ខេត្តកណ្តាល ៖ ឃ្លាំងស្តុកសម្ភារៈសំណង់មួយត្រូវបានអគ្គីភ័យឆាបឆេះអស់ប្រមាណ៥០%ក្រោយមកត្រូវបានរថយន្តពន្លត់អគ្គីភ័យជួយសង្គ្រោះទាន់ពេល និងសង្ស័យបណ្តាលមកពីកំទេចភ្លើងហើរពីទីលានចាក់សំរាមដែលនៅក្បែរនោះទើបបណ្តាលឱ្យឆេះ ។ លោកវរសេនីយ៍ឯក អុល ប៊ុណ្ណា ស្នងការរងទទួលផែនបង្ការពន្លត់អគ្គីភ័យ បានប្រាប់ឱ្យដឹងថា…
ខេត្តកណ្តាល ៖ ឃ្លាំងស្តុកសម្ភារៈសំណង់មួយត្រូវបានអគ្គីភ័យឆាបឆេះអស់ប្រមាណ៥០%ក្រោយមកត្រូវបានរថយន្តពន្លត់អគ្គីភ័យជួយសង្គ្រោះទាន់ពេល និងសង្ស័យបណ្តាលមកពីកំទេចភ្លើងហើរពីទីលានចាក់សំរាមដែលនៅក្បែរនោះទើបបណ្តាលឱ្យឆេះ ។
លោកវរសេនីយ៍ឯក អុល ប៊ុណ្ណា ស្នងការរងទទួលផែនបង្ការពន្លត់អគ្គីភ័យ បានប្រាប់ឱ្យដឹងថា អគ្គីភ័យឆេះឃ្លាំងស្តុកសម្ភារៈសំណង់ខាងលើនេះបានកើតឡើងក្នុងអំឡុងម៉ោងប្រមាណ១និង៣០នាទីរសៀលថ្ងៃទី២៨ កុម្ភៈ ២០១៩ ស្ថិតនៅទីតាំងឃ្លាំងស្តុកសម្ភារៈសំណង់មួយ ក្នុងភូមិព្រែកហូរខាងកើត សង្កាត់ព្រែកហូរ ក្រុងតាខ្មៅ ខេត្តកណ្តាល មានម្ចាស់ឈ្មោះ គង់។
លោកបានបន្តថា បន្ទាប់ពីទទួលបានព័ត៌មានខាងលើភ្លាម លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានចេញបញ្ជាឱ្យជួយសង្គ្រោះជាបន្ទាន់ ដោយប្រើរថយន្តពន្លត់អគ្គីភ័យចំនួន៣គ្រឿង ហើយបន្ទាប់ពីកម្លាំងរបស់លោកខិតខំប្រឹងប្រែងអន្តរាគមន៍ ដោយប្រើពេលអស់ប្រមាណជាង១ម៉ោងទើបអាចគ្រប់គ្រងស្ថានការណ៍បាន។
ក្នុងហេតុការណ៍អគ្គីភ័យឆាបឆេះឃ្លាំងស្តុកសម្ភារសំណង់ខាលើនេះ បណ្តាលឱ្យឆេះក្តារកុងប្លាកេ និងស័ង្កសីចាស់ៗ រួមជាមួយសម្ភារៈផ្សេងៗទៀតអស់មួយចំនួន ដែលមិនទាន់អាចសរុបជាទឹកប្រាក់អស់ប៉ុន្មាននោះទេ បើតាមការសន្និដ្ឋាន គឺអាចបណ្តាលមកពីគេដុតសំរាមនៅក្បែរឃ្លាំងស្តុកសម្ភារៈសំណង់ ហើយហើរកំទេចភ្លើងពីទីលានចាក់សំរាមនោះទើបបណ្តាលឱ្យឆេះ ។ បើទោះបីជាភ្លើងបានរលត់ទៅវិញក៏ដោយ ក៏សមត្ថកិច្ចនៅតែមិនទាន់ដករថយន្តពន្លត់អគ្គិភ័យចេញមកដែរ ព្រោះតែខ្យល់នៅតែបក់ខ្លាំងខ្លាចក្រែងកំទេចភ្លើងហើរមកលើឆេះម្តងទៀត ។
លោកស្នងការរងក៏បានអំពាវនាវទៅដល់ប្រជាពលរដ្ឋទាំងអស់ដែរថា សូមមេត្តាប្រុងប្រយ័ត្នខ្ពស់ទាំងអស់គ្នា ព្រោះតែខែនេះជារដូវក្តៅ និងមិនត្រូវដុតសំរាមផ្តេសផ្តាសនោះទេ ព្រោះវា អាចបង្កឱ្យមានអគ្គីភ័យកើតឡើងជាយថាហេតុ ដែលនាំឱ្យខូចខាតបាត់បង់ទ្រព្យសម្បត្តិ ហើ យជួនកាលធ្វើឱ្យប៉ះពាល់ដល់អាយុជីវិតថែមទៀតផង។
ចំណែកឯប្រជាពលរដ្ឋនៅក្នុងមូលដ្ឋានខាងលើបានប្រាប់ថា ទីតាំងចាក់សំរាមនេះ គឺតែងតែដុតសំរាមជារៀងរាល់ថ្ងៃ ដែលបណ្តាលឱ្យប៉ះពាល់ដល់សុខភាពរបស់ពួកគាត់ណាស់ ហើយពួកគាត់ក៏សំណូមពរជួយអន្តរាគមន៍ផង ៕
ចែករំលែកព័តមាននេះ