixon Lee ក្រុមហ៊ុនជ្រើសរើសយកការវិនិយោគលើផ្នែកបុរី (ផ្ទះ ល្វែង) នៅកម្ពុជា ព្រោះគិតថាតម្រូវការក្នុង ស្រុកមានច្រើន ហើយម្យ៉ាងទៀតការវិនិយោគលើផ្នែកនេះវាមិនសូវមានហានិភ័យ។ ក្នុងនោះផងដែរ អ្នកជំនាញក្នុងវិស័យអចលនទ្រព្យកម្ពុជា យល់ស្របថា ជាទូទៅកត្តាទាំង៣ខាងលើនេះគឺជាកត្តាចម្បងសំខាន់សម្រាប់អ្នកវិនិយោគ ក្នុងការធ្វើសេចក្តីសម្រេចចិត្តក្នុងការវិនិយោគ។
លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ថា៖ « ចំណុចទាំង៣ខាងលើនេះ វាគឺជាកត្តាសំខាន់ដែលអ្នកវិនិយោគតែងតែសិក្សាមុននឹងធ្វើការបោះទុនវិនិយោគ ។ គេ (វិនិយោគិន) ចូលមកវិនិយោគនៅកម្ពុជាដោយសារគេមើលឃើញតម្រូវការផ្ទះ ពីប្រជាពលរដ្ឋពីមួយឆ្នាំៗមានចំនួនច្រើន ស្របទៅនិងចំនួនយុវជនបន្តមានការកើនឡើង» ។
បើតាមអ្នកជំនាញរូបនេះលើកឡើងថា នៅប៉ុន្មានខែដើមឆ្នាំ២០១៩ នេះក្នុងវិស័យអចលនទ្រព្យកម្ពុជាមានការប្រែប្រួលបង្ហាញពីសញ្ញាងើបឡើងវិញបន្តិច បើប្រៀបធៀបទៅនិងចុងឆ្នាំ២០១៨មានភាពស្ងប់ស្ងាត់។ ជាក់ស្តែងកម្ពុជាមានកំណើនប្រជាសាស្ត្រ ១,៥% មានធនធានមនុស្សកាន់តែប្រសើរ មានស្ថិរភាពម៉ាក្រូសេដ្ឋកិច្ច មានអតិផរណាទាប និងអាត្រាប្តូរប្រាក់មានស្ថិរភាព អនុវត្តប្រព័ន្ធសេដ្ឋកិច្ចទីផ្សារ មានការលើកទឹកចិត្តដល់ការវិនិយោគ ដោយច្បាប់ សេវារដ្ឋបាល ដែលបម្រើដល់ធុរកិច្ចមានភាពងាយស្រួល ជាពិសេសការអនុវត្តប្រព័ន្ធច្រកចេញចូលតែមួយ របបកម្មសិទ្ធិដីធ្លីមានប្រព័ន្ធសុរិយោដីចុះបញ្ជីច្បាស់លាស់ តាមគោលការណ៍នីតិរដ្ឋ ។
នេះបើយោងតាមប្រសាសន៍ លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងក្នុងវេទិកាសាធារណៈ ឯកជនស្តីពី «ការអភិវឌ្ឍនគរូបនីយកម្មកម្ពុជា-ជប៉ុន» នៅសណ្ឋាគារកាំបូឌីយ៉ាណា កាលថ្ងៃទី ២៧ ខែកុម្ភៈ ថ្មីៗកន្លងទៅនេះ ។
លោករដ្ឋមន្ត្រី មានប្រសាសន៍សង្កត់ធ្ងន់ថា ៖ «រាជរដ្ឋាភិបាលកម្ពុជា បានដាក់ចេញនូវគោលនយោបាយដ៏ត្រឹមត្រូវ ក្នុងការអភិវឌ្ឍវិស័យឯកជននិងទាក់ទាញការវិនិយោគ និងបានផ្តល់ការអនុគ្រោះយ៉ាងច្រើនដល់វិនិយោគិនបរទេស ចំពោះសិទ្ធិលើអចលនទ្រព្យតាមច្បាប់កម្ពុជា»៕
ចែករំលែកព័តមាននេះ