ទីក្រុងហូជីមិញ ៖ ក្រុមហ៊ុនវៀតណាមត្រូវតែដឹងពីវិធីទាញអត្ថប្រយោជន៍ និងជៀសវាងឥទ្ធិពលអវិជ្ជមាននៃកិច្ចព្រមព្រៀងស៊ីជម្រៅ និងភាពជាដៃគូពាណិជ្ជកម្មអន្តរប៉ាស៊ីហ្វិក (CPTPP) ។ លោក Pham Binh An ប្រធានមជ្ឈមណ្ឌលសមាហរណកម្មអន្តរជាតិប្រចាំទីក្រុងហូជីមិញបាននិយាយក្នុងសិក្ខាសាលាមួយកាលពីថ្ងៃទី២៧ កុម្ភៈ កន្លងមកថា ៖« ប័ណ្ណបញ្ជាក់ពីប្រភពដើម(C/O)គឺសំខាន់ណាស់សម្រាប់ទទួលបានប្រយោជន៍ពន្ធពីសមាជិកCPTPP ហើយ C/O សម្រាប់CPTPP មានភាពស្មុគស្មាញ និងខុសប្លែកពីអ្វីដែលវៀតណាមធ្លាប់តែធ្វើពីមុនមក »។
លោកស្រី Trinh Thi Thu Hien ប្រធានអនុនាយកដ្ឋានប័ណ្ណបញ្ជាក់ប្រភពដើមផលិតផលក្រោមនាយកដ្ឋាននាំចេញ និងនាំចូលរបស់ក្រសួងពាណិជ្ជកម្មបាននិយាយថា ៖« វាជាឱកាសដ៏ល្អសម្រាប់ក្រុមហ៊ុនវៀតណាមក្នុងការពង្រីកទីផ្សារនិងទាក់ទាញការវិនិយោគផ្ទាល់ពីបរទេស និងខ្សែសង្វាក់ផលិតកម្មបន្ថែមប្រសិនបើពួកគេជួបនឹងលក្ខខណ្ឌក្រោមវិធាន C/O »។
គួរបញ្ជាក់ផងដែរថា CPTPP មានការអនុគ្រោះពន្ធដល់ខ្សែសង្វាក់ផលិតកម្មនិងជំរុញដល់សមាជិកក្នុងCPTPPឲ្យបង្កើនការវិនិយោគក្នុងប្រទេសជាសមាជិកដទៃទៀត ។ អ្នកស្រីបានបញ្ជាក់ទៀតថា វិធានថ្មីក្រោម CPTPP អនុញ្ញាតឲ្យក្រុមហ៊ុននាំចេញចេញប័ណ្ណបញ្ជាក់ប្រភពខ្លួនឯងដោយយោងតាមពត៌មានដែលចែងក្នុងកិច្ចព្រមព្រៀង។
លោក An ក៏បានបន្ថែមថា ៖« ប្រសិនបើក្រុមហ៊ុនវៀតណាមត្រៀមខ្លួនចំណាយពេលវេលាក្នុងការសិក្សា និងរៀបចំសម្រាប់ការចេញប័ណ្ណបញ្ជាក់ប្រភពខ្លួនឯងនោះ ពួកគេអាចទាញបានអត្ថប្រយោជន៍ជាច្រើនដូចជាចំណេញពេលវេលា និងការចំណាយជាដើម »។ « ប៉ុន្តែប្រសិនបើពួកគេមិនធ្វើតាមសេចក្តីណែនាំឲ្យបានហ្មត់ចត់ទេនោះ ផលិតផលរបស់ពួកគេអាចនឹងជួបពន្ធខ្ពស់ ឬត្រូវបានបញ្ជូនមកវិញ និងហាមមិនឲ្យនាំចេញថែមទៀត »។
យោងតាមក្រសួងឧស្សាហកម្ម និងពាណិជ្ជកម្មបានឲ្យដឹងថា CPTPP ផ្តល់អត្ថប្រយោជន៍ជាច្រើនដល់ការវិនិយោគ និងការធ្វើពាណិជ្ជកម្មរបស់វៀតណាម ដោយមានវិស័យសម្លៀកបំពាក់ ស្បែកជើង និងអាហារនិងភេសជ្ជៈដែលជាវិស័យទទួលបានអត្ថប្រយោជន៍ច្រើនជាងគេ ព្រោះការនាំចេញផលិតផលទាំងនេះនឹងមិនត្រូវមានការបង់ពន្ធទៀតទេ ៕
ចែករំលែកព័តមាននេះ