រាជធានីភ្នំពេញ ៖ ឪពុកបានរងរបួសស្រាល និងកូនប្រុសម្នាក់បានរងរបួសធ្ងន់ត្រូវបានគេបញ្ជួនទៅសង្គ្រោះនៅមន្ទីពេទ្យភ្លាមៗ ចំណែកកូនប្រុសម្នាក់ទៀតបានស្លាប់នៅនឹងកន្លែងកើតហេតុ ខណៈពេលជនរងគ្រោះទាំង៣នាក់បានជួបគ្រោះថ្នាក់ចរាចរណ៍ ជិះម៉ូតូបត់ឆ្លងផ្លូវចូលផ្ទះ ក៏ត្រូវរថយន្តសណ្តោងកន្ទុយកុងតឺន័របានបើកជែងជ្រុលទៅបុកកិនពីក្រោយ កាលពីវេលាម៉ោង១១និង៣០នាទីយប់ ថ្ងៃទី១…
រាជធានីភ្នំពេញ ៖ ឪពុកបានរងរបួសស្រាល និងកូនប្រុសម្នាក់បានរងរបួសធ្ងន់ត្រូវបានគេបញ្ជួនទៅសង្គ្រោះនៅមន្ទីពេទ្យភ្លាមៗ ចំណែកកូនប្រុសម្នាក់ទៀតបានស្លាប់នៅនឹងកន្លែងកើតហេតុ ខណៈពេលជនរងគ្រោះទាំង៣នាក់បានជួបគ្រោះថ្នាក់ចរាចរណ៍ ជិះម៉ូតូបត់ឆ្លងផ្លូវចូលផ្ទះ ក៏ត្រូវរថយន្តសណ្តោងកន្ទុយកុងតឺន័របានបើកជែងជ្រុលទៅបុកកិនពីក្រោយ កាលពីវេលាម៉ោង១១និង៣០នាទីយប់ ថ្ងៃទី១ ខែកុម្ភៈ ឆ្នាំ២០១៩ ទល់មុខច្រកចូល វិហារយេស៊ូ ផ្លូវជាតិលេខ១ ភូមិវាលស្បូវ សង្កាត់វាលស្បូវ ខណ្ឌច្បារអំពៅ ។
ជនរងគ្រោះទាំង៣នាក់ខាងលើរួមមាន អ្នកបើកបរម៉ូតូត្រូវជាឪពុកឈ្មោះ សាន សុខវឿន ភេទប្រុស អាយុ៣៥ឆ្នាំ មុខរបរកម្មករ រងរបួសស្រាល ចំណែកអ្នករួមដំណើរទាំង២នាក់ត្រូវជាកូនក្នុងនោះម្នាក់ឈ្មោះ វ៉ន ចាន់បរមី ភេទប្រុស អាយុ៩ឆ្នាំ ជាសិស្ស បានរងរបួសធ្ងន់ និងម្នាក់ទៀតឈ្មោះ វ៉ន តុលា ភេទប្រុស អាយុ១២ឆ្នាំ ជាសិស្ស បានស្លាប់នៅនឹងកន្លែងកើតហេតុ ។ ជនរងគ្រោះទាំង៣នាក់ស្នាក់នៅផ្ទះលេខ ១៥៣ ផ្លូវលំ ភូមិវាលស្បូវ សង្កាត់វាលស្បូវ ខណ្ឌច្បារអំពៅ ។ ជនរងគ្រោះទាំង៣នាក់ជិះម៉ូតូមួយគ្រឿងម៉ាកសង់កូរ៉េ ពណ៌ក្រហម ពាក់ស្លាកលេខ ឍ៣២៤៨ កណ១។
ដោយឡែករថយន្តសណ្តោងកន្ទុយកុងតឺន័រម៉ាក ASIA GRANTO ពណ៌សលាយកាប់ស្ទាំង ពាក់ស្លាកលេខ ភ្នំពេញ ៣D -៣៧៦៥ បើកបរដោយបុរសមិនស្គាល់អត្តសញ្ញាណម្នាក់ បានរត់គេចខ្លួនបាត់។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញឪពុកជិះម៉ូតូមួយគ្រឿងឌុបកូនប្រុស២នាក់បានចេញពីហូបអីនៅម្តុំ ភូមិតាព្រហ្ម ស្ថិតក្នុងសង្កាត់ព្រែកឯង ខណ្ឌច្បារអំពៅ ក្នុងគោលបំណងត្រឡប់ទៅផ្ទះវិញ ដោយធ្វើដំណើរតាមផ្លូវជាតិលេខ១ ក្នុងទិសដៅ ពីខេត្តទៅភ្នំពេញ ។
ប្រភពដដែលបានបន្តថា លុះជនរងគ្រោះទាំង៣នាក់ធ្វើដំណើរមកដល់ចំណុចកើតហេតុ ក៍បត់ឆ្វេងឆ្លងផ្លូវក្នុងគោលបំណងចូលទៅផ្លូវក្នុងភូមិ ស្របពេលដែលម៉ូតូជនរងគ្រោះបត់ឆ្លងបានពាក់កណ្ដាលផ្លូវ ក៏ស្រាប់តែមានរថយន្តសណ្តោងកន្ទុយកុងតឺន័មួយគ្រឿង បានបើកបរក្នុងទិសដៅស្របគ្នា ក្នុងល្បឿនលឿនបានបើកជែងទៅខាងឆ្វេងដៃ ក៏ជ្រុលទៅបុកម៉ូតូជនរងគ្រោះចំពីក្រោយពេញទំហឹង បណ្តាលអោយរថយន្តកិនកូនប្រុសច្បងដែលអង្គុយខាងក្រោយចំក្បាលធ្លាយខួរស្លាប់នៅនឹងកន្លែង រីឯកូនប្អូនដែលជិះកណ្តាលបានរងរបួសធ្ងន់ ចំណែកឪពុកដែលជាអ្នកបើកបរបានរងរបួសស្រាល ត្រូវបានរថយន្តសង្គ្រោះមកដឹកយកទៅសង្គ្រោះភ្លាមៗនៅមន្ទីរពេទ្យ ។
ដោយឡែក ខាងរថយន្តវិញនៅពេលបង្កគ្រោះថ្នាក់រួចហើយ អ្នកបើកបរបានចុះពីលើរថយន្តរត់គេចខ្លួនបាត់ស្រមោលតែម្តង ។
ក្រោយពេលកើតហេតុ គេឃើញមានកម្លាំងសមត្ថកិច្ចមូលដ្ឋាន និងជំនាញចរាចរណ៍ចុះទៅដល់កន្លែងកើតហេតុ រួចហើយក៍បានធ្វើលិខិតប្រគល់សពជនរងគ្រោះអោយទៅក្រុមគ្រួសារយកទៅធ្វើបុណ្យតាមប្រពៃណី ចំណែករថយន្ត និងម៉ូតូវិញត្រូវបានសមត្ថកិច្ចជំនាញធ្វើការវាស់វែងរួចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ