រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជាបានបញ្ជាក់ឲ្យដឹងថា បើទោះបីកម្ពុជាត្រូវធ្វើការកែប្រែច្បាប់ លិខិតបទដ្ឋានគតិយុត្តិរបស់ខ្លួនយ៉ាងណាក៏ដោយ កម្ពុជានឹងធ្វើឲ្យបាននូវការកែប្រែណាមួយ ដើម្បីសម្រេចបាននូវកិច្ចព្រមព្រៀង ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ហៅកាត់ថា (RCEP) ។
ថ្លែងបើកអន្តរកិច្ចប្រជុំថ្នាក់រដ្ឋមន្ត្រីលើកទី៧ ស្តីពី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (THE 7th REGIONAL COMPREHENSIVE ECONOMIC PARTNERSHIP INTERSESSIONAL MINISTERIAL MEETING -7th RCEP ISSL MM) ប្រព្រឹត្តទៅ ចាប់ពីថ្ងៃទី២-៤ ខែមីនា នៅសណ្ឋាគារ សុខាខេត្តសៀមរាប ដែលកម្ពុជាធ្វើជាម្ចាស់ផ្ទះនិងចូលរួមដោយរដ្ឋមន្ត្រីពាណិជ្ជកម្ម មកពីប្រទេសសមាជិក ចំនួន ១៦ រួមមាន៖ ប្រទេសសមាជិកអាស៊ាន ១០ និងប្រទេសដៃគូ ៦ ទៀត រួមមាន៖ ចិន អូស្ត្រាលី ជប៉ុន កូរ៉េខាងត្បូង ឥណ្ឌា និងណូវ៉ែលហ្សេឡង់នោះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្តល់អនុសាសន៍ ៣ចំណុច និងប្រកាសថា ជោគជ័យនៃកិច្ចប្រជុំ RCEP នេះនឹងអាចជម្រុញឲ្យសេដ្ឋកិច្ចអាស៊ានកាន់តែល្អប្រសើរផងដែរ ។ សម្តេចក៏បានអំពាវនាវដល់ប្រទេសជាសមាជិក ដែលចូលរួមចរចា ត្រូវចាត់ទុកការចរចានាពេលនេះ គឺជាដំណើរការឈ្នះឈ្នះ។
សម្តេចតេជោ ហ៊ុន សែន បានគូសបញ្ជាក់ថា កិច្ចព្រមព្រៀងពាណិជ្ជកម្ម ដែលយើងខិតខំសម្រេចឲ្យបាននៅក្នុងឆ្នាំ២០១៩នេះ វាមិនមែនគ្រាន់តែជាបញ្ហាសេដ្ឋកិច្ចធម្មតានោះទេ ក៏ប៉ុន្តែវានឹងធ្វើឲ្យជោគជ័យកើតឡើង សម្រាប់ជាទស្សនាទាន ស្តីអំពី ឥណ្ឌូប៉ាស៊ីហ្វិក បើកចំហសេរី ផងដែរ។ ប្រមុខដឹកនាំរាជរដ្ឋាភិបាលកម្ពុជា បានគូសបញ្ជាក់ថា ប្រសិនបើកិច្ចព្រមព្រៀង RCEP នេះបានចេញរួច វាក៏ជាផ្នែកមួយលើសជាងពាក់កណ្តាលនៃជោគជ័យនៃទស្សនាទានទាំងឡាយ ដែលបានដាក់ចេញក្នុងរយៈពេលកន្លងទៅ។ ប្រសិនបើកិច្ចព្រមព្រៀងនេះ ត្រូវបានសម្រេច ជំនឿទុកចិត្តនៅក្នុងក្របខណ្ឌតំបន់របស់យើង មិនមែនគ្រាន់តែការរកស៊ីខាងសេដ្ឋកិច្ចទេ បញ្ហានយោបាយ និងបញ្ហាដទៃទៀត ក៏នឹងត្រូវសម្របសម្រួលគ្នា។
សម្តេចតេជោ ហ៊ុន សែន មានប្រសាសន៍សង្កត់ធ្ងន់ថា «បើទោះបីជាកម្ពុជា ត្រូវធ្វើការកែប្រែច្បាប់របស់ខ្លួន លិខិតបទដ្ឋានគតិយុត្តិរបស់ខ្លួន ដើម្បីឲ្យស្របទៅនឹងកិច្ចព្រមព្រៀងក្នុងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP នេះ ក៏យើងត្រូវតែធ្វើ ដូចដែលកម្ពុជា ធ្លាប់បានធ្វើក្នុងការកែប្រែច្បាប់របស់ខ្លួន ដើម្បីតម្រូវទៅតាមការទាមទារនៃអង្គការពាណិជ្ជកម្មពិភពលោកផងដែរ » ។
ជាមួយគ្នានោះផងដែរ សម្តេចតេជោ ហ៊ុន សែន បានផ្តល់នូវអនុសាសន៍សំខាន់ៗចំនួន ៣ សំដៅពន្លឿនការបង្កើតតំបន់ពាណិជ្ជកម្មសេរី RCEP ដ៏ពេញលេញមួយ ទៅតាមការចង់បានរបស់ប្រទេសទាំងអស់ ៖ ១- ភាគីទាំងអស់ ត្រូវចាត់ទុកកិច្ចចរចានេះ គឺជាដំណើរការឈ្នះ-ឈ្នះ ដែលលទ្ធផលចុងក្រោយនៃកិច្ចព្រមព្រៀងនេះ នឹងផ្តល់អត្ថប្រយោជន៍ ដល់ភាគីទាំងអស់ ទោះជាក្នុងកម្រិតខុសគ្នាក៏ដោយ ។ ២- បើទោះជាមានរបៀបវារៈសេដ្ឋកិច្ចផ្សេងៗគ្នា ភាគីចរចាទាំងអស់ ត្រូវនាំគ្នាពិនិត្យមើលទិដ្ឋភាពរួម នៃសក្កានុពល និងអត្ថប្រយោជន៍ដ៏ធំនៃកិច្ចព្រមព្រៀង RCEP ដើម្បីឲ្យដំណើរការនៃកិច្ចចរចានេះ អាចជំនះឧបសគ្គដែលនៅសេសសល់ ។ ៣- សូមរដ្ឋមន្ត្រីនៃប្រទេសចូលរួមទាំងអស់ គោរពឆន្ទៈនយោបាយ និងផ្តល់ការណែនាំដល់សមាជិកនៃគណៈកម្មការចរចាពាណិជ្ជកម្មរបស់យើង នូវភាពទន់ភ្លន់ និងការយោគយល់គ្នា ស្របតាមគោលការណ៍ណែនាំ ដែលបានឯកភាពគ្នាកាលពីឆ្នាំ២០១២ ជាពិសេសផ្តល់នូវប្រព្រឹត្តិកម្មពិសេស (ការអនុគ្រោះពន្ធ) និងការបើកច្រកទីផ្សារដល់ប្រទេសអភិវឌ្ឍន៍តិចតួច ដែលទំហំសេដ្ឋកិច្ចតូចនៅឡើយ ។
លោក ស៊ាង ថៃ អ្នកនាំពាក្យក្រសួង ពាណិជ្ជកម្ម ធ្លាប់ប្រាប់កោះសន្ដិភាពថា RCEP ជាកិច្ចព្រមព្រៀងមួយដ៏ធំ ព្រោះយើងដឹងថាប្រទេសអាស៊ានទាំង១០ បូកជាមួយនឹងប្រទេសផ្សេងៗទៀត អីចឹងទំហំពាណិជ្ជកម្មគឺវាធំ ដូច្នេះមានការចរចាច្រើនដង ច្រើនឆ្នាំមកហើយ ប៉ុន្តែវាជាការចរចារគ្រប់ជ្រុងជ្រោយ ព្រោះមិនមែនជាការចរចាតែមួយបញ្ហានោះទេ ។ លោកបានបញ្ជាក់ថាបើ RCEP ត្រូវបានបញ្ចប់ នោះកម្ពុជានឹងមិនភ័យព្រួយពីការគៀបសង្កត់ទីផ្សារនេះ ឬទីផ្សារនោះទេ ។
ជាក់ស្តែង រដ្ឋាភិបាលអូស្ត្រាលី បានបញ្ជាក់ថាខ្លួន បានប្តេជ្ញាចិត្តក្នុងការពង្រឹងទំនាក់ទំនងសេដ្ឋកិច្ចជាមួយតំបន់ដែលមានថាមភាពបំផុតនៅក្នុងពិភពលោក។ បណ្តាប្រទេស RCEP មានចំនួនជាង ៦០% នៃពាណិជ្ជកម្មទ្វេភាគីរបស់អូស្ត្រាលី ។ នេះបើយោងតាមការប្រកាសរបស់ស្ថានទូតអូស្ត្រាលីនៅកម្ពុជា។
ការប្រកាសរបស់ស្ថានទូតអូស្ត្រាលីនៅកម្ពុជាបានបញ្ជាក់ថា «កិច្ចប្រជុំជុំថ្មីនេះនឹងផ្តល់ឱកាសមួយដើម្បីជំរុញការចរចាឆ្ពោះទៅរកកិច្ចព្រមព្រៀងដែលមានគុណភាពខ្ពស់ដែលរួមបញ្ចូលប្រទេសអូស្ត្រាលីបន្ថែមទៀតនៅក្នុងតំបន់និងបង្កើតឱកាសថ្មីៗនិងឱកាសពាណិជ្ជកម្មសម្រាប់តំបន់របស់យើង» ។
សូមបញ្ជាក់ថាកិច្ចព្រមព្រៀង RCEP ជាកិច្ចព្រមព្រៀងពាណិជ្ជកម្មសេរីតំបន់ ដែលកំពុងស្ថិតក្នុងដំណាក់កាលនៃការចរចាដោយមានប្រទេសចំនួន ១៦ ចូលរួម ។ កិច្ចព្រមព្រៀងនេះជាគំនិតផ្តួចផ្តើមរបស់អាស៊ាន ដែលផ្អែកលើកុងសង់ស៊ីសសម្រាប់ការធ្វើសេចក្តីសម្រេចចិត្ត ដែលបានប្រកាសឲ្យចាប់ផ្តើមចរចាក្នុងឆ្នាំ២០១២ នៅកម្ពុជា។ RCEP មានទំហំផលិតផលក្នុងស្រុកសរុប (GDP) ជិត ៣០% នៃ GDP ពិភពលោក (គិតត្រឹមឆ្នាំ ២០១៤) មានប្រជាជនស្ទើរតែពាក់កណ្តាលនៃចំនួនប្រជាជនពិភពលោកសរុបមាន ៣១,៦% នៃផលិតកម្មពិភពលោក និង ១/៥ នៃលំហូរវិនិយោគផ្ទាល់ពីបរទេសរបស់ពិភពលោក (គិតត្រឹមឆ្នាំ ២០១៦)។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មកម្ពុជាចុះថ្ងៃទី ២ខែកុម្ភះ ឆ្នាំ ២០១៩ ៕
ចែករំលែកព័តមាននេះ