រាជធានីភ្នំពេញ ៖ យុវជនម្នាក់បានបែកក្បាលស្លាប់ភ្លាមៗនៅនឹងកន្លែង ចំណែកម្នាក់ទៀតរងរបួសធ្ងន់ធ្ងរ ខណៈជនរងគ្រោះទាំង២ជិះម៉ូតូ១គ្រឿងបើកបរក្នុងល្បឿនលឿនជែងយានយន្តនៅខាងមុខជាបន្តបន្ទាប់ ហើយជ្រុលទៅបុកជាមួយរថយន្តយីឌុបមួយគ្រឿងទៀតដែលកំពុងបើកបរក្នុងទិសដៅបញ្ច្រាសគ្នាយ៉ាងពេញទំហឹង។
គ្រោះថ្នាក់ចរាចរដ៏រន្ធត់នេះបានកើតឡើងកាលពីវេលាម៉ោង៦និង៥០នាទីព្រឹកថ្ងៃទី៤ ខែមីនា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ភាគីខាងម៉ូតូមួយគ្រឿងខាងលើជិះគ្នា២នាក់ម៉ាកហុងដាឌ្រីម ធុនសេ១២៥ ស៊េរីឆ្នាំ២០០៣ ពណ៌ខ្មៅ ពាក់ស្លាកលេខ ភ្នំពេញ ១B-២៧៣៩ បើកបរដោយយុវជនម្នាក់មិនស្គាល់អត្តសញ្ញាណ មានអាយុប្រហែលជាង២០ឆ្នាំ បានស្លាប់នៅនឹងកន្លែងកើតហេតុ ចំណែកយុវជនម្នាក់ទៀតជាអ្នករួមដំណើរមិនស្គាល់អត្តសញ្ញាណ មានអាយុប្រហែលជាង២០ឆ្នាំ បានរងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យ ។
រីឯភាគីខាងរថយន្តយីឌុបមួយគ្រឿងម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ តាកែវ ៣A-១៩១២ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ស្រមោល។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញយុវជនរងគ្រោះទាំង២នាក់ខាងលើជិះម៉ូតូ១គ្រឿងឌុបគ្នាធ្វើដំណើរក្នុងទិសដៅពីលិចទៅកើតក្នុងល្បឿនយ៉ាងលឿនជែងយានយន្តនៅខាងមុខជាបន្តបន្ទាប់ ។
ប្រភពដដែលបានបន្តថា លុះមកដល់ត្រង់ចំណុចកើតហេតុ ម៉ូតូរបស់ជនរងគ្រោះបានវាក់ជាមួយរថយន្តយីឌុបដែលកំពុងបើកបរក្នុងទិសដៅបញ្ច្រាសគ្នា ពេលនោះម៉ូតូរបស់ជនរងគ្រោះមិនអាចគេចទៅខាងណាបានឡើយ ក៏ជ្រុលទៅបុកយ៉ាងពេញទំហឹងជាមួយរថយន្តនោះ បណ្ដាលឲ្យជនរងគ្រោះទាំង២នាក់ដួលគរលើគ្នា ហើយយុវជនម្នាក់ជាអ្នកបើកបរម៉ូតូបែកក្បាលស្លាប់ក្នុងថ្លុកឈាម និងយុវជនម្នាក់ទៀតជាអ្នករួមដំណើរបានរងរបួសធ្ងន់ធ្ងរត្រូវបាននគរបាលបញ្ជូន ទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗផងដែរ ។ ចំណែកម៉ូតូនៅក្រោមរថយន្តតែម្ដង។ រីឯអ្នកបើកបររថយន្តយីឌុបបានរត់គេចខ្លួនបាត់ស្រមោល ។
ក្រោយពេលកើតេតុ នគរបាលចរាចរខណ្ឌពោធិ៍សែនជ័យ និងនគរបាលប៉ុស្តិ៍ចោមចៅ៣បានសហការគ្នាចុះធ្វើការវាស់វែង និងសម្រួលចរាចរដែលកកស្ទះនៅតាមមហាវិថីឈ្នះឈ្នះ ហៅផ្លូវអូរដឹមកប់ស្រូវនិងផ្លូវជាតិលេខ៤ រួចបានយករថយន្តនិងម៉ូតូទៅរក្សាទុក ព្រមទាំស្រាវជ្រាវរកក្រុមគ្រួសារជនរងគ្រោះទាំង២នាក់នេះផងដែរ៕
ចែករំលែកព័តមាននេះ