រាជធានីភ្នំពេញ ៖ បុរសម្នាក់បានជិះម៉ូតូបោះពួយក្នុងល្បឿនលឿនជ្រុលទៅគល់ស្ពានអាកាសស្ទឹងមានជ័យ ធ្វើអោយម៉ូតូខ្ទាតទៅបុកនឹងបង្គោលភ្លើងបំភ្លឺផ្លូវបន្ថែមទៀត បណ្តាលអោយបុរសម្នាក់ម្នាក់នោះដាច់ជើងម្ខាងចេញពីគ្នាតែម្តង ។ ហេតុការណ៍នេះដែរបានកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២ ខែមីនា ឆ្នាំ២០១៩ ចំណុចគល់ស្ពានអាកាសស្ទឹងមានជ័យត្រើយខាងត្បូង ផ្លូវ២៧១ សង្កាត់ទំនប់ទឹក ខណ្ឌចំការមន ។
បុរសរងគ្រោះខាងលើមិនទាន់ស្គាល់អត្តសញ្ញាណនៅឡើយទេ គ្រាន់តែដឹងថា ជាអ្នកបើកបរម៉ូតូមួយគ្រឿងម៉ាក MSX ពណ៌ស ពាក់ស្លាកលេខ ភ្នំពេញ ១GO-៥៩១៨ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញបុរសរងគ្រោះខាងលើមិនដឹងថាគោលបំណងទៅណានោះទេ គឺបានបើកបរម៉ូតូមួយគ្រឿងម៉ាក MSX ពណ៌ស ធ្វើដំណើរតាមផ្លូវ២៧១ ក្នុងទិសដៅពីត្បូងទៅជើង ក្នុងល្បឿនលឿនដូចហោះ លុះមកដល់ចំណុចកើតហេតុ មិនជាយ៉ាងម៉េចក៍ស្រាប់តែម៉ូតូជ្រុលទៅបុកគល់ស្ពានអាកាសស្ទឹងមានជ័យយ៉ាងពេញទំហឹង ធ្វើអោយម៉ូតូខ្ទាតទៅបុកនឹងបង្គោលភ្លើងបំភ្លឺផ្លូវបន្ថែមទៀត បណ្តាលអោយអ្នកបើកបរម៉ូតូដាច់ជើងខាងឆ្វេងចេញពីគ្នាតែម្តង ហើយភ្លាមៗនោះដែរ ជនរងគ្រោះត្រូវរថយន្តសង្គ្រោះបានមកដឹកយកទៅសង្គ្រោះនៅមន្ទីពេទ្យមិត្តភាពខ្មែរ សូវៀត ដោយឡែកម៉ូតូបានរងការខូចខាតយ៉ាងដំណំ ។
ក្រោយពេលកើតហេតុ ឃើញសមត្ថកិច្ចមូលដ្ឋាន និងជំនាញចរាចរណ៍ខណ្ឌចំការមន បានចុះទៅកន្លែងកើតហេតុ រួចហើយយកម៉ូតូរបស់ជនរងគ្រោះទៅរក្សាទុកនៅអធិការដ្ឋានខណ្ឌចំការមនរង់ចាំប្រគល់អោយជនរងគ្រោះវិញ ៕
ចែករំលែកព័តមាននេះ