ប្រទេសចិន ៖ យោងតាមការស្ទង់មតិមួយដែលត្រូវបានរាយការណ៍ដោយភ្នាក់ងារសារព័ត៌មាន CNBC កាលពីថ្ងៃទី ២៦ បានឲ្យដឹងថា វិនិយោគិនជនជាតិចិនបានកាត់បន្ថយការវិនិយោគលើអចលនទ្រព្យបរទេសព្រោះពួកគេបន្តជួបប្រទះឧបសគ្គក្នុងការផ្ទេរថវិកាចេញពីប្រទេស។
វាកើតមានឡើងខណៈដែលប្រទេសចិនបន្តអនុម័តយុទ្ធនាការកាត់បន្ថយថវិកាដែលហូរចេញពីប្រទេស។ ប្រទេសចិនបានរឹតបន្តឹងការគ្រប់គ្រងមូលធនប៉ុន្មានឆ្នាំមុនដើម្បីដោះស្រាយបញ្ហាការឡើងចុះនៃតម្លៃរូបិយវត្ថុ ប៉ុន្តែបន្ទាប់ពីមានការអន់ថយនៃការលូតលាស់សេដ្ឋកិច្ច ការធ្លាក់ចុះនៃអតិរេកពាណិជ្ជកម្ម និងភាពមិនប្រាកដប្រជាបង្កពីសង្គ្រាមពាណិជ្ជកម្មជាមួយនឹងសហរដ្ឋអាមេរិកបានជំរុញឲ្យមនុស្សជាច្រើនគិតថាវិធានការទាំងនេះនឹងបន្តត្រូវបានអនុម័ត។ លើសពីនេះទៅទៀត វិនិយោគិនជួបឧបសគ្គកាន់តែច្រើនឡើងក្នុងការទទួលបានប្រាក់កម្ចីកាលពីឆ្នាំមុន ព្រោះប្រទេសចិនព្យាយាមគ្រប់គ្រងកម្ចីកម្រិតខ្ពស់ក្នុងវិស័យអចលនទ្រព្យ។
យោងតាមការស្ទង់មតិរបស់ Cushman & Wakefield ដែលបានប្រព្រឹត្តឡើងនៅត្រីមាសចុងក្រោយនាឆ្នាំមុនបានឲ្យដឹងថា ៨៤%នៃអ្នកចូលរួមចង់រក្សាការវិនិយោគលើអចលនទ្រព្យបរទេសក្នុងកម្រិត ដដែល។ ការស្ទង់មតិនេះក៏បានឲ្យដឹងថា ៦៥%នៃអ្នកចូលរួមទទួលរងការប៉ះពាល់យ៉ាងខ្លាំងឬធ្ងន់ធ្ងរពីវិធានការកាត់បន្ថយលំហូរថវិកាចេញពីប្រទេស ដែលមានកម្រិតច្រើនជាងឆ្នាំមុនដែលស្មើតែ ៥០%ប៉ុណ្ណោះ។ ជាមួយគ្នានេះផងដែរ ៦០%នៃអ្នក ចូលរួមបាននិយាយថាពួកគេមិនគិតថាគោល នយោបាយរឹតបន្តឹងនេះអាចត្រូវបានកាត់បន្ថយទេក្នុងឆ្នាំនេះ ខណៈដែល ៥៩%ទៀតគិតថាស្ថានការផ្តល់ប្រាក់កម្ចីក្នុងស្រុកនឹងមិនល្អប្រសើរឡើងឡើយ។
យោងទៅតាមទិន្នន័យពី Real Capital Analytics បានឲ្យដឹងដែរថា វិនិយោគិនបានវិនិយោគប្រមាណ១៥.៧ប៊ីលានដុល្លារលើអចលនទ្រព្យបរទេសក្នុងឆ្នាំ ២០១៨ ឬទាបជាងឆ្នាំ ២០១៧ ដល់ទៅ ៦៣% និងជាអត្រាទាបជាងគេតាំងពីឆ្នាំ ២០១៤ មកផងដែរ។ ៕
ចែករំលែកព័តមាននេះ