រាជធានីភ្នំពេញ ៖ អគ្គស្នងការដ្ឋាននគរបាលជាតិនិងមជ្ឈមណ្ឌលសកម្មភាពកម្ចាត់មីនកម្ពុជា(សុីម៉ាក់) បានធ្វើការផ្ទេរ-ប្រគល់អាវុធធុនស្រាលខូចគុណភាពជាង១មុឺនដើម ដែលប្រមូលបានពីជនល្មើសនិងពីប្រជា ពលរដ្ឋកន្លងមក ដើម្បីអង្គភាពស៊ីម៉ាក់យកទៅបន្សាបនិងកម្ទេចចោល ។ ពិធីនេះបានធ្វើឡើងនៅឃ្លាំងរក្សាទុករបស់អគ្គស្នងការដ្ឋានគរបាលជាតិ ក្នុងសង្កាត់ព្រែកប្រា ខណ្ឌច្បារអំពៅ កាលពីព្រឹកថ្ងៃទី១ ខែ មីនា ក្រោមអធិបតីភាពលោកឧត្តមសេនីយ៍ឯក សេក ភូមី អគ្គស្នងការរងនគរបាលជាតិ តំណាងនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោក ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកស៊ីម៉ាក់ ។
លោកឧត្តមសេនីយ៍ឯក ធាម ប៊ុនសេង ប្រធាននាយកដ្ឋានគ្រប់គ្រងអាវុធជាតិផ្ទុះ បានលើកឡើងអំពីប្រវត្តិនៃកិច្ចដំណើរការប្រមែប្រមូលនិងដកហូតអាវុធ ហើយនិងបានប្រារព្ធពិធីបំផ្លាញអាវុធជាផ្លូវការចំនួន៥៤លើក សរុបអាវុធជិត២២ម៉ឺនដើម ។ លោក ហេង រតនា ថ្លែងថា ការខិតខំរបស់រាជរដ្ឋាភិបាលក៏បានបង្ហាញពីការពង្រឹងសន្តិសុខ សុវត្ថិភាព កាត់បន្ថយអំពើហិង្សាដោយសារអាវុធក្នុងព្រះរាជាណាចក្រកម្ពុជា ។ មជ្ឈមណ្ឌលសកម្មភាពកម្ចាត់មីនកម្ពុជា បានទទួលអាវុធខូចគុណភាពចំនួន១១.៩១៥ដើម ។ សមិទ្ធផលនេះក៏បង្ហាញយ៉ាងច្បាស់ថែមទៀត នូវស្មារតីនៃគោលការណ៍គោរពសិទ្ធិមនុស្ស និងលទិ្ធប្រជាធិបតេយ្យនៅកម្ពុជាផងដែរ ដោយសារការបន្តលុបបំបាត់ភាពហិង្សាដោយអាវុធនេះ ។
លោកបន្ថែមទៀតថា ពីមុនកម្ពុជាពឹងបរទេស ដើម្បីបន្សាបអាវុធបែបនេះ ក៏ប៉ុន្តែបច្ចុប្បន្ន រាជរដ្ឋាភិ បាល អាចដោះស្រាយដោយខ្លួនឯងបាន ។ក្នុងនាមអគ្គស្នងការដ្ឋាននគរបាលជាតិ លោកឧត្តមសេនីយ៍ឯក សេក ភូមី បានថ្លែងអំណរគុណលោកអគ្គនាយមជ្ឈមណ្ឌលសកម្មភាពកម្ចាត់មីនកម្ពុជា ដែលបានយក ចិត្តទុកដាក់ ក្នុងការអនុវត្តតាមកិច្ចសន្យា ទទួលយកសំណើ ក្នុងការកម្ទេចចោលអាវុធខូចគុណភាពរបស់អគ្គស្នងការដ្ឋាននគរបាលជាតិ ។ លោកសង្ឃឹមថា ភាគីទាំង២នឹងបន្តអនុវត្តឲ្យបានកាន់តែសម្រេចច្រើនបន្ថែមទៀត តាមស្មារតីអនុស្សរណៈយោគយល់គ្នា ។ ពិសេស នាពេលខាងមុខនេះ អគ្គស្នងការដ្ឋាននគរបាលជាតិនិងស៊ីម៉ាក់ នឹងអាចរៀបចំនូវការប្រគល់-ទទួលអាវុធយុទ្ធភ័ណ្ឌខូចគុណភាពមួយចំនួនទៀត ដែលបច្ចុប្បន្នកំពុងស្តុកទុកនៅតាមស្នងការដ្ឋាននគរបាលរាជធានី-ខេត្ត ប្រគល់ឲ្យអង្គភាពសុីម៉ាក់ តាមតំបន់យកទៅកម្ទេចចោល តាមបែបបច្ចេក ទេស តាមពេលវេលាសមស្របណាមួយ ។
លោក ហេង រតនា បញ្ជាក់ថា នៅក្នុងរយៈពេលជាង២៧ឆ្នាំ កម្ពុជាបានរុករកកម្ទេចចោលគ្រាប់យុទ្ធភ័ណ្ឌមិនទាន់ផ្ទុះ គ្រាប់មីន ជាង ២,៧លានគ្រាប់ ក្នុងនោះក៏មានគ្រាប់អាវុធធុនស្រាលប្រមាណជិត១០០តោន ។ ផ្អែកតាមស្មារតីអនុស្សរណៈយោគយល់គ្នារវាងអង្គភាពស៊ីម៉ាក់ និងអគ្គស្នងការដ្ឋាននគរបាលជាតិ ស្ថាប័នទាំងពីរនឹងបន្តរួមសហការគ្នាកាន់តែស្អិតរមួត ក្នុងប្រតិបត្តិការកាត់បន្ថយគ្រោះថ្នាក់ដោយសារគ្រាប់មីន និងសំណល់ជាតិផ្ទុះពីសង្គ្រាមនៅតាមសហគមន៍ ផ្តល់សុខសុវត្ថិភាពជូនប្រជាពលរដ្ឋ ។ ជាពិសេស ដើម្បីបន្តពង្រឹងសមត្ថភាពមន្ត្រីនគរបាលជាតិនូវជំនាញកម្ទេចគ្រាប់យុទ្ធភ័ណ្ឌមិនទាន់ផ្ទុះ(EOD) ដែលជាកម្លាំង
ស្នូលក្នុងការឆ្លើយតបទៅនឹងសំណើលើករណី EOD នៅតាមមូលដ្ឋាន ៕
ចែករំលែកព័តមាននេះ