ខេត្តបន្ទាយមានជ័យ ៖ នៅថ្ងៃចុងសប្តាហ៍នេះ ក្រៅពីម៉ោងធ្វើការងារស្នូល លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានដឹកនាំកម្លាំងចុះធ្វើអនាម័យ បោសសំអាត កាត់ស្មៅ…
ខេត្តបន្ទាយមានជ័យ ៖ នៅថ្ងៃចុងសប្តាហ៍នេះ ក្រៅពីម៉ោងធ្វើការងារស្នូល លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានដឹកនាំកម្លាំងចុះធ្វើអនាម័យ បោសសំអាត កាត់ស្មៅ និងតម្រឹមដើមស្នាយឲ្យមានសោភ័ណភាពល្អ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានមានប្រសាសន៍ថា ដើម្បីឱ្យមានសោភ័ណភាព និងបរិស្ថានក្រុងល្អស្អាត ក្នុងយុទ្ធនាការប្រឡងប្រណាំងទីក្រុងស្អាតនេះ ពិសេសនោះនៅខេត្តបន្ទាយមានជ័យនាឆ្នាំនេះ យើងបានរៀបចំមហាសង្ក្រាននាថ្ងៃបុណ្យចូលឆ្នាំថ្មីប្រពៃណីជាតិខ្មែរខាងមុខនេះយ៉ាងអាធឹកអាធមជាងបណ្តាឆ្នាំមុននោះ ។
លោកស្នងការនគរបាលខេត្តបានបន្តថា នាថ្ងៃចុងសប្តាហ៍នេះ បន្ទាប់ពីអនុវត្តនូវការងារស្នូល លោកបានដឹកនាំកងកម្លាំង ការិយាល័យជំនាញ ចំណុះស្នងការដ្ឋាន ធ្វើអនាម័យ សម្អាតសួនច្បារ នៅក្បាលស្ពានសែសិន ស្ថិតក្នុងភូមិសែសិននិងភូមិក្បាលស្ពាន ទាំងខាងជើងនិងខាងត្បូងឲ្យស្អាតល្អ សម្រាប់ជាសោភ័ណភាពខេត្ត និងជាការទាក់ទាញដល់អ្នកទេសចរដែលធ្វើដំណើរឆ្លងកាត់ទៅមកលើផ្លូវជាតិលេខ៥ ។
ជាមួយគ្នានេះ លោកឧត្តមសេនីយ៍ស្នងការ ក៏បានអំពាវនាវដល់ប្រជាពលរដ្ឋរស់នៅតាមសងខាងផ្លូវជាតិលេខ៥-៦ សូមចូលរួមធ្វើអនាម័យសម្អាតមុខផ្ទះរបស់ខ្លួនឲ្យបានស្អាត ដើម្បីជាសោភ័ណ ភាពមុខផ្ទះយើងផង ក៏ដូចជាខេត្តយើងផងដែរ ។ ក្នុងនោះដែរ លោកឧត្តមសេនីយ៍ទោអាត់ ខែម ក៏បានផ្តាំផ្ញើដល់ប្រជាពលរដ្ឋទាំងអស់ សូមមេត្តាប្រុងប្រយ័ត្ន ព្រោះនេះគឺជារដូវក្តៅហួតហែង សូមឱ្យមានការប្រុងប្រយ័ត្នខ្ពស់ ក្រែងមានគ្រោះអគ្គីភ័យណាមួយអាចកើតឡើងជាយថាហេតុ នាំឲ្យអន្តរាយដល់ទ្រព្យសម្បត្តិផងដែរ៕
ចែករំលែកព័តមាននេះ