ខេត្តព្រះសីហនុ ៖ តាមសេចក្តីរាយការណ៍ព័ត៌មានបឋមបានឱ្យដឹងថា រថយន្តមួយគ្រឿងរេចង្កូតធ្លាក់ផ្លូវជ្រុលទៅបុកតូបលក់អីវ៉ាន់របស់ប្រជាពលរដ្ឋ ធ្វើឱ្យក្រឡាប់រថយន្ត បណ្តាលឱ្យមនុស្ស៤នាក់រងរបួសស្រាល រីឯរថយន្តរងការខូចខាតយ៉ាងធ្ងន់ធ្ងរ ។ ហេតុការណ៍នេះបានកើតឡើងកាលពីម៉ោងជាង១២យប់រំលងអធ្រាត្រឈានចូលថ្ងៃទី១ ខែមីនា ឆ្នាំ២០១៩ លើផ្លូវជាតិលេខ៤ ចន្លោះគីឡូម៉ែត្រលេ១៩៩-២០០ ស្ថិតនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
រថយន្តមួយគ្រឿងខាងលើជិះគ្នា៤នាក់ម៉ាកឡិចស៊ីស RX300 ពណ៌ស ពាក់ផ្លាកលេខ កំពត ២B-៥០០៧ បើកបរដោយឈ្មោះ ឆឹង ពៅ ភេទប្រុស អាយុ៣៧ឆ្នាំ មុខរបរបើកបររថយន្ត មានទីលំនៅ ឃុំអង្គរមាស ស្រុកដងទង់ ខេត្តកំពត បានរងរបួសស្រាល ។ ចំណែកអ្នករួមដំណើរចំនួន៣នាក់រួមមាន ១-ឈ្មោះ ជួន រៀន ភេទប្រុស បានរងរបួសស្រាល ២-ឈ្មោះ គិត ភក្ដី ភេទប្រុស បានរងរបួសស្រាល និង៣-ឈ្មោះ រដ្ឋ វីរៈ ភេទប្រុស បានរងរបួសស្រាល ។
ក្រោយពេលកើតហេតុ ជនរងគ្រោះត្រូវបានសមត្ថកិច្ចបញ្ជូនទៅព្យាបាលនៅមន្ទីរពេទ្យឯកជនក្នុងឃុំបិតត្រាំង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ