រាជធានីភ្នំពេញ ៖ បុរសជាភ្ញៀវទេសចរណ៍ជនបរទេសចំនួន២នាក់បានស្លាប់បាត់បង់ជីវិតភ្លាមៗនៅនឹងកន្លែង ចំណែកឯបុរសជាអ្នកបើកម៉ូតូរ៉ឺម៉កកង់ម្នាក់ទៀតបានស្លាប់នៅពេលដែលបញ្ជូនទៅកាន់មន្ទីរពេទ្យកាល់ម៉ែត ។ ខណៈដែលម៉ូតូរ៉ឺម៉កកង់បីមួយគ្រឿងខាងលើកំពុងតែដឹកភ្ញៀវដើរលេងពេលយប់មកដល់មុខវាំង ហើយត្រូវរថយន្តស៊េរីទំនើបម៉ាក Lexus RX-330 មួយគ្រឿងដែលបើកបរដោយបុរសម្នាក់ក្នុងសភាពស្រវឹងស្រាយ៉ាងជោកជាំបើកបោះពួយក្នុងល្បឿនយ៉ាងលឿនក្នុងទិសដៅបញ្ច្រាសទិសគ្នាទៅបុក រួមទាំងម៉ួតូមួយគ្រឿងទៀតអូសនោះ ។
ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង២និង៣០នាទីយប់រំលងអធ្រាត្រឈានចួលថ្ងៃទី០២ ខែមីនា ឆ្នាំ២០១៩ នៅផ្លូវព្រះស៊ីសុវត្ថិ កែងផ្លូវលេខ១៨៤ មុខព្រះបរមរាជវាំង ក្នុងសង្កាត់ជ័យជំនះ ខណ្ឌដូនពេញ ។
ប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុគេបានឃើញរថយន្តស៊េរីទំនើបម៉ាក Lexus RX-330 ពណ៌ខ្មៅ ពាក់ផ្លាកភ្នំពេញ 2AX-5853 មួយគ្រឿង ដែលបើកបរដោយបុរសម្នាក់ក្នុងល្បឿនលឿនតាមបណ្ដោយផ្លូវព្រះស៊ីសុវត្ថិក្នុងទិសដៅពីត្បូងទៅជើង ។
លុះមកដល់ចំណុចកើតហេតុខាងលើស្រាប់តែរថយន្តស៊េរីទំនើបខាងលើនោះរ៉េចង្កូតងាកមកខាងឆ្វេងដៃ និងជ្រុលទៅបុកម៉ូតូរ៉ឺម៉កកង់បីមួយគ្រឿងដែលបុរសជនជាតិខ្មែរម្នាក់កំពុងតែបើកដឹកបុរសជាជនបរទេសទាំង២នាក់ជាភ្ញៀវទេសចរណ៍ដើរលេងពេលយប់ដែលធ្វើដំណើរបញ្ច្រាសទិសគ្នាចំពីមុខពេញទំហឹង ហើយបន្តទៅបុកម៉ូតូម៉ាក គុបជ្រុង ពណ៌ទឹកប៊ិច ពាក់ផ្លាកលេខ ប ៣៩៧៦ មួយគ្រឿងទៀតអូសជាច្រើនម៉ែត្រផងដែរ។
តាមប្រភពដដែលបានប្រាប់បន្តទៀតថា ក្នុងពេលកើតហេតុនោះបានបណ្តាលឱ្យបុរសជាភ្ញៀវទេសចរណ៍បរទេសទាំង២នាក់បានស្លាប់បាត់បង់ជីវិតយ៉ាងអាណោចអធ័មភ្លាមៗ ចំណែកឯបុរសជាអ្នកបើកម៉ូតួរ៉ឺម៉កកង់បីបានរងរបួសយ៉ាងធ្ងន់ធ្ងរ និងស្លាប់ក្រោយពេលដែលបញ្ជូនយកទៅសង្គ្រោះនៅមន្ទីរពេទ្យកាល់ម៉ែតជាបន្តបន្ទាប់ ។
ករណីគ្រោះថ្នាក់ចរាចេណ៍នេះដែរ គឺបង្កឡើងដោយសាតែបុរសអ្នកបើកបររថយន្តស៊េរីទំនើបម៉ាក Lexus RX-330 បើកបរក្នុងស្ថានភាពស្រវឹងស្រាខ្លាំង និងត្រួវបានចាប់ឃាត់ខ្លួនផងដែរ ៕
ចែករំលែកព័តមាននេះ