រាជធានីភ្នំពេញ ៖ រថយន្តកូរ៉េដឹកទឹកកមួយគ្រឿងបើកបោះពួយលឿនជ្រុលទៅបុកក្បាលនាគពុះចែកទ្រូងផ្លូវ បណ្តាលឱ្យបាក់អស់មួយកង់ ហើយប៉ះបង្គោលភ្លើងទ្រេតអស់មួយដើម ទៅមុខលែងរួច ។
ហេតុការណ៍នេះបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី៣ ខែមីនា ឆ្នាំ២០១៩ ត្រង់ចំណុចរង្វង់មូលកាំកូស៊ីធី ជ្រុងខាងផ្លូវឧកញ៉ាម៉ុង ឫទ្ធី ភូមិគង្គាផុស សង្កាត់ទួលសង្កែ២ ខណ្ឌឫស្សីកែវ ។
រថយន្តបង្កខាងលើម៉ាកហ៊ីយ៉ាន់ដាយ ពណ៌ខៀវ មានឃ្លប់ដឹកទឹកកក មិនមានពាក់ស្លាកលេខ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពនៅកន្លែងកើតហេតុ បនឲ្យដឹងថា មុនកើតហេតុ គេឃើញរថយន្តខាងលើបើកដឹកទឹកកកដើរដាក់ឱ្យម៉ូយក្នុងល្បឿនលឿនធ្វើដំណើរពីជើងទៅត្បូង លុះមកដល់ចំណុចកើតហេតុ ជ្រុលទៅបុកក្បាលនាគពុះចែកទ្រូងផ្លូវ បណ្តាលឱ្យប៉ើងបាក់អស់មួយកង់ ហើយប៉ះបង្គោលភ្លើងបំភ្លឺផ្លូវទ្រតអស់មួយដើមទៀត ទើបរថយន្តទៅមុខលែងរួចបែកធុងទឹកខ្ទេច ។
ក្រោយកើតហេតុ អ្នកបើកបររត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ហើយគេឃើញសមត្ថកិច្ចចុះទៅពិនិត្យ រួចអួសយករថយន្តដឹកទឹកកកខាងកើទៅរក្សាទុកនៅការិយាល័យចរាចរណ៍ជើងគោក ស្នងការរាជធានីភ្នំពេញ រង់ចាំម្ចាស់ចូលខ្លួនមកដោះស្រាយនៅពេលក្រោយ ៕
ចែករំលែកព័តមាននេះ