ខេត្តកំពត ៖ ប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត លោកជាវ តាយ អភិបាលនៃគណៈអភិបាលខេត្ត បានសម្រេចឯកភាពតាមការស្នើសុំរបស់ប្រជាពលរដ្ឋចំនួន៤៥គ្រួសារនៅឃុំកោះតូច ស្រុកទឹកឈូ ក្នុងការវាស់វែងចេញប័ណ្ណកម្មសិទ្ធិជូនបងប្អូនលើផ្ទៃដីចំនួន៣១៥ហិកតា ។…
ខេត្តកំពត ៖ ប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត លោកជាវ តាយ អភិបាលនៃគណៈអភិបាលខេត្ត បានសម្រេចឯកភាពតាមការស្នើសុំរបស់ប្រជាពលរដ្ឋចំនួន៤៥គ្រួសារនៅឃុំកោះតូច ស្រុកទឹកឈូ ក្នុងការវាស់វែងចេញប័ណ្ណកម្មសិទ្ធិជូនបងប្អូនលើផ្ទៃដីចំនួន៣១៥ហិកតា ។
មានប្រសាសន៍នៅក្នុងកិច្ចប្រជុំនេះដែរ លោកបានបញ្ជាក់ថា ក្នុងនាមលោកជាប្រធានគណៈកម្មការគ្រប់គ្រងដីរដ្ឋថ្នាក់ខេត្ត លោកត្រូវតែដោះស្រាយសំណើសុំវាស់វែងដីធ្លីចេញប័ណ្ណកម្មសិទ្ធិជូនប្រជាពលរដ្ឋចំនួន៤៥គ្រូសារ នៅភូមិព្រែកអំពិល និងភូមិកណ្តាល ស្ថិតក្នុងឃុំកោះតូច ស្រុកទឹកឈូ ។ កិច្ចប្រជុំនេះដែរ ប្រព្រឹត្តធ្វើឡើងនៅរសៀលថ្ងៃទី២៧ កុម្ភៈ លោកជាវ តាយ អភិបាលខេត្តកំពត និងជាប្រជាធានគណៈកម្មាធិការគ្រប់គ្រងដីរដ្ឋថ្នាក់ខេត្តបានឱ្យថា ដើម្បីឆ្លើយតបតាមរាល់សំណូមពរទាំងឡាយណារបស់ពលរដ្ឋ ដែលមានការលំបាក ហើយជាតម្រូវការចាំបាច់ រដ្ឋបាលខេត្តកំពតត្រូវតែដោះស្រាយជូនប្រជាពលរដ្ឋជាបន្ទាន់ ។
ដោយឡែក ក្នុងដំណាក់កាលនៃការចុះពិនិត្យរបស់ក្រុមការងារខេត្ត ដែលមានការពាក់ព័ន្ធសម្រាប់ធ្វើការដោះស្រាយតាមការស្នើសុំរបស់ប្រជាពលរដ្ឋទាំង៤៥គ្រួសារ ក្នុងកិច្ចប្រជុំនេះគឺមានទំហំ៣១៥ហិកតា ដែលស្ថិតនៅក្នុងភូមិព្រែកអំពិល ឃុំកោះតូច ស្រុកទឹកឈូគឺៈ១-ទីតាំងដីរបស់ប្រជាពលរដ្ឋស្ថិតនៅក្នុងគម្របព្រៃឈើឆ្នាំ២០០២ មិនមានការពាក់ព័ន្ធជាមួយដីឧទ្យាជាតិព្រះមន្នីវង្សបូកគោឡើយ ។ ២-ដីដែលប្រជាពលរដ្ឋបានអះអាងថាៈ បានកាន់កាប់អាស្រ័យ ផល គឺជាប្រភេទដីចម្ការ មានដើមអាកាស្សា ស្វាយចន្ទី លាយឡំជាមួយព្រៃបុស្ស និងព្រៃរបោះ ដែលមានរយៈកម្ពស់ពី២០ម៉ែត្រ ទៅ៨០ម៉ែត្រ ធៀបនឹងនីវ៉ូទឹកសមុទ្រ។
នេះបើតាមរបាយការណ៍ ក៏ដូចជាការបញ្ជាក់ពីមន្ត្រីជំនាញ គណៈកម្មាធិការគ្រប់គ្រងដីរដ្ឋថ្នាក់ខេត្ត បានសម្រេចឯកភាព នឹងរៀបចំឯកសារស្នើសុំទៅប្រមុខរាជរដ្ឋាភិបាលផ្ដល់ជាកម្មសិទ្ធិជូនប្រជាពលរដ្ឋទាំង៤៥គ្រួសារ ព្រោះរដ្ឋបាលខេត្តមិនអាចទុកបញ្ហានេះឱ្យរាំរ៉ៃទៅមុខទៀតឡើយ ។
ចែករំលែកព័តមាននេះ