រាជធានីភ្នំពេញ ៖ ទោះបីជាមិនបានបញ្ជាក់ចំនួនប៉ុន្មានរូប យ៉ាងណាក្តី អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា អតីតក្រុមប្រឆាំងខ្លះកំពុងតែរៀបចំត្រៀមខ្លួនដាក់ពាក្យសុំទទួលសុំនីតិសម្បទាធ្វើនយោបាយ ។ ការត្រៀមខ្លួននេះត្រូវបានអ្នកនាំពាក្យគណបក្សប្រជាជនកម្ពុជា (CPP) បានអះអាងថា ក្រុមប្រឆាំងបានកំពុងតែជ្រួលច្របល់ដោយសារតែមេបក្សខ្លួនបានប្រកាសមិនចូលស្រុកតាមសន្យា និងភ្នាល់នោះទេ ។
លោកសុខ ឥសាន បានឲ្យដឹងតាមប្រពន្ធតេឡេក្រាមយ៉ាងដូច្នេះថា ពួកឧទ្ទាមក្រៅច្បាប់ដែលកំពុងភៀសខ្លួននៅឯនាយសមុទ្របាន និងកំពុងបែកបាក់គ្នាយ៉ាងស្រួចស្រាវ និងកំពុងជ្រួលច្របល់យ៉ាងខ្លាំង ដោយសារអ្នកខ្លះចង់ទៅទទួលលោកប្រធានកំសាក តែទណ្ឌិតប្រធានមិនហ៊ានចូលស្រុក ។ ការប្រកាសនេះត្រូវអ្នកនាំពាក្យគណបក្សកាន់អំណាចបញ្ជាក់ថា «អ្នកខ្លះកំពុងត្រៀមខ្លួនដាក់ពាក្យសុំទទួលបាននីតិសម្បទាធ្វើនយោបាយឡើងវិញ អ្នកខ្លះកំពុងអត់លុយហូបបាយនៅបរទេសចង់វិលចូលស្រុកវិញ តែនៅអល់អែកក្នុងចិត្ត អ្នកខ្លះនៅដើររៃអង្គាសលុយកាក់ឲ្យបានគ្រប់៣០ម៉ឺនដុល្លារតាមផែនការ ខ្លះទៅដើរញុះញង់ប្រជាជន និងកងទ័ពឲ្យបះបោរប្រឆាំងនឹងរាជរដ្ឋាភិបាលកម្ពុជា តែរង់ចាំមិនឃើញអ្នកណាងើបឡើងសោះ ។
លោកបន្តថា លោកប្រធាន (សម រង្ស៊ី) នៅតែស្រែកខ្លាំងៗខ្លាំងរហូតដល់បែកបាក់គ្នាខ្ទេចខ្ទីអស់គ្មានសល់ទាំងនៅក្នុងប្រទេស និងនៅក្រៅប្រទេសរហូតមកដល់ធ្វើជាគ្រូទាយប្រឌិតរឿងចង់ឲ្យដៃគូប្រកួតស្លាប់ ។ តែគួរឲ្យចង់ឲ្យអស់សំណើចណាស់ ពួកឧទ្ទាមក្រៅច្បាប់កំពុងត្រដរខ្យល់ ហើយនៅតែក្រអឺតក្រទមទៀត ដើម្បីបិទបាំងការបរាជ័យរបស់ខ្លួន ។
កាលពីថ្ងៃទី២ ខែមីនា ព្រះមហាក្សត្រព្រះករុណាសម្តេចព្រះរមនាថនរោត្តមសីហមុនី បានផ្តល់នីតិសម្បទានយោបាយឲ្យលោកស៊ីម សុវណ្ណនី ហៅស៊ីម វ៉ាន់នី ភេទប្រុស អតីតមន្ត្រីគណបក្សសង្គ្រោះជាតិ ត្រូវបានហាមឃាត់មិនឲ្យធ្វើសកម្មភាពនយោបាយសម្រាប់រយៈពេល៥ ឆ្នាំតាមអំណាចសាលដីការបស់តុលាការកំពូល ចុះថ្ងៃទី១៦ ខែវិច្ឆិកា ឆ្នាំ២០១៧ ៕
ចែករំលែកព័តមាននេះ