ខេត្តព្រះសីហនុ ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃសម្តេច ស ខេងបានប្រាប់ជាសាធារណថា បញ្ហាវិវាទដីធ្លីដែលមានអ្នកធំ និងអ្នកលុយចូលមកធ្វើអន្តរាគមន៍នៅខេត្តព្រះសីហនុត្រូវតែបញ្ឈប់នូវវប្បធម៌អន្តរាគមន៍ជាបន្ទាន់ និងដកខ្លួនចេញជាបន្ទាន់ ។…
ខេត្តព្រះសីហនុ ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃសម្តេច ស ខេងបានប្រាប់ជាសាធារណថា បញ្ហាវិវាទដីធ្លីដែលមានអ្នកធំ និងអ្នកលុយចូលមកធ្វើអន្តរាគមន៍នៅខេត្តព្រះសីហនុត្រូវតែបញ្ឈប់នូវវប្បធម៌អន្តរាគមន៍ជាបន្ទាន់ និងដកខ្លួនចេញជាបន្ទាន់ ។ សម្តេចថ្លែងបែបនេះ ដើម្បីការពារផលប្រយោជន៍ជាតិ ពិសេសការពារដាច់ខាតនូវដីរដ្ឋ ព្រោះវាជាផលប្រយោជន៍ទាំងអស់គ្នា ។
ក្នុងពិធីបិទសន្និបាតបូកសរុបលទ្ធផលការងារ ឆ្នាំ២០១៨ និងទិសដៅការងារឆ្នាំ២០១៩ ខេត្តព្រះសីហនុ នាពេលកន្លងទៅថ្មីៗនេះ សម្តេចក្រឡាហោម ស ខេង មានប្រសាសន៍ថា «ទាក់ទង និង បញ្ហាវិវាទដីធ្លីដែលមានអ្នកធំ និងអ្នកលុយចូលមកធ្វើអន្តរាគមន៍នៅខេត្តព្រះសីហនុ ត្រូវតែបញ្ឈប់នូវវប្បធម៌អន្តរាគមន៍ជាបន្ទាន់ដកខ្លួនចេញ ដើម្បីការពារផលប្រយោជន៍ជាតិ ពិសេសការពារដាច់ខាតនូវដីរដ្ឋ ព្រោះវាជាផលប្រយោជន៍រួមរបស់យើងទាំងអស់គ្នា ម្យ៉ាងទៀតបញ្ហាទំនាស់ដីធ្លីទុកឲ្យខេត្តជាអ្នកធ្វើការដោះស្រាយប្រកបដោយយុត្តិធម៌ និងត្រូវយកច្បាប់មកអនុវត្តជាមូលដ្ឋាន ។ ដោយសារតែកន្លងមកមន្ត្រីមូលដ្ឋានបានចុះហត្ថលេខាលើឯកសារដីធ្លីជាន់លើគ្នា បណ្តាលឲ្យមានវិវាទកើតឡើង» ។
បន្ថែមពីនេះរដ្ឋមន្ត្រីក្រសួងមហាផ្ទៃថា ក្រោមការដឹកនាំរបស់រដ្ឋបាលខេត្តសម្រេចបាននូវសមិទ្ធិផលជាច្រើន ពិសេសសន្តិភាព និងសុខមាលភាពសង្គមក្នុងការអភិវឌ្ឍន៍រីកចម្រើនគួរឲ្យកត់សម្គាល់ ក្នុងការកៀងគរធនធានទុនយ៉ាងច្រើនមកធ្វើការវិនិយោគនៅខេត្តព្រះសីហនុ ហើយក៏ជាឱកាសសម្រាប់ប្រជាពលរដ្ឋខេត្តព្រះសីហនុក៏ដូចជា ប្រជាពលរដ្ឋនៅទូទាំងប្រទេស ក៏ប៉ុន្តែរាល់អ្នកវិនិយោគត្រូវតែចូលរួមគោរពច្បាប់កម្ពុជា ។
សូមជម្រាបថា កាលលើកឡើងរបស់ប្រមុខដឹកនាំក្រសួងមហាផ្ទៃនេះស្របពេលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី១ ខែមីនា ឆ្នាំ២០១៩ នេះបានបង្ខំចិត្តអនុវត្តអភិក្រមទី៥ ចេញអនុក្រឹត្យដកតំណែងលោក ស្រ៊ុន ស្រ៊ន់ និងលោកផៃ ប៊ុនវណ្ណៈ ចេញពី អភិបាលរងខេត្តព្រះសីហនុ មិនយូរប៉ុន្មាន សម្ដេចបានឲ្យក្រសួងមហាផ្ទៃ និងអង្គភាពប្រឆាំងអំពើពុករលួយ (ACU) បើកការស៊ើបអង្កេត និងចាត់ការបន្ត ៕
ចែករំលែកព័តមាននេះ