ឧបទ្ទវហេតុខាងរថយន្ត តែងពាក់ព័ន្ធនឹងការបើកបរលឿនជានិច្ច ។ បើយើងកាន់តែបង្កើនល្បឿនខ្លាំងប៉ុនណា គ្រោះថ្នាក់ធ្ងន់ធ្ងរក៏នឹងកើនឡើងខ្លាំងដូចគ្នាដែរ ។ នេះជាឥរិយាបថ៥យ៉ាងដែលគ្រោះថ្នាក់ខ្លាំងបំផុត ពេលលោកអ្នកកំពុងបើកបរក្នុងល្បឿនលឿន ហើយអ្នកផ្ទាល់ក៏អាចធ្វេសប្រហែសធ្វើដោយមិនដឹងខ្លួន ។
១-ចាប់ចង្កូតដោយដៃម្ខាង ៖ ការបើកបររថយន្តផ្លូវឆ្ងាយ ហើយចាប់ចង្កូតដោយដៃតែម្ខាង មើលទៅដូចជារីករាយខ្លាំងពេក ព្រោះបើកើតគ្រោះថ្នាក់ដែលមិនបានគិតដល់ ដូចជា រថយន្តធ្លាក់ផ្លូវ, ធ្លាក់ថ្លុកទឹក ឬក៏ត្រូវគេចពីរថយន្តផ្សេងទៀតយ៉ាងទាន់ហន់ ការទ្រចង្កូតដោយដៃតែម្ខាង នឹងធ្វើឲ្យគ្មានប្រសិទ្ធភាពគ្រប់គ្រាន់ក្នុងការគ្រប់គ្រង ហើយអាចរបូតដៃចង្កូតងាយៗ ។ ហេតុនេះ ទម្រាំអ្នកយកដៃម្ខាងទៀតមកជួយទ្រចង្កូតនោះ រថយន្តអាចនឹងខូចធ្ងន់ធ្ងរបាត់ទៅហើយ ។
វិធីល្អ ការបើកបររថយន្តផ្លូវឆ្ងាយ គួរចាប់ចង្កូតដោយដៃទាំងសងខាងក្នុងជាទម្រង់នាឡិកា (ម៉ោង៣ និងម៉ោង៩) ។ ការអនុវត្តតាមនាឡិកានេះ គឺជាការកាន់ចង្កូតដោយសមតុល្យ និងស្របតាមដៃចង្កូតរថយន្តគ្រប់ប្រភេទ ព្រោះបើកើតហេតុការណ៍បន្ទាន់ ហើយត្រូវទ្រចង្កូតឲ្យមានលំនឹង ដៃនឹងនៅតែអាចសង្កត់ចង្កូតមិនឲ្យងាកបែរទៅទិសផ្សេង ហើយជួយឲ្យអ្នកអាចផ្លាស់ប្តូរការបត់បែនរថយន្តយ៉ាងឆាប់រហ័សផងដែរ ។
២-មិនមើលកញ្ចក់ក្រោយ ៖ ការបើកបររថយន្តផ្លូវឆ្ងាយ ទោះបីជាអ្នកបើកបរទៅខាងមុខតែម្យ៉ាង ប៉ុន្តែអ្នកបើកបរក៏ចាំបាច់ត្រូវមើលកញ្ចក់ក្រោយផងដែរ ដើម្បីឲ្យដឹងពីការចរាចរនៅខាងក្រោយរថយន្តអ្នកថា ចាំបាច់ត្រូវបន្ថែមល្បឿន ឬចៀសពីរថយន្តខាងក្រោយឬទេ ។ វាអាចជួយកាត់បន្ថយគ្រោះថ្នាក់បានដូចគ្នា។
៣-ទទួលទាននំ-ទឹក ខណៈប្រើប្រាស់ល្បឿនលឿនខ្លាំង ៖ ការបើកបររថយន្តដោយល្បឿនលឿន អ្នកបើកបរគួរតែផ្តោតទៅលើការបើកបរយ៉ាងពេញលេញ ។ ការបរិភោគនំ ឬទឹកនៅលើរថយន្ត នឹងធ្វើឲ្យអ្នកបើកបរមិនបានក្រឡេកមើលផ្លូវ ជាពិសេស នៅពេលអាហារធ្លាក់ ឬទឹក កំពប់ ។
ប៉ុន្តែបើអ្នកត្រូវការបរិភោគនំ ឬទឹក ដើម្បីបំបាត់ការងងុយគេង ក៏គួរតែជានំដែលងាយស្រួលយក មិនប្រឡាក់ដៃ និងគួរហែកកញ្ចប់នំតាំងតែពីមុនពេលបើកបរ ។ ចំណែកកែវ ឬដបទឹក ត្រូវទុកនៅទីតាំងដែលងាយស្រួលយក មិនរលំ និងមិនងាយកំពប់ ។
៤-សម្លឹងមើលផ្លូវតិច ៖ ក្រៅពីការបរិភោគនំ ឬទឹកហើយ នៅមានករណីជាច្រើនទៀតដែលធ្វើឲ្យអ្នកបើកបរមិនបានផ្តោតលើផ្លូវដោយមិនដឹងខ្លួន ដូចជា ការងាកមកជជែកជាមួយមិត្តភក្តិ, ការគ្រប់គ្រងសំឡេង ឬ ការប្រើប្រាស់ទូរស័ព្ទដៃ ។ល។
បើមានការចាំបាច់ពិតមែន អ្នកគួរតែបន្ថយល្បឿនជាមុន និងត្រូវប្រាកដចិត្តថា ការចរាចរនៅខាងមុខស្រឡះល្អ ចាំអ្នកប្រើប្រាស់ឧបករណ៍ផ្សេងៗដោយឆាប់រហ័ស ។
៥-បើកចម្រៀងខ្លាំងពេកក្នុងរថយន្ត ៖ ការបើកភ្លេងក្នុងរថយន្តអាចជួយឲ្យមនុស្សភាគច្រើនមិនងងុយគេង ប៉ុន្តែការបើកភ្លេងខ្លាំងៗពេក វាធ្វើឲ្យអ្នកបើកបរបាត់បង់ម្ចាស់ការគ្រប់គ្រងហេតុការណ៍ដែលកើតឡើងនៅខាងមុខ ។
មហាវិទ្យាល័យ Memorial of Newfoundland ប្រទេសកាណាដា បញ្ជាក់ថា ការបើកភ្លេងក្នុងកម្រិតសំឡេង៩៥ Decibel នឹងបង្កើនពេលវេលាឆ្លើយតបជាមួយអ្វីនៅជុំវិញខ្លួន រហូតដល់២០%ឯណោះ (បានន័យថា អ្នកឆ្លើយតបនឹងហេតុការណ៍កើតឡើងយឺតយ៉ាវ) សូម្បីវាជាពេលត្រឹមតែមួយប៉ប្រិចភ្នែកក្តី ។ នៅពេលបើកបរលឿនខ្លាំង វាអាចគ្រោះថ្នាក់ដល់ជីវិតផងដែរ ។
ការបើកបររថយន្តផ្លូវឆ្ងាយដោយល្បឿនលឿន មនុស្សភាគច្រើនអាចគិតថា វាងាយស្រួលបើកជាងការបើកបរនៅក្នុងក្រុង ប៉ុន្តែបើសិនជាអ្នកភ្លាត់ធ្វើឲ្យកើតគ្រោះថ្នាក់នោះ គឺការខូចខាតមិនអាចប្រៀបធៀបគ្នាបានឡើយ ៕
ចែករំលែកព័តមាននេះ