កីឡាករប្រភេទទម្ងន់៥៤គីឡូក្រាម ត្រូវប្រកាសឱ្យដណ្ដើមជើងឯករដូវកាលថ្មី
- ភ្នំពេញ
រាជធានីភ្នំពេញ ៖ ក្រោយបញ្ចប់ការប្រកួត ព្រឹត្តិការណ៍ TV5 BOXING KNOCK OUT By K-CEMENT…
រាជធានីភ្នំពេញ ៖ ក្រោយបញ្ចប់ការប្រកួត ព្រឹត្តិការណ៍ TV5 BOXING KNOCK OUT By K-CEMENT…
រាជធានីភ្នំពេញ ៖ ក្រោយបញ្ចប់ការប្រកួត ព្រឹត្តិការណ៍ TV5 BOXING KNOCK OUT By K-CEMENT បានប្រកាសឱ្យដឹងរដូវកាលថ្មីហើយ ដោយកំណត់ឱ្យកីឡាករក្នុងប្រភេទម្ងន់ស្រាល ៥៤គីឡូក្រាមចំនួន៣២រូប ប្រកួតគ្នាជ្រើសរើសជើងឯក។ យ៉ាងណាមិញនៅក្នុងថ្ងៃនោះ ប៉ុស្តិ៍លេខ៥បង្ហាញសមាសភាពកីឡាករតែ៤រូបប៉ុណ្ណោះ ដើម្បីឱ្យប្រកួតគ្នាក្រោយពេលបង្ហាញខ្លួនតែម្ដង។
លោក សេង កដិកា អ្នករៀបចំការប្រកួត បានថ្លែងបញ្ជាក់ក្នុងពិធីសន្និសីទកាសែតកាលពីថ្ងៃទី២ មីនាថា ការប្រកួតរដូវកាលនេះ លោកសម្រេចចិត្តជម្រើសយកសមាសភាពស្ថិតក្នុងប្រភេទស្រាល៥៤គីឡូក្រាមវិញម្ដង ដោយលោកយល់ថា ការប្រកួតជម្រើសជើងឯកចេញពីកីឡាករទម្ងន់ស្រាល គឺងាយរកបានកីឡាករថ្មីៗល្អៗ ហើយអាចបណ្ដុះឱ្យក្លាយជាកីឡាករស្នូលសម្រាប់វិស័យប្រដាល់។
លោកថា ការប្រកួតចាប់ទម្ងន់៦០គីឡូឡើង ច្រើនតែត្រូវសម្រាប់កីឡាករដែលមានឈ្មោះកេរ្តិ៍ឈ្មោះបោះសំឡេងរួចហើយ ហើយដំណើរស្វែងរកអ្នកស្ថិតក្នុងប្រភេទទម្ងន់ធ្ងន់បែបហ្នឹងក៏ពិបាករកផងដែរ សម្រាប់៣២រូប ដោយសារតែស្ថិតក្នុងប្រភេទទម្ងន់នេះគឺស្ទើរមាន និងស្ទើរមិនមាន ដែលពិបាកឱ្យគណៈកម្មការធ្វើការជ្រើសរើស។ ជាក់ស្ដែងវត្តមានកីឡាករកាលពីរដូវកាលមុនៗ ដែលស្ថិតក្នុងប្រភេទទម្ងន់៦៥ និង៦៣,៥គីឡូក្រាម លោកថា ប៉ុស្ដិ៍លេខ៥ស្វែងរកបាន៣២រូបយ៉ាងលំបាកបំផុត ដោយមានកីឡាករខ្លះត្រូវបង្ខំឱ្យសម្រកទម្ងន់ និងខ្លះឱ្យតំឡើងទម្ងន់ ដើម្បីឱ្យគ្រប់៣២រូបនោះ។
លោកអះអាងថា ខ្លួនមិនចង់បានសមាសភាពដែលខ្វះតុល្យភាពបែបហ្នឹងនោះទេ ទើបសម្រេចចិត្តបើកការប្រកួតក្នុងប្រភេទទម្ងន់៥៧គីឡូក្រាមកាលពីរដូវកាលទី៤ និងសម្រាំងយកក្នុងប្រភេទទម្ងន់៥៤គីឡូក្រាម ដែលជាប្រភេទស្រាលទៀត នៅក្នុងរដូវកាលនេះ។ លោកថា កីឡាករដែលមានឈ្មោះប្រកួត គឺមានទាំងកីឡាករដែលមានកេរ្តិ៍ឈ្មោះបោះសំឡេងមួយចំនួនក្នុងវិស័យប្រដាល់ស្រាប់ និងកីឡាករជើងថ្មី ដោយសមាសភាពទាំងអស់ នឹងតម្រូវឱ្យប្រកួតគ្នាមួយសប្ដាហ៍៤នាក់ៗ ដោយរូបមន្តចាញ់ធ្លាក់ៗ។
លោកថា ការប្រកួតគឺធ្វើដូចមុន ដោយប្រកួតចាញ់ធ្លាក់ៗ ដោយយកអ្នកឈ្នះប្រកួតយកអ្នកឈ្នះ រហូតទាល់តែនៅសល់អ្នកឈ្នះតែម្នាក់តាមលំនាំរូបមន្តចាស់ ដើម្បីកំណត់ថា ជាម្ចាស់ជើងឯក។ នៅក្នុងថ្ងៃបើកសន្និសីទកាសែតនោះ កីឡាករ២គូក៏ត្រូវគេឃើញឱ្យប្រកួតគ្នាចាញ់ធ្លាក់ៗ ដោយកីឡាករទាំង៤ បានបើកការប្រកួតយ៉ាងជក់ចិត្តនៅលើសង្វៀន តាំងពីដើមរហូតរកឃើញពិន្ទុ ធ្វើឱ្យអ្នកទស្សនាសរសើរមិនដាច់ពីមាត់ផងដែរ៕
ចែករំលែកព័តមាននេះ