រាជធានីភ្នំពេញ ៖ ក្រោយវិបត្តិសេដ្ឋកិច្ច និងអចលនទ្រព្យនៅអំឡុងឆ្នាំ ២០០៨ កន្លងទៅ វិស័យដីធ្លីអចលនទ្រព្យ និងសំណង់ក្នុងប្រទេសកម្ពុជា បានងើបឡើងវិញ ដែលធ្វើអោយវិស័យនេះដើរតួនាទីសំខាន់ក្នុងការជំរុញកំណើនសេដ្ឋកិច្ចជាតិ ជាក់ស្ដែងក្នុងរយៈពេល១០ឆ្នាំចុងក្រោយនេះ កម្ពុជាទទួលបានទុនវិនិយោគពីវិស័យសំណង់ប្រមាណជាង ៤៣ប៊ីលានដុល្លារសហរដ្ឋអាមេរិក ។
យោងតាមប្រសាសន៍លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅឯវេទិកាសាធារណៈឯកជនលើកទី ១ ស្តីពីការអភិវឌ្ឍនគរូបនីយកម្មកម្ពុជា-ជប៉ុននៅភ្នំពេញកាលពីពេលថ្មីៗនេះ បានឲ្យដឹងថា ការអភិវឌ្ឍវិស័យនគរូបនីយកម្ម កំពុងមានកំណើនក្នុងសន្ទុះដ៏លឿន ដែលអាចមើលឃើញពីតម្រូវការវិនិយោគជាច្រើន មានដូចជា ការអភិវឌ្ឍសំណង់លំនៅឋាន សំណង់ពាណិជ្ជកម្ម សំណង់សេវាកម្ម សំណង់ឧស្សាហកម្ម សំណង់ហេដ្ឋារចនាសម្ព័ន្ធរូបវ័ន្ត និងបរិស្ថាន សេដ្ឋកិច្ច សង្គម ពិសេសការអភិវឌ្ឍលំនៅឋានតម្លៃសមរម្យ បណ្ដាញផ្លូវ ការផ្គត់ផ្គង់ទឹកស្អាត អគ្គិសនី ប្រព័ន្ធលូ និងប្រព័ន្ធការពារទឹកជំនន់ ស្ថានីយប្រព្រឹត្តកម្មទឹកកខ្វក់ ការគ្រប់គ្រងសំណង់រឹងនិងរាវលំហសាធារណៈ និងផ្ទៃបៃតង បរិក្ខារទីក្រុងដែលសុទ្ធសឹងតែជាដំណោះស្រាយដ៏មានប្រសិទ្ធភាពសម្រាប់គោលដៅ អភិវឌ្ឍន៍ ប្រកបដោយចីរភាព មានបរិយាប័ន្ន មានភាពធន់និងមានភាពប្រកួតប្រជែង ឆ្ពោះទៅសម្រេចចក្ខុវិស័យកម្ពុជាឆ្នាំ ២០៣០ ក្លាយជាប្រទេសមានប្រាក់ចំណូលមធ្យមកម្រិតខ្ពស់ និងប្រទេស មានប្រាក់ចំណូលខ្ពស់នៅឆ្នាំ ២០៥០ ។
លោក ថ្លែងបន្តថា ជាផ្លែផ្កានៃវិស័យរូបនីយកម្មនេះដែរ ការអភិវឌ្ឍអចលនទ្រព្យ និងសំណង់ បានក្លាយជាសរសរស្ដម្ភស្នូល ដែលជំរុញកំណើនសេដ្ឋកិច្ចកម្ពុជា ។ លោករដ្ឋមន្ត្រី ជា សុផារ៉ា បញ្ជាក់ថា ៖ « ជាក់ស្ដែងទុនវិនិយោគក្នុងវិស័យសំណង់ក្នុងរយៈពេល១០ឆ្នាំ ចាប់ពីឆ្នាំ ២០១០ដល់ឆ្នាំ ២០១៩នេះ មានប្រមាណ ៤៣.៨៩៦លានដុល្លារអាមេរិក ហើយនៅក្នុងខែមករា ឆ្នាំ ២០១៩ ទុនវិនិយោគក្នុងវិស័យនេះដែរ ក៏មានប្រមាណ៨២៩លានដុល្លារអាមេរិកដែរ ពោលបានកើនឡើង១៧៨ភាគរយ ធៀបនឹងរយៈពេលដូចគ្នានៅឆ្នាំ ២០១៨ » ។ លោកបន្ថែមថា ដោយឡែកក្រុមហ៊ុនសាងសង់និងក្រុមហ៊ុនសិក្សាគម្រោងប្លង់ដែលមានអាជ្ញាបណ្ណមានចំនួន ២.៣០៧ក្រុមហ៊ុន មានស្ថាបត្យករ ប្រមាណជាង២.៥០០នាក់ និងមានវិស្វករប្រមាណជាង៣ម៉ឺននាក់។ ក្រសួងរៀបចំដែនដី នគរូបនីយកម្មនិងសំណង់ កម្ពុជា បាននិងកំពុងសហការជាមួយក្រសួងដីធ្លី ហេដ្ឋា រចនាសម្ព័ន្ធដឹកជញ្ជូន និងទេសចរណ៍ជប៉ុន ក្នុងការរៀបចំច្បាប់ស្ដីពីសំណង់ និងបទដ្ឋានគតិយុត្តិផ្សេងទៀត ធ្វើអោយវិស័យសំណង់នៅកម្ពុជាកាន់តែប្រសើរ ។
បើតាមលោក ឡៅ ទិព្វសីហា រដ្ឋលេខា ធិការក្រសួងដដែលនេះបានលើកឡើងផងដែរថា ក្នុងរយៈពេលចុងក្រោយនេះ វិស័យសំណង់បានបែកខ្ញែកទៅកាន់តំបន់ផ្សេងៗទៀតក្រៅពីរាជធានីភ្នំពេញ ដូចជាខេត្តព្រះសីហនុ និងខេត្តសៀមរាប តែយ៉ាងណាក៏ដោយ រាជធានីភ្នំពេញនៅតែមានសក្ដានុពលខ្ពស់ ក្នុងការវិនិយោគវិស័យសំណង់សម្រាប់វិនិយោគិនបរទេស និងក្នុងស្រុក ។ លោក ឡៅ ទិព្វសីហា មានប្រសាសន៍ថា៖ « គេមើលឃើញថា សំណង់អគារខ្ពស់ៗ បានងាកទៅកាន់ប៉ូលនៃខេត្តព្រះសីហនុ ក្នុងនោះអគារខុនដូ សណ្ឋាគារ ក៏បាននិងកំពុងរីកលូតលាស់ជាបន្តបន្ទាប់ផងដែរ នៅតំបន់នោះ ដើម្បីបម្រើអោយសេចក្តីត្រូវការ ខណៈខេត្តព្រះសីហនុ ជាខេត្តគោលដៅទេសចរណ៍មួយដ៏សំខាន់សម្រាប់ទាក់ទាញភ្ញៀវបរទេស និងក្នុងស្រុក » ។
គួរបញ្ជាក់ផងដែរថា កម្ពុជាត្រូវបានគេប្រៀបធៀបបីដូច កូនក្រមុំមួយដ៏ស្រស់ស្អាតនៅក្នុងតំបន់ និងកំពុងមានការទាញទាញកម្លោះវិនិយោគិននានាពីគ្រប់តំបន់ ក្នុងនោះដែរ កម្ពុជាមានអំណោយផលធម្មជាតិល្អ មានសណ្ឋានដីរឹងមាំសម្រាប់សាងសង់អគារខ្ពស់ៗ ជាពិសេសនោះ កម្ពុជាស្ថិតនៅចំនុចកណ្ដាលនៃតំបន់អាស៊ាន និងងាយស្រួលធ្វើចេញចូលទៅកាន់ប្រទេសដទៃទៀត ក្នុងតំបន់អាស៊ាន ដែលមានទាំងផ្លូវគោក ផ្លូវដែក ផ្លូវទឹក និងផ្លូវអាកាស ៕
ចែករំលែកព័តមាននេះ