ក្រុមហ៊ុន GGear ជួបជុំដៃគូចែកចាយរបស់ខ្លួន បង្កើនការលក់បន្ថែម
រាជធានីភ្នំពេញ ៖ ក្រុមហ៊ុន GGear ដែលជាអ្នកនាំចូល និងចែកចាយផ្ដាច់មុខគ្រឿងអេឡិចត្រូនិក ម៉ាក LG នៅក្នុងប្រទេសកម្ពុជា បានរៀបចំកម្មវិធីជួបជុំតំណាងចែកចាយរបស់ខ្លួន…
រាជធានីភ្នំពេញ ៖ ក្រុមហ៊ុន GGear ដែលជាអ្នកនាំចូល និងចែកចាយផ្ដាច់មុខគ្រឿងអេឡិចត្រូនិក ម៉ាក LG នៅក្នុងប្រទេសកម្ពុជា បានរៀបចំកម្មវិធីជួបជុំតំណាងចែកចាយរបស់ខ្លួន កាលពីរាត្រីថ្ងៃទី២៧ កុម្ភៈ ២០១៩ នៅសណ្ឋាគារភ្នំពេញ ក្នុងគោលបំណងបង្កើនការចែកចាយផលិតផល LG អោយបានកាន់តែច្រើន នៅក្នុងឆ្នាំ២០១៩នេះ ស្របពេលតម្រូវការគ្រឿងអេឡិចត្រូនិក កាន់តែកើនឡើងនៅលើទីផ្សារប្រទេសកម្ពុជា ។
លោក ហ៊ ហាប់ អគ្គនាយករងក្រុមហ៊ុន GGear Electronic បានអោយដឹងថា ការជួបជុំលើកនេះ មិនមានប្រកាសលក់ ឬសម្ពោធផលិតផលថ្មីនោះទេ តែជាការជួបជុំដើម្បីអោយបង្កើនភាពជាដៃគូជាមួយគ្នា និងជាការអបអរដែលតំណាងចែកចាយរបស់ LG បានខិតខំពង្រីកការលក់របស់ខ្លួន ដែលធ្វើអោយផលិតផលអេឡិចត្រូនិករបស់ LG មានវត្តមាននៅលើទីផ្សារកម្ពុជាកាន់តែច្រើន ។
លោកបន្តថា ក្រុមហ៊ុន GGear មានបុគ្គលិកគ្រប់គ្រាន់ ក្នុងការជួយប្រឹក្សា និងរង់ចាំជួយដៃគូចែកចាយសម្រាប់ដោះស្រាយបញ្ហានានាដែលជួបប្រទះ ក្នុងនោះក្រុមហ៊ុនមានអ្នកជំនាញទីផ្សារ មានជាងជំនាញៗ ទៅលើគ្រប់ផលិតផលនីមួយៗ ដូច្នេះបើសិនជាដៃគូមានបញ្ហាណាមួយចំពោះអតិថិជន អាចទាក់ទងមកកាន់ក្រុមហ៊ុន ដើម្បីដោះស្រាយភ្លាមៗ ។
លោកឧកញ៉ា សុខ ពិសិដ្ឋ អគ្គនាយកក្រុមហ៊ុន GGear Electronic បានអោយដឹងថា ក្រុមហ៊ុន GGear ទទួលបានកេរ្តិ៍ឈ្មោះរហូតមកសព្វថ្ងៃនេះ ដោយសារតែមានដៃគូចែកចាយរបស់យើងដ៏ល្អ និងខិតខំលក់ និងចែកចាយផលិតផលដែលមានគុណភាពដល់អតិថិជនទូទាំងប្រទេសកម្ពុជា ។
ប៉ុន្តែយ៉ាងណាក៏ដោយ ក៏យើងនៅមានបញ្ហាមួយចំនួនប្រឈមដដែល ដោយសារមានអ្នករកស៊ីមិនស្មោះត្រង់ និងបន្តនាំចូលផលិតផលគេចពន្ធពីប្រទេសជិតខាង ជាពិសេសពីប្រទេសថៃ ដែលធ្វើអោយការប្រកួតប្រជែងតម្លៃ មានភាពមិនស្មើគ្នា ។
លោកឧកញ៉ាបន្តថា ក្នុងឆ្នាំ២០១៩នេះ ក្រុមហ៊ុនក៏នឹងមានយុទ្ធសាស្ត្រថ្មីៗ សម្រាប់ដៃគូចែកចាយ ព្រមទាំងមានការលើកទឹកចិត្តជាច្រើនទៀត ដើម្បីជំរុញដល់ការលក់ផលិតផល LG នៅក្នុងប្រទេសកម្ពុជា កាន់តែមានកំណើនច្រើនឡើងស្របពេលតម្រូវការក៏កាន់តែច្រើន ជាក់ស្ដែងកំណើនលំនៅឋាន អគារខុនដូ អាផាត់មិន សណ្ឋាគារជាដើម ដែលសុទ្ធសឹងតែជាគោលដៅក្នុងការលក់របស់យើង ៕ ដោយសហការ
ចែករំលែកព័តមាននេះ