រាជធានីភ្នំពេញ ៖ ស្ត្រីម្នាក់បានស្លាប់ភ្លាមៗនៅនឹងកន្លែងក្នុងខណៈពេលដែលគាត់កំពុងជិះម៉ូតូ១គ្រឿងម្នាក់ឯង ស្រាប់តែមានម៉ូតូ១គ្រឿងទៀតជិះស្របគ្នាទៅដល់ទាក់ដៃចង្កូត បណ្ដាលឲ្យគាត់ដួលខ្ទាតចូលក្រោមកង់រថយន្តលាយបេតុង១គ្រឿងដែលកំពុងបើកបរស្របគ្នាដែរ ហើយត្រូវបានរថយន្តកិន បណ្ដាលឲ្យបែកក្បាលធ្លាយខួរតែម្ដង ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើង កាលពីវេលាម៉ោង២និង៣០នាទីល្ងាច ថ្ងៃទី០១ ខែមិនា ឆ្នាំ២០១៩ នៅលើកំណាត់ផ្លូវជាតិលេខ៣ត្រង់ចំណុចភូមិព្រៃព្រីងខាងត្បូង សង្កាត់វោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ ស្ត្រីរងគ្រោះឈ្មោះ សេង សុខសានូ អាយុ៣០ឆ្នាំ មានទីលំនៅផ្ទះលេខ៦០អាអឺ០ ផ្លូវលេខ១១៨ ភូមិ៩ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុស្ត្រីរងគ្រោះបានជិះម៉ូតូ១គ្រឿងម៉ាកហុងដា PCX ពណ៌ខៀវពាក់ស្លាកលេខភ្នំពេញ 1GJ-8757 ក្នុងទិសដៅពីជើងទៅត្បូងដោយមានពាក់មួកសុវត្ថិភាពត្រឹមត្រូវដែរ ។ លុះពេលទៅដល់ត្រង់ចំណុចកើតហេតុមានម៉ូតូ១គ្រឿងទៀត ម៉ាកហុងដា ZOOMER-X មិនចាំស្លាកលេខបើកបរដោយយុវជនម្នាក់បោះពួយក្នុងល្បឿនលឿន និងក្នុងទិសដៅស្របគ្នាទៅដល់បានកៀរដៃចង្កូតម៉ូតូគាត់បណ្ដាលឲ្យដួល ។
ស្របពេលនោះក៏មានរថយន្តលាយបេតុង១គ្រឿងទៀតម៉ាកហ៊ីណូ ពណ៌សពាក់ស្លាកលេខភ្នំពេញ 3A-9421 ដែលជារបស់ក្រុមហ៊ុនរាជសីហ៍ឡូជីស្ទីក បើកបរក្នុងទិសដៅស្របគ្នាទៅដល់កិន បណ្ដាលឲ្យស្ត្រីរូបនេះបែកទាំងមួកសុវត្ថិភាព និងក្បាលធ្លាយខួរស្លាប់ភ្លាមៗនៅនឹងកន្លែងតែម្ដង ។
ប្រភពដដែលបានបន្តទៀតថា ក្រោយពេលកើតហេតុរថយន្តបានឈប់នៅក្បែរនោះហើយអ្នកបើកបរបានចុះរត់គេចខ្លួន ប៉ុន្តែត្រូវបាននគរបាលប៉ុស្តិ៍ចោមចៅ៣ និងអ្នកភូមិនាំគ្នាជួយដេញឃាត់ខ្លួនបានរួចបាននាំទៅកាន់ប៉ុស្តិ៍ចោមចៅ៣ រង់ចាំប្រគល់ជូននគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ